Vondeih Kep Ding – 152 (Dimno’ Pa)

Vondeih Kep Ding – 152 (Dimno’ Pa)

Dear Tawngno, Tawngno aw, dam in laikhak hong gelh kik ing. Ka om muan in mi lawhcingte leh mi lawhcing lote thu ka lungngaih ciang ahang tampi tak om ding lak ah mi lawhcingte amau le amau kihehpih lo-in, a lawhcing lote ahih leh amau le amau kilim hehpih pha mahmah leh kilawm sa ing. Tua ei leh ei kihehpihna leh kihehpih lohna pen hong lawhcing sak leh hong lawhcing lo sak thute ah kihel dingin um ing.

Haksa ta leh i sep dingte ah mah le mah kihehpih lo-in sep teitei ding lunggulh huai sa ing. Ka tangthu sim ngei khat hong gen ning.

Titanic tembawpi tuahsia-in tui sungah a tum ding laitak in a kiim nai-ah Tembaw 3 om, ci hi.

Khat pen Sampson cih tembaw hi-in, Titanic omna pan tai 7 bek kigam latna ah om hi. Amau pen a simtham in Seals ngasate a beng hi-in, white flares a kilawn muta leh a kimat ding lau uh ahih manin a lehlam ah paisan zaw uh hi.

A nihna pen Californian tembaw hi-in, Titanic omna pan tai 14 kilam latna ah om hi. Tembaw Captain pa in Titanic tuahsiatna lakna white flares muna pi, amau Tembaw kiim teng ah tuikhal tamlua ahih manin bang mah ci kei lel in teh, khua zong zing lua peuhmah, khuavak ngak lel ni, ci-in khuavak ding ngak in lupsan hithiat hi.

A thumna pen Carpathia tembaw hi-in, Titanic omna pan tai 54 kilam latna ah om in, Titanic Tembawpi omna lam pai lo-in, saklam manawh in a pai laitak hi-a, ahi zongin Tembaw Captain pa’n Radio panin mitampite kahna leh tauna awging a zak ciang khuk din suk in thungen a, a hat penpen ding tha tawh tua signals a muhna lam, Titanic omna lam manawh in a Tembaw uh pai sak hi.

Carpathia Tembaw in mi 706 hon khia zo hi.

A khatna Tembaw in mitampi haksatna tuak ding thei gigu ta leh amau angsung ding bek thei-in, kua kua in bangbang tuak ta leh phamawh kei ci-in don lo-in awlmawh lo uh hi.

A nihna in Tembaw in amau leh amau kihehpih lo-in khua zing ta leh, a kiim a paam ah tuikhal tamta leh pai tantan leh zong mi tampi gumkhia zo ding hina pi, khua hun hoih kei lua, tuikhal tam lua, khua vot lai lau ci-in amau leh amau kihehpih in khuavak ding ngak in khawl kik uh hi.

Sampson leh Californian Tembaw te gamtat bangin gamta lo-in, Carpathia Tembaw gamtat bangin mikim a gamta hi leh hoih ding hiven mataw! Ih khua i tui, i gam i leitang nuam mah ding hiven!

Kong cihsa mah bangin haksa ta leh i gualzawh nadingin ei le ei i kihehpihna khiam zo leng, a gualzo mite kalsuan zia-in a kalsuan mi suak ding hi hang. Hong it, Na Pa