Malaysia, Pudu vengsung aom vanzuakna saihonkhat meikang

Malaysia, Pudu vengsung aom vanzuakna saihonkhat meikang

Malaysia, Pudu vengsung aom lamzikpi gei ah ankizuakna “Pudu hawker food street” teng zanni zingsangin meikanggawp hi. Hih meikatna munpen Jalan Pudu leh Jalan Sayur kiupheiteng hi a, Pudu Plaza leh Pudu Wet Market tetawhzong kinai mahmah hi.

Zanni Friday zingsanglam 2am hunpawl in meikang akipan hi a, hih meikatna hangin vanzuak Traders te bangtuakding cih kitheilo phot hi.

Hih lamzikpigei anzuakna pen “Pudu Wai Sek Kai” ci’n akithei mahmah anlim ci’n aminthang munneu khat hi a, akipatzawh kum 50 bang phakhinta cihi. Ansai pen anopcitloh hangin, Noodle te limmahmah kici a, gamlapipi panin aneding in akizuatna munkhat ahihi.

Zingsang meikat akitheih ciangin 2:02am hunin meiphelhzum ki zasakpah cihi. Aki zaksakzawh Minute 4 sungiin Pudu, Hang Tuah, KLCC, Sri Hartamas, Keramat cih Fire Station mun 5 panin Firefighters te’n delhkhiapah ngeingai uhhi.

Tua vengsungah tuihatlo, Water Pressure tawmlua ahih manin meiphelhpen hamsasak mahmah hi ci’n Fire and Rescue Department operational commander Supt Mohd Yunus Ibrahim in genkhia hi.

Zingsang 3:13am hunciang in meikuangteng kiphelhsiang zopan a, “Pudu Wai Sek Kai” ci’n akithei anzuakna sai food stall akigawm in 10 meikanggawp hi.

Dira akici tua vanzuakna phual ah kum 14 sungbang na asemkhin numei khatin agenna ah nitak 11pm hunpawl in saisungteng siansuah, vanteng sengin innlam kaciah uh cihi.

Video: Pudu hawker food street (Pudu Wai Sek Kai) destroyed in fire 

https://www.youtube.com/watch?v=5fOq09sf1K4

Zingsang saisungteng meikang cih hongki zaksak ciangin kadelhpah uh a, ahi zongin kavan uh alangval bang meikang in nabeikhinta cihi.

Kuala Lumpur City Hall socio-economic development executive director Datuk Ib­ra­him Yusoff in agenkhiatna ah hih munteng ah vanzuak Traders tengin avanzuak nadingin Pudu Integrated Commercial Com­plex ah ngetna kibawlthei cihi.

Related: Malaysia, Seremban aom vanzuakna khat meikanggawp

Meikatna hangin vanzuak Traders mi 30 bang sumzonna sukha cihi. Hihphual ah banghun ciangin vanzuakna kibawlkikding cihpen bangmah ki gencianthei nailo ci’n thunei te’n genkhia uhhi. Malaysia gamsung ah tusungteng meikang vaitawh buaina tampi piangkawikawi hi. Kuala Lumpur khuasung aom biakna sanginn meikatna hanginzong muanmawh mikhat kimankhin a, thusitna kineiding cih kiza hi. Sawltak #zomidaily