Zomite Tualsung nuntakna ngeina ~ Sing Khaw Khai

Zomite Tualsung nuntakna ngeina ~ Sing Khaw Khai

KHUA – Nidang lai-in Zogam ah mi khutkhialte a man ding Palik ahi zongin, a kikhumna dinguh thonginn ahi zongin, tuhun bangin om nai lo hi. Tua bang hi napi in, tuhun sangin tua hun lai in thukham kilim zuih zaw a, kilemna om zaw in ki-itna zong lian zaw lai hi. Banghangin tua bangin khuasungah nuntakna na om thei ahi hiam, cih i ngaihsut theihna dingin Pu leh Pa ngeina hoih pawl kan huai kasa hi.

Mihingte tenna leitang munteng “KHUA” kici hi. Guahzu in mei a kai ciangin “KHUASIA” kici a, tuate hong ven ciangin “KHUAPHA” kici hi. Tua lo adang i kammal zatte: Khuazing; khuavaak; khuadam; khua-ul” kici a, tua bang a i kammalte i et ciangin, KHUA cih kammal ah mihingte tenna leitang mun khat bek lawhna hi pah lo hi, cih kingaihsun thei hi.

Tua hi a KHUA cih kammal in mihing, ganhing, singkung, lopa cih nuntakna nei nate (Nature) ading a kisam huih, guah, khuazing, khauvak, cih nate khempeuh tawh a kidim mun leh gam (natural world) a kilom lawhna kammal tawh kibang hi. Hih thu F.K Lehman in ‘a lei hin khua (Innate-world) na ci hi. Tua bangin mihingte tenna mun, KHUA ana kici ahi kha ding hi.

Nidang lai in, mi galhang, mi thahat peuh in uk zawhna nei uh ahih man un, mun tuamtuam leh gam tuam tuamah gam na nei kawikawi uh hi. Tuhun bangin khua khatin gam tuam neih lo uh hi. Tua bang a gam a nei zo mite kiangah leitang khote-in lo sap akipan siah leh kaih tuamtuam puakin a na nungta uh hi.

Mikang kumpi hong khan ciangin a mual a guam mun leh gam hong khensak uh ciangin, khua kim in mun leh gam akinei hi pan hi. (Gentehna: Tedim gam nitumna lam gungal gampen tuma in Falam (Zahau)te na teeng masa ahih manun, a khut me uh tawh a kawkna ciangciang uh siah a kikaihna ding gam hi a, tua gamah a kiten nop ciangin tua gam a nei ukpite kiangah a liangziat, a liangvei tawh to kai in siah-khua na sat thei bek uh hi).

TUALSUNG

Ciimnuai khua a kisat hun lai in mihingte i pawlcinna leh gualzawhna thu khat bek tawh khua kisat theilo hi. Khuasat-tuikhuat nam (noble tribe) na om uh a, tuate makaihna leh thupiakna kul masa hi. (Gentehna: Guite Mang, Thawmte Mang kici a, tua siampi namte makaihna loin khua thak kisat thei lo hi). Buansingte khuasat, “Khua kho thei” ci-in Kamhau khuapi Tedim a teeng Buansingte Pu Son Hong la in Suangpi khua kisat hi, ci in Suangpi khua tangthu bu ah akicingin kigelh hi.

Tua bangin amau khuasatna mun ciat ah hausa sem in tui phuisamin, mang uh hi, ci in beh khang tangthu sung panin kitel theih hi. Kawlpi gampan Song Thu in makaihin, Cimmnuai khua kisat hi, ci in na kigen ahih ciangin, Song Thu zong nam makai khat (Tribal Chief) ahihloh phamawh hi.

Khua akip akho nadingin gal leh sa a om loh nading thupi masa hi. A diakdiak in gamsate, mihing’ vulh leh khawi tungah a phengtat loh nadingin, kamciam leh thukham na pia uh hi. Tua ahih manin khua a kisat ciangin sa kiban a, Gamtawn (sahang) tawh kiciamna kibawl hi. Khuasak khuasatna ah sial kiban a, Suangpi khuasatna ah Ui kiban hi.

Tua sagil khuakot ah kikai a, khuasat tulpipa in, “Hi ka sial gil kaihna, ka sagil zuihna mun leh gam sungah hong kaan hong lut theilo ding hi uh teh,” ci-in thupia hi. Tua hi a sahang vuina ah, “Gamtawn tawh tong ka ciam in e tui lehluanin ciam ung e. Ciampel a sial tual na dawh, na khe lauluang in sun e,” na ci uh hi. Tua bang a sagil kaihna huam sung mun teng, ‘Khuasung-khua ki-ukna gam’ (Village Territory) kisuah hi. Tua bangin siansuah in tua mun, tua leitang sung teng, mun siangtho gam siangtho tangsak, suaksak uh hi.

KHUALSUNG

Zomite tenna gamin mualtung ahi hi. Mual leh guam, sim leh zo, a lum leh a vot khuahun omna mun ahi hi. Tua ahih manin i pu leh pate in a lum leh a vot kikal gamlai laizang na zuan uh hi. Nek ding dawn dingin tui khuk khuat masa uh a, a thupi pen khuasat nasep khatna in khuazang tangpi tangta in biakpiakna ding mun hoih leh mun nuam teelna ahi hi. Khua teenna khuasung pan a zangtam belna ah Tual na bawl uh hi. Tualsuang (altar) na bawl uh a, Tualsuang (Pillar) na phut uh hi. Tualsuang pen suangpeek hi a, suangtho tom nono kiuli kualin na phut uh hi.

Tua suangthute tungah bel suan bangin Tualsuang kinga sak uh hi. Tua bang a kitawi khaang suangpeek i nuai ah Tual-an, tual-sa na pia uh hi. Tua Tualsuang kiangah Tualsong kiphut hi. Saizang khuasat Tual ah Tualsong in suangtawn khat kiphut a, khua dangte ah ahih leh singkhauh singto pawl ahi Sesing peuh simsing peuh kizang hi. Tualsong bawlzia khua khat leh khua khat kibang khin lo hi. Mun khatte ah a dawn kika sak a, mun khatkhat ah a dawn kisuizum hi. Saizang Tualsong (suangsong) in tang ngeina lim pua pen in, lo pen hi.

“TUAL” cih kammal pen Zomite sisan sungah kiptakin teengin, thu thukpi tawh kizomin kizanga, tua kammal kinuntak pih hi. Tualsuang leh Tualsongte omna huam sung teng, Tualzu’phih huzap sung teng a huamin “TUAL” kici hi. ‘Tual’ icihna ‘Laitual’ (Inntual), ‘Bawlung tual,’ cih kammalte tawh etkaak lehang: “Muntaam,’ zangtaam’ cih bang dan a khiatna nei ding tawh akibat hangin, tua mun khempeuhte pen Tual kici khinlo hi. Tua ahih mainin, Mihing ngeina leh biakna tawh kisai a kizatna mun (Zangtaam) te pen TUAL kici zaw hi.

Hi kammal bang ci bangin kingah in kizang ta zong leh Zomite pu leh pate pan kipanin, a nuntakna ahing tawntung nuntakna tui nak bangin i zang hi. Krris thuzui mite Khristian a kicih bang danin, tua Tual biakna minpua in Tual nungzuite khempeuh pen “TUAL’ kici a, Tual thupha in a huamkhak sung khempeuh zong ‘TUALSUNG’ kici hi. I pu leh i pate khua khat leh khua khat nopna ah kizo uh a, a khikhenkik uh ciangin mangpha kipaih uh hi. Mang a kipaih uh ciangin: Kei va ciah vang ka khua khangnen ah Tualsung’ la nu’n a zotang bang dam aw”- kici uh hi.

Zo ngeina ah leitung mihingte, Khual leh Tual ci-in mite nam nihin kikhen hi. Tua pen Khalkha lamte in: Khual leh Lai” na ci uh a, khual pen Tualpua lam a om mite (teng mite) khempeuh lawhna ahi hi. Khual cih kammal in, zawl, gual, gal, midang meltheih loh khempeuh a kigawm a lawhna ahi hi. Tual cih khuasat tuikhuat (innteek) pawl, peemta (khualmi tualsuak) leh sila innteng a a kikai, gal hingmat khempeuh kigawm hi.

Zokam a “Tual that ken” cih pen Khalkha lamte in amau aituam kamin, “Lai Nawng” ci uh ahi ciangin Tual leh Lai pen a kibang ahihna kitel hi. Khalkha lam pan in ‘Lai’ cih kammal pen Laimi ci-in kizang hiam, cih a kikan theih loh hangin, Tedim ngeina lam panin kitel gen thei-in zong kikan thei hi.

Tedim ngeina ah “LAI” pen ‘sanggam suahpih” cihna hi a, a khiatna pen “Eite” aihkeh “Eimau” cihna ahi hi. Unau nih leh thum sungah khat lai pen khat bek mah hipah a, tua ahih manin in Tual thah phu kila thei lo a, Lai thah phu kila thei hi. Banghanghiam cih leh Tualsung a tualthah (murder) om ngei loin, om thei lo hi. (A tuamin gen lai ding). Tual thahna cih in Tual leh Tual kithahna hi a, Lai thahna cih in Khual leh Tual kithahna ahi hi.

Tualsung mikhat in Tual pualam mi khat a thah leh tua a thahpa in a thahpa (misi) i sanggamte pen “LAITHAT” hipah hi. Tua laithah phu la ding pa pen a sanggam upa pen hi a, tuapa pen ‘THAL LOH’ ci in kimin vawh hi. A khiatna in “Mitunga a kiba thal alohkik pa” cihna ahi hi. Hi bangin Lai kithah sakna panin, khua khat leh khua khat gal kikneihna piang thei a, tua pen khang tampi kikhawm thei hi. Tua ahih manin, Lai cih pen Nam min a i zatna in a huam khak pen Behkhat, phungkhat, Tul khat ciang bek huamkha hi.

Tualsungah ahih leh Khua mi khempeuh huam kha hi. Khual mi khat Tualmi a akisan ni pan kipan Tual suak ahih manin Tualsung cih in a huampah suak hi. Gentehna in: Mun dang lei dang khat pan in, akila ganhing khat eima huangsung hong tun ciangin, Na inn ah hong suak ahihkei leh Na neih khit ciangin No a neih leh tua pen “Gan Tualsuak” kici hi. Mi khat in midang inn ah hawh henla, ki innteek sak leh zong “Tualtang” kici hi. Khual khat Tual a suak thei hiam cih thu tawm khat gen lai dih hi.

Samaritan leh Judah mite bangin, Khual leh Tual, an leh tuite dawn khawm thei lo uh a, kitang uh hi. Khua khat leh khua khat galin a kineih neih khit uh ciangin kua mah kilengla in kikawm nawn lo uh hi. Tua bangin gal a suak khit uh ciangin a kilem kikna a bawlnop uh ciangin, khua aa ding a a nuntakna a pia ngam mi khat kiteel khia uh a, tuapa pen limtakin an vaak masa uh hi. Tua pa pen, “TONGCIIN” kici in, tuapa pen va pai a, a kilempih kik nop uh khua makaipipa ‘Kong’ tuikuang tui va dawn leh ahi zongin, a Sutpi uh vapom leh ahi zongin, tua Tongciin pen gal bangin kithat thei nawnlo ahih manin, a deihna a thu sung thei a, tua bangin kilemna ding kivaihawm thei hi.

Zogamah Mikang gal hong khan cilin, Khalkhate in Runtlanga mual panin, nakpi in nang dingin kiging uh hi. Tua laitakin Zokhuate khat Sui Tliang a kici in, Khalkha khua ah kamtai pai sak a, “Mikang galte nang a i sih khit sangin lut zaw lehang hoih zaw lai hi,” ci-in gen sak hi. Tua thu Bualtak Khua mi Lal Sang pen va pai in galte tawh an va ne khawm hi. Tua thu a phawk uh ciangin gal nan dan ding vai kikhawl kik hi. Thau a lei (zangno) mek loin galte Khalkha khua ah kilut sak hi, ci in Khalkhate khangtang thu ah kigen hi. Bang hang hiam cih leh Lal Sang in galte tawh zu leh sa va ne khawm uh hi.

Tuate pen gal (ral) hi nawn loin Tual (Lai) suak uh hi. Tua thu mah tawh kibangin Japan gal lai in zong Japan galkap siksinkhat Suangpi Tualsung hong lutin galphual hong sat uh hi. Tua galte nawt khia kik ding Suangpi Tual Galkapte kithawi uh hi. Tua thu a zak uh ciangin, Phunom khua mi Kha Dai in; “Suangpite aw, na khua uh ah tua Japan galkapte do in kap kei un, tua bang a na hih teitei uh leh Tual that na suak ding uh hi,” ci in kam tai sawl hi.

Tua ciangin Suangpite in tua Japan galkapte pen Tual ahiam gal ahiam cih ngaihsun pha kik uh a, Kawlgam Nyanglepin khua Leiphung ah Suangpite Dam Za Cin leh Khai Za Ngin hong thahsakte kua ahi hiam, Japante mah hilo ahi hiam, tua ahih manin Japante pen Tual hilo hi, Gal ahi hi, ci-in kipsak uh hi. Tua khit caingin zingsang vakmial (phalvak) in gal phawngin, tua galkapte pen Suangpi Tualsung pan in nawtkhia uh hi. Tua ah Suangpite in gal lu khat tan uh hi.

Hi i gensate tungtawnin i et ciangin, Zo ngeina ah mi khat peuhpeuh khual ahi a, gal ahi zongin, ankuang, ankeu i um pih, i tawipih, Tualsung tuisiang i dawnpih sa ahih khit ciangin, tuapa Tual in kisim pah a, “pemta tual suak” khatin kingaihsun hi, ci a theih ding ahi hi.

TUAL KI-UKNA GAM

Zo kam in ‘Kumpi’ (king, government) cih kammal kinei mah napi in, Zogam ah ei leh ei a ki-uk hun in (Miknag kumpi hong lutma hun) tua zamin kua mah kipia lo hi. Ei uk i makaite pen Mang, Ukpi, cih bangin min i kivawh hi. Tua thu hangin u pu i pate pen nidang lai hun in, kumpi ukna nuai ah na om ngei uh ahihna thu kimu khia thei hi. Ciimnuai khua panin a kikhenkek uh ciangin, amau khua ciat ah amau leh amau ki-uk ciat uh hi.

A khuakhua ah a pil leh a ciim zaw a hang leh a lian makai pawl hong khan ciangun thu tuamtuam hang tawh tua milian leh thahatte tungah, kito kai in To leh Sila ngeina tawh ki-ukna na om ngei h. Mualbem khua panin Sukte suan ahi Khan Thuam a hong khan ciangin, Sihzang mang sim loh Tedim mang khempeuh ama tungah ki tokai sak in, Meitei gam Teimei lui dongah Mualbem gam (Sukte uk) na zai sak hi. Hi bangin la na phuak a:

• a). Setang kaihna Teimei dong e, ka hialna lamtui hi a,
• b). Sak ciang Teimei khangciang Lamtui a lai ah kamkei hing e., na ci hi.

Ahih hangin a tute a khan ciangin, tua Khan Thuam gam (Mualbem gam) Sukte-Uk leh Kamhau-Uk cih Ukna gam nih in na kikhen hi. Mikang gal hong khan laitak in, tu laitak Tedim gam ahi, Sukte-Uk, Sihzang-Uk, Kam Hau-Uk ci-in Ukpi gam thumin na kikhen hi. Tua tawh kizui-in, Sukte ngeina, Kam Hau ngeina, Sihzang ngeina cih bangin ki-uk dan zong nam thum mah in na kikhen hi.

Tua pen na kizang khin hi. Kum 1894 May, 16 ni-in Khuasak ukpi Khup Pau leh Khai Kam te pata in, a lum a tei uh khia in, gal a lut a kipanin mikang galte Tual in kisim ta a, amau ukna kimangin kinungta hi. Khan Thuam tute in a pu uh gam Leitawhtan panin khen in, Leilu lam teng Kam Hau gam suah a, Leitaw lam in Sukte gam in nei sak uh hi.

Kum 1896 ciangin, “Chin-Hills Regulation, 1896” kici, Zogam ki-ukna upadi tawh kizui-in, Tedim khua ah Vuandok zumpi hong phut hi. Tua zum panin tuhun Tedim gam leh Tonzang gam uk khat suah in hong uk hi. Tua bang gam ki-ukna tawh Sukte, Sihzang, Kam Hau uk khat nuai ah hong koih a kipanin, tua Vuandok ukna gam teng Tedim gam kici hi.

Tua vuandok ki-ukna sung a mi khempeuh zong Tedim mi ci-in hong kizang ta hi., Khang tangthu ciamtehna lai leh laibute i et ciangin, tuhun Tedim mite Paihte hong kici masa in, tua zawh hun khat hun ciangin Guite hong kici hi. Mualbem mang Khan Thuam hong khan zawh ciangin Tedim pau lam a aom mite in Sukte, Sihzang, cih bangin hong muhna hong theihna bangun hong lo uh hi. Tua mah bangin, tuhun in Tedim mi icih ciangin, tua Sukte. Sihzang leh Kham Hau ngeina thum kigawmna bangin kisang hi.

Ngeina ah Tual lo tawh khua kiteng theilo hi. Khua khat ah Tual nih om thei lo hi. Tual khat khua khat hi pah hi. Khua a kisat ciangin, sagil kai in Khua ki-ukna gamgi in kiciamteh hi, cih thu i gen khin hi. Tuhun ciang gambup upadi sungah mi khempeuh kiteng khawm a, gambup upadi bangin kigamta in kinungta hi. Tua bangin Tualsungah zong nam tomte, nam saute, peemte leh sila a tuamtuam kiteng khawm hi. Tua thu kham tawh kizui-in kinungta in ki gamta hi.

Tuhun upadi mai ah gammi khat leh khat ki zakim in, upadi a palsat a om leh zum dan a kipiak mah bangin, tua thukham a palsat khempeuh muhmawhte in dan a pia hi. Namtom, Namlian, Inn teng sila cih om nawn loin muhmawhte mai ah mi khempeuh kizakim hi. Tuhun kithahna tawh kisai in sihdaan (Death Sentence) a kipiak mah bangin, Tualsungah zong Tualthah luang tawh na kisawng sak uh hi.

Tua ahih manin Tualsungah thukham ngeinate kizui-in khat leh khat kinawk kha loin kinungta thei hi. Tuhun gamkhat upadite gam dang tawh a kisai loh mah bangin, Tual thukhamte tualpua tawh kisai lo hi. Tual pua ah khat leh khat phu kilakna ngeina tawh kizomin kinungta a, a guallelte a gualzote tungah to kai uh hi.

Tual thukham a lian pen in “Tual that lo ding” cih thu ahi hi. Tua bang a tual thahna in muhmawhte thukham palsatna suak bej tham loin, leitung ngeina ah zong khut khialhna a lian pen khat in si hi. Tua khialhna a bawlte “innmang thei” kici hi. Innmang cih ciangin, suan leh khak beina, cii man na hipah hi.Tusel taselna bek tawh in kimang thei lo a, pulsih, khansihna zong tawh inn kimang thei lai hi. Pasal tawh khang kisim ahih mah bang in, tapa neih zong thupha leh hamphatna in kingaihsun hi.

Tua mah bangin tapa selte zong hamsiatna leh kamsiatna in kingaihsun hi. Muhmawhte piak liaudaan pen a tam zaw in sihna hi a, tua sihdan hang tawh inn manna a pian ciangin, tua sihna zong tuahsiatna lianpi khat hipah hi. Tuhun ciangin upadi nuai a nungta gammi khempeuh in, Tual hi uh a, kithahna khempeuh zong Tualthahna hi khin hi.

Tual leh Tual kithahna ah phu kila lo hi. Mihing khat leh khat phu kilakna sangin, mawhnate phu lakna na zawta ahih manin, kikihta zaw hi. Ahi zongin luang beina zah a, supna lian thute sum leh Sial tawh kisawng, kiloh sak thei hi. Luang man Lawi-giat tawh kitan a., nidang hunin Lawi takpi mah kihawl a, Dangka hong kizat ciangin, Lawi khat Rs.30/- in lkiseh a, Lawi giat tang in Rs. 240/- kigam hi.

Tua banah hanken kuasah kisat sak thei hi. Upadi tawh ki-ukna hun tuhun nangawn in tua bang luang thute thukhen zum kitun nuam loin, ngeina bang a kithumna leh, kituamna tawh ki sat mit thei hi. Ahih hangin zum thukhenna omlo, tuhun luang thute ah zong Muhmawhte in koih khong tuan lo hi, ci-in a um mi ki om lai hi.

Tualsung ki-ukna ngeinate i et ciangin, thukham palsatna tung a muhmawhte thukhenna leh dan piaknate citak lua ahih manin, Muhmawhte kihtakna bek tawh thu thukhamte kizui masa hih tuak hi. Tua pan kipanin Tualsungah thu tawh ki-ukna leh nuntakna hong piang khia hih tuak hi.

Tua bangin thu tawh nuntakna a om theih manin mihingte kicimang lo hi. Tua hi a Tualsungah mihingte nuntakna a uk, a cing, a kem pen khua hausapa hi loin, tua a kihtakpa uh, Muhmawhte hi a, tua pen Hebru-te ngeina ah “Isaak’ Zahtakpa” tawh a kibang ahi hi. Tualsung nuntak thute i et ciangin, gam khat, ki-ukna tawh kisun ahih manin, “Tual ki-ukna gam” (Tual State) cih huai hi.

TUAL THUKHAM

Tu in ahih leh Tualsung i cihin bang hi a, tua Tualsung kua in uk ahiam, cih kitel thei ta hi. Tualsung pen thu tawh a kinungta sak mihingte omna mun, a siangtho a zeksak mun hi, kici thei hi. Muhmawhte kitakna hang tawh thukham kizuihna gam, zong kici thei hi.

Tua thukhamte bang hunin pianga, kua in na piangsak hiam, cih i gen theih loh hangin a khang a khang in hong kihilh suksuk a, nisim mihing nuntakna sung panin, tua thukhamte a manna leh a cihtakna kikipsak hi. Tua thukhamte lai a gelh bangin hong kiluah suk hilo a, kam tawh paunak bangin hong kigen sawn suk ahi hi. Tuate tuhun thuciamteh bang danin ciamteh ni ci lehang, a bulpi zaw deuhte in a nuai a bang dan in ki kaikhawm thei hi.

• 1). Tual that kei in.
• 2). Na Nu leh na Pa zahtak in.
• 3). Zuau thu gen kei in.
• 4). Gu kei in.
• 5). Mizi mita tungah khial kei in.
• 6). Mi neihsa tungah tatsia kei in.
• 7). Mi neihsa duhgawh kei in.
• 8). Paupha kei in.

Tual that kei in: — Mi kikthat thei a, tual kithat thei lo ahihna thu i gen khin hi. Zokam ah “THAT” leh “MAN” cih kam kiton nih kizang hi. Khangluite min a sial ciangun; “Ka thah ka mat” ci uh hi. Nuntakna khat sihsakna “That” kici a, nuntakna nei ganhing khat mihing khutsung tunsakna pen “Man” kici hi. Gentehna in: Galhing man, galthat, gul man, gul that, cih bang hi. Ahi zongin Sakhi that kici lo hi. Sakhi sang a aneu zaw ganhing: Lungmee pen “Man” kici loin “That” kici hi.

Mihingte gal leh sa lakah ki om in, kinungta hi. Gal tawh kisi thei in Sa tawh kimang thei hi. Ganhingte lakah mihing nuntakna a susia thei pawl om a, tuate zong mihingte gal mah tawh kibang pah hi. Mihingte mah bangin ganhingte lakah zong, sha leh vang a nei om a, tuate leh mihing a vang a pha zaw, a hat zawzaw in gualzo hi. Gentehna in Ngal, Gulpi ch bang hi. Tua banah, mihing tawh a kilemlo ganhing pawlkhat om a, tuate zong that in kisi sak hi.

Gentehna: Lungmee, Lungngam, Ciikpi cih pawl hi. Tua hi a, mihingte cidam nuntakna a nawngkaisak thei nuntakna dangte khempeuh sihsakna pen “man” kici hi ci-in theihding ahi hi. Hi bang mihing ngeina tawh kizui in kammalna kizang hi. “That” cih kammal nungah gualzawhna lungsim tawh kizom hi. Tua hi a, Tual pen gal hi lo hi. Lungmee nuntakna, tangtel nuntak bang nungta ganhing nam hi lo hi. A zehsak, a siangtho ganhing nam khat hi.

Na sihpih, na thahpih, na kailpih na vaihpih, na hinpih na khanpih khat hi. Tua hih manin Tual pen gal banga thah ding hilo a, nang ma pumpi bangin it ding ahi hi. Tua bangin thuthuk mahmah kammal khiatna nei hi a, mihingte khat leh khat kithat ding, muhmawhte na sianglo hi. Tua ahih manin Tual thahna in muhmawhte mai ah khialhna a lian bel in, sihdaan sangin a lian zaw, inn man sakna daan napia hi.

Na Nu leh Na Pa zahtakin: Zo ngeina ah “Nu leh Pa zahtak lote, a nahlawh pek kei,” kici hi. Cihnopna in Nu leh Pa a zahtak lote, leitung nuntakna ah a dau pailo thei, kamsia thei cihna ahi hi. Nu leh Pa hangin innkuan kipiang a, suan leh khak tawh phung leh nam kitang thei bek hi. Nu leh Pa in itna tawh hong khoi hong tah ahih manin, nupi pasal kitang thei bek hi. Nu leh Pa zahtakna a omna innnkuan ah kilemna om thei bek hi. Innkuan nuntakna ding zonna leh vainate ah mavanna leh daupaina tawh kizui thei zaw hi, ci-in kingaihsun hi.

Isakin a tapa a dingin thupha a piak bangin Zo ngeina ah tate a dingin, Nu leh Pa thupha piakna zatna kician om lo hi. Ahi zongin tate tungah Nu leh Pa lungkimna in thupha huai hi, ci-in upna kinei hi. Nu leh Pa lungkim sakna ding kizong a, Nu leh Pa pahtawi ngeinate kizang hi.

Gentehna: Inntuan thak khatin, a inntuan pheta a khawi leh a vulh sungpan a lian bel, a limci bel pen Nu leh Pa gawh masa uh hi. A zon a vaina ah a ngah khempeuh leh a muh khempeuh a Nu leh a Pa kiangah tun in, a Nu leh a Pa lungkimna kicing pen hi. Nu leh Pa deihsakna tawh zi neih ahi zongin, pasal neihna ahi zongin tuate Nu leh Pa thumanna hoih pen in kingaihsun hi.

Nu leh Pa in hong siam thei hi, ci-in ki-um a, Nu leh Pa khat peuh a sih ciangin, tua tungah thupha kingen thei hi. A luang pumpi in kong pal (Kawngpi) a kal (khen) ciangin: “Mimcii hong khiat in, Taangcii hong khiatin, Vompi hong hawl in, Ngaltang hong hawlin” kici-in ki vaikhak thei uh hi.

Tua siluang hanah a kisial ciangin, zu kimop a, tua zu mop nuam mi kituh lai hi. Tua bek hilo in, tua siluang zawnna guate pen thalin (Sailii) kibawl leh vasa sun thei deuh, man thei deuh cise uh hi, ci-in upna kinei hi. Tate a dingin Nu leh Pa leitung Pasian uh hi, ci-in kingaihsun hi.

Zuauthu gen kei in: Zo ngeina ah ‘Zuauthu gen’ i cih pen a zak bang lianin genkik lohna ahi hi. Thu piangkhat, thu om khat, ahi bang a om bang, a manna bang a gen lohna hi a, mihingte i theihna leh i muhna kicing lo lua ahih manin, a man kisa kha thei hi. A hi leh a dik kim lai zong ahi lopi bangin kimu thei hi. Tua bang a telkhialh, theih khialhnate pen a thu tawh kizui-in a thu gente zauthu kici lo hi.

Ahih hangin mi khatin gatang a kaihna ah ahi zongin, thukhen zumah teci a panna ah ahi zongin a theih leh a theihna bang lianin, a muh leh a muhna bang lianin, a gen lohna pen “Zuauthu” kici hi. “Zuau in a khap tawn” kici a, zuauthu genna pen gupha lua hi. Natna leh sihna in zui thei hi, ci-in ki-um hi.

Muhna leh theihna banga genna pen “Thutang gen” kici a, lungsim hoihna leh siangthona kilang sak hi. Mihingte pil semsem leh thukawi gen semsem hi. Tua ahih manin Sihzang paunak khat ah, “Maw maw thutang son” na kici hi. Maw maw thutang genna pen Muhmawhte muhna ah a siangtho lungsim hi a, a deihna hi pah hi.

Hausa zumah thu akikhen ciangin, thulang tuak i genna ngai-in, kikhen hi. Thukhen a cih ciangin, a mawh leh a tang khawkkhiatna ahi hi. Tua bangin thulang tuak genna tawh a kikhen theih loh ciangin, tua thu Muhmawhte ki-ap a, Suangto-pehna, Tuikul lutna leh Tuisia dawnna ngeinate zang in Muhmawhte thukhen kingak hi. Muhmawhte in zuauthu gente tungah thukhen hi, cih upna kiptak kinei ahih manin, tua kamciamna mun ah zuauthu kigen ngam lo hi.

Tua mah bangin, Suangto apet ngam leh a pet ngamlo thulang nih lakah, a pet ngampa kizo sak hi. Hi thutang kidemna ngeinate a tuamin ciamteh huai ahih hangin, kigelh kim zolo hi. Thutang kideih man ngeinate (Customary Rites) Kawlgam upadi in zong thukimpih a, tudongin kizang thei lai hi. Ahih hangin tudongin mi pawlkhatin tua ngeina neusek in a khialhna a mawhna ah zong kiciam thei uh hi.

Tua ciangin tua tang ngeina upna tawh kituak nawnlo a, thu kikhen khial thei tawntung ahih manin, U Thein Maungin Zogamah Mangpi hong sep ciangin, tua ngeinate tawh thukhenate zumthu bangin sang nuam lo hi. Mi pawlkhat in “Ka mawhna pipi mah suang tua tanvei pet ing, lah si keng” peuh cih san lel uh hi. Tua ahih manin, tuhun ciangin suang to pet, tui kul tuah, leh tuisia dawn (Nek) ngeinate zumthu ah san huai nawnlo ahih man zah khatin kizang nawnlo pah hi.

Gu kei in: “Gu” a cih nopna ah, na khat peuhpeuh a neipa/nu theisak lo a, lak khiatsak pen a kici ahi hi. Mi na khat peuh i guksak leh, tua i guk sangin a manpha zaw ei na khatin sawng thei hi, ci-in ki-um hi. “Zilguk leh Sing-ek guk” a sia belin kigen a, Sing-eh gute in “Hangtaang huanna in kinei thei hi,” kici hi.

Tua ahih manin, sing-eh a kiguksak uh ciangin, sing-eh neite in, “A Hangtaang a Bepi na huanna hen,” ci-in kiphuisam thei hi. Tuhun a , thuman lopi tawh sum nete tungah “Za tui Zaha na leina hen,” a kici tawh kibang hi. “Hangtaang leh Bepi” pen sihvuina a kizang a zeksak an hi a, tua bang a kicih ciangin “Si hen” a cihna uh ahi hi.

Tua ahih manin, Tualsungah na kiguk sak lo hi. Lo lai-ah an lak sa in kinusia hi, a ngak om loin inn kinusia hi. Ei ak lo ak khatpeuh hong om ciangin ah tua ak neite veng leh pam ah kikan in, ki piakik ciatciat hi. Mi na khat a kimuhsak uh ciangin kipia kik a, tua na a neite in “Mit muhman” pia lai uh hi. Khangluite in na khatpeuh a valkhongin deihlo uh hi.

Mi zi mi ta tungah khial kei in: Zokam i zatna ah- “Mawhna; khialhna” cih kam kiton mal nih na kizang hi. ‘Mawh’ cih pen thuman thutang kinialna leh kituhna mun ah kizang a, thuman genlohna pen ‘mawhna’ (sin) hipah hi. Tua ahih manin, lungsim nuntakna tawh kisai zaw deuh hi. Lungsim ii sawlna bangin kigamta hi. “Khialhna’ ahih leh thukham tawh kikelki a ih gamtatna tawh kisai-in kizang hi. Khut khialhna (Crime) kici thei hi. Khut khialhna in kam kam khialhna zong huam pah hi.

Upadi palsatna pen khut khial hipah lo a, mihing khat leh khat kiliam sak, kibai sakna khempeuh “Khialhna” cih ding ahi hi. “You shall not commit adultery” (Paikhiatna 20:14) cih Pasian thukham a kitelna ah,”Nu leh pa mawhna na bawl kei ding uh hi” ci-in kigelh hi. Hi bang khialhna ah numei leh pasal a kibangin tavuan nei khawm hi, cih kimu hi. Zo ngeina ah ahih leh pasal in thunei zaw ahih mah bangin, nu leh pa omkhopna ah zong, pasalte tungah tavuan kinei sak zaw pah hi. Tua hi-a, hih tual thukham pen a palsatte tungah a kipia thukham tawh kibang diak hi. Tua ahih manin, tua bang khialhna hang a supna leh bainate ah pasal kithuaksak hi.

Zo ngeina ah numei’na leh pasal’na (sex) pen Buddha ngeina a bangin, a limlimin a sia a nin na khat bangin kingaihsun lo hi. A siatna leh a nitna, tua nate bang ci kizat hiam cih thu tawh kisai zaw hi. Zatna tawh kisai ngeina kinei a, tua ngeinate tawh kizui-in kizom kipeh ki-awh dimdiam hi. Khangluite lakah zi khat sangin tam zaw a nei om ngei hi, cih thu a kigen hangin up haksa hi. Zogam mun khatkhat ah zi khat sang a tamzaw a neih man uh a, a kiphasak a ukpi pawlkhat a om tei hangin, zi tampi neihna tawh a kiliansak a ki hausak om nei lo hi.

Tua bang a om zenzen leh zong kineu et zaw lai hi. Ngeina Zo khang thu i kan ciangin, zi khat neihna ngeina (Polygamy) pen Zo ngeina ahihna kitel theih hi. Hi in a khang khang a hong kizui hong kizang suksuk, ngeina limci ngeina pha khat ahi hi. Pasal khat in numei khat zi in a neih khit ciangin, ol takin ma kik thei lo hi. Hi leitung bek tham loin, a sih khit ciang nangawnin a kigawm suak nading upna tawh, sialtang sutpihin taangza aihpih hi. Zi makna pen gamtat zulhzauna in kingaihsun a, “No zi ma theite” ci in kikona in kizang hi.

Tualsung nuntakna ah numei a tuam, pasal a tuam cih bangin kikhen in ki deidanna om lo hi. Lo kho khawm singpua khawm, anne khawm, tui dawn khawm in kikhawl hi. Nopna dahna ah lam khawmin, lumkhawm uh a, sanggam bangin om khawm uh ahih manun, khialh nopna lung kuamah in neilo uh a, kuamah zong takhial lo uh hi. Tua bang a nu leh pa khialhnopna lungsim a neite pen kigensia in kipampaih hi. Nu leh pa kikem zo loin a mawh uh a, a gai uh ciangin “Zawl gai” kici a, maizumna in kila hi. Zawl gaina pen khankhat a dingin zumna leh daina lian pen in kingaihsun hi.

Tua bek hi loin tuahsiatna leh kamsiatna hangin ki ngaihsun zaw hi. Tua pen thusia thu lamdangpi khatin kingaihsun a, tua bang mi a om ciangin khuasung ah thang mahmah in kigen sepsup hi. Akpi a khuang ngeilo a khuan ciangin, “Zawl gai om thei” kici hi. Zawl gaina pen zumhuai leh daihuai kisa lua ahih manin “zum leh sailii a si om kei” kici liang hi. Tua bang thu ah pasal a dingin pasal cinna leh mi batna leh cihtakna lahna bangin kimu a, etthawlna leh neu-etna kithuak sak hi. Numei a dingin ahih leh zum leh daina ciang tawh bei lo a, leitung a dingin lametna a bei hiphialin kingaihsun hi.

Hi bang a piang mihingte pen “Zawlta” “Lamlakta” (Illegitimate child) kici a, phung neilo nam neilo bangin kingaihsun hi. U leh nau sung leh pu tawh kizom dimdiam a nuntakna ah, tua bang lamlak tate a dingin panmun leh vakna om thei lo a, Mikang kumpi-in hong uk ciangun tua Tualthahna thu hong kham pan kipanin, zawl tate zong mihing dangte mah banga, hi leitungah nuntak khuan hong ngah pan uh hi. Hi bang gamtatna “mitu mita nawi tual sak” kici a, tangval lai ahih leh zong, zi dang a neih hangin nop sakpih tuan lo hi, ci-in ki ngaihsun hi.

Zo ngeina ah pasal tawh khang kisim hi a kicih ciangin, numei in ama pianpih beh min nusia in a pasal beh min kipua sak hi. Sum leh Sial tawh ki leisak a, pasal neihsa kisuah hi. Pasal thu mangin pasal deihna bangin nungta hi. Pasal in zong a zin a vakna khempeuh ah a zi vang tangin, mi zi ang mita ang simlo hi. Numei in midang pasal khat i ang sim leh, tua numei a kimaisak theilo khialhna hi a, pasal in a mak kul hi. Hi bang thu lo buang thudang hang tawh zi kima mawk lo hi.

Tua banga a siangtho nupa nuntakna pen Vaphual nupa nuntakzia tawh ki-etteh in kigenteh hi. Zite a kilawh ciangin, “Sen angkawi aw”, “Phualngo no aw” kici hi. Hi leitung bek hi loin, vantung dongah a kitul pih, a kivuaipih dingin zite sialkop kigawh hi. Ngeina ah numei ciah kisam kik hi. Tua banga a kisap kik zawh notloh ciangin, tua nupate a kikhen taktak bangin kingaihsun a, tua bang hun ciangin “Bang ici nawn diam, sialkop gosa nupa zong kikhen thei hi,” kici hi.

Tua paunak tawh kilungkim sak uh hi. Zo ngeina ah nupa tan’na ngeina a kip a kho in kinei hi. Nupa kikalah numei ahi zongin pasal ahi zongin midang ang a kawm leh tua pen “Zi palngulh, ta palngulh” kici a, a sia mahmah gamtatna khatin, kituat hi. “Zi palngulh, ta palngulhte in zi sun thei, ta sun thei” kici hi. Palngulh (Unfaithful) cihna ah, amahmah ahih kei leh a zi a tate khat si thei cihna ahi hi. Numei in a pasal a palngulh leh “mizi angsuan, mita angsuan” kici a, pasal thuak bang mah in thuak thei hi.

Nu leh pa khialhna tawh kisai-in Sukte, Sihzang, Kamhaute in a tuam ciatin ngeina nei uh hi. Tua ngeinate tawh kizui-in thu kikhen a, liau dan kipia uh hi. Tua upadite a them a neng dongin a kibat khitloh hangin, a bulpi khat a kibang om a tua in, Numei a khialh leh mo man kiciah sak kik lo hi. Numei khialhna hilo a, kimakna ahih leh mo man kiciah kiksak bek tham loin, lamtak kawsahte ban-ah luang man lawi giat dongin kiliau sak thei hi. Sukte ki-ukna ngeina ah tangval in nungak khat mawhpihin ta a neihpi leh tua ta pen a lak nop kei leh ahihkeh a tenpih nop kei leh a neu bel in Lawi li kila hi.

Mi neihsa tungah tatsia kei in:– Zokam ah “Duhgawh” leh “Deihgawh” cih kam kiton khawm, kammal nih i nei hi. “Duhgawh” pen nek theih dawn theih lam hi a, “Deihgawh” pen na zat nikteen puansilh lam tawh kisai ahi hi. Ahi zongin lungsim puakzia tawh kisai a kamzat pawl hi a, mi neihsa khat tawh kisai-in lungsim piakna ahi hi. A tomin: Enna lungsim neihna ahi hi. Mi neihsa enna lungsim pan a piangkhia gamtatna lakah, ahoih lam leh a sia lam nam nih tawh kilang khia hi.

Mi neihsa mi lamsa a duhgawh a deihgawhpa in, tua bangin a neih zawh a lam zawh nangin a hanciam pawl ki om a, ahih hangin, tua mi neih mi lamte a khawnkhongin a ngah nuam ki om hi. Tua lungsim pen guktakna tawh kizom hi. Tuhun kampau in, duhgawhna pen “Ze-etna” kici thei hi. Mi neihsa deihgawh manin Mawhna in koici bang dan pia cih kigen siang lo hi.

Tua bang ngeina tawh kisai Paunak a tuamtuam kinei thei hi. Gentehna: Akta duhgawl lawhciang khup” cih bang hi. Ciang sunga kipho antangte ak in amuh ciangin, lawplua aduhlua kisa in a dian saisai leh a ngong sikkha a, tua pan ciang kikhuplet in, amah zong tua ciang sungah awk pah hih tuak hi. Duhhawp luat hoihlo cihna ahi hi.

Lungsim duhgawhna leh deihgawhna pen duhhawpna tawh kizom hi. A diakdiakin leitang tawh kisai-in duhhawpna kilang thei bel hi. Lo veng tawh thukimna om lopi a, lo kigi ama thu tawh a khan simsim mi tampi om thei zel hi. Tua pen hoihlo gamtatna khat in, kingaisun hi. “Gi tungkek, gi phei kek” na ci uh hi. Hi gamtatna zong Muhmawhte deihloh gamtatna, gam tatsiatna khat in kingaihsun hi.

Ngeina upna ah duhgawhna pen gausuak a, tua gau in midang khat peuh gimna pia thei hi. Mi pawlkhatte agau hang diak a, mi vokno dawng mi ngano dawng hilhhelh khawng na sak thei hi, ci-in ki-um hi. Tua gau pawlkhatte Kau suak a, midangte gil na sak zo thei hi. Mi lakah khatguak annek “Gil nat huai” kici hi.

Paupha kei In: Khangluite lungsim muphuah taktak, amau kampau zatna pan kilang khia thei hi. Kammalte a kigawm ciangin, kampau suak hi. Tua kampau sungah vang (power) om hi, ci-in ki-um hi. Tua ahih manin kampau na kidawm mahmah uh hi. Mihing leh ganhing i kilamdangna “Pau” hi a, Ganhingte pau kici loin, ‘Ham’ kici hi. Tua pen a kam sung panun a pusuak khia aw a ging hibek hi. Tua aw gingin khiatna nei lo a, thuneihna zong omlo hi. Mihingte kampau in khiatna nei-in, thu tawh kizom hi.

Gal Ngam in, “Dawikungpu aw, na tutna suang leh na taw kimat hen” a cih ciangin kimat takpi a,”kikhenkik hen maw”, a cih ciangin kikhen kik pah hi, cih bangin, kampau na ki-um hi. Tua ahih manin, khat leh khat kihehsuah in, a kihamsiat uh ciangin, “Pulsih in, khansih in; na gilpi puakkham hen; sahangin hong pet hen; na ta senlai si hen;” cih bang paunam pawl kizang hi. A zaw deuhin Nu leh Pa hamsiatna pawl tak tun thei hi, ci-in ki um ahih manin, Nu leh Pa awkha kikihta bel hi.

Kampau leh kamzat tawh kisai-in Zo ngeina ah “Paupha” pen “Pausia” suak thei hi cih upna om a, kampau tawh kisai kamtant tampi na om hi. Gentehna in, “An hau ing; tu leh tau hau ing; ka cidam lau hi,” cih bang a kampau pawl pen a thuman a gen mah ahih tei hangin “Pausia” kici hi. Sabeng ding a kikuan ciangin, “Sa i mat a leh” cih kammalte kitang hi. Banghang hiam cih leh, tua bang kampau pawlpen thupha tawh kizom a khiatna nei kammal pawl hi a, a siangtho a zeksakte bangin kingaihsun hi.

Kampau nam khat leuleu in: ”Ka zi hong si leh” cih pawl zong pausia mah kici hi. Banghanghiam cih leh tua kampau pawl a tak tun khak ding kideih lo hi. Tua ahih manin, Zomte in tua bang kam a pau nop uh ciangin “Pausia lo in” cih tawh kipan masa hi. Nidang lai in Kalzang khuapi ah Suan Kai amaan laitakin “Tonkai” kici kidaak bu khat ngah a, tua huhau in Suan Kai zong hampha kisa mahmah hi.

Tua daak pen pasiante (gods) hong piak hi, ci-in zong um hi. Ki sialhpih huai mahmah neihna leh lamna thu khat ahih hangin, kisial ngam, loin, hi bangin na ci hi. “Gunli nuai zinmang langlam ciandal minthang, gual ii lamloh lam ing e, ci ngam lang e”. Tua bangin khangluite’n kiliansakna lim tawh kisialhna kam pawl a pau khak ding uh na lau uh in kidawm mahmah uh hi.

Mihingte khat leh khat kizakim lo hi. A lian omin a nau om hi. A hau om in, a zawng om hi. Namtom om in, namzau om hi. Tua ahih manin, mihingte amau hihna ciat tawh kizui-in kam kipau pah hi. Min a phuak uh ciangin tua amau hihna ciat thukte zangin min na phuak uh hi. Gentehna: “Mang” cih kammal pen mikim zat theih hilo a, milian ukpi leh hausaute bek in a zat uh ahi hi.

Tua bangin Khalkha khua ukpipa min n Kio Mang; Mualbem Sukte innpipa Mang Piang; Thuam Za Mang; Khuasak innpipa Ngo Mang; Kamhau Innpipa Pum Za Mng cih bangin kizang hi. Tua minmal mi mawkmawk khatin zang leh lianlua ahih manin, kilawm lo hi. Tua bangin “Minpha lua khu-lah thei,” kici hi.

Khangluite in lagui na kai thei uh a, tua ah a khan sungin hanhna a nopna, a zawhna leh a lelhhna cih pawlte gui kaih thei uh hi. Tua la gui ah pausia pauphate a lehkik dingin “ATHIPNA” ci-in thukhupna dawngkhat dawngnih tawh helh loin omlo uh hi. Tua tham loin Khangno in lagui kikai nuam kei, cih ngeina na om sak uh hi.

Hi bang a khanglui ngeinate i theih ciangin kisialhna kam, kiphatsakna leh kiliatsakna lungsim tawh kampau kamzatnate kideih loin, kizang lo hi, cih kician muh thei hi. Tua ahih manin Zomite in kiphatsakna kam sangin kiniamkhiatna kampau a zangzaw minam ihi hi. A nei pipi in ka nei kei, ci-in a pil pipi in zong ka pil kei, kici zaw hi. Kiliatsakna kam a zangte kineu et zaw a, kiniamkhiatna kam a paute ki thupi muh zaw hi.

Thang Ho leh Lian Do unau nihte tangthu ah, amau unau pen tagah hi a, a nu un itloh unaute ahi uh hi. A hehpih huai mahmah tagah unaute ahi uh hi. Tua bang a tagah unaute pasiante’n khoi in siam a, hong kitawhsuah in hong hau-in hong lian uh hi. Pute pate pen gal leh sa thu ah, mihing hehpih theihna lungsim a nei theilo bangin a bawl hun uh a om hangin, a taktakin lungsim kiniamkhiat tawh nungta minamte a na hi uh hi. Hi Pu le Pate hong luahsak ngeina limci hoih mahmah leh Zomite adingin a deihuai thu ahi hi. Sing Khaw Khai (Zomi leh Biakna Laibu)