“Zomi vive mah hi” cih vai tawh kisai ~ Pu Thangboi

“Zomi vive mah hi” cih vai tawh kisai ~ Pu Thangboi

“ZCD pan lui tektek takei leh Zomi vive mah hi” cih pen tulai hong kilimgen simtham in apuatham en leng hi mahmah hi. Atuicik (its essence အနှစ်သာရ) en leng: Party khatpeuh ah ih lut nak leh tua party i thukhunte ih zuih akul hi. Tua thukhunte kantan in bangmah kisem theilo hi. Ih sep teitei leh ong kihawl khia ding hi.

“Kawlgam tualmi lak ah “Zomi” official in akiguan zawhna ding; Matpongtin tungah “Zomi” ngiat tawh minam min gelh zawhna ding; Zomi Self-administered Zone pan Zomi State dong ngahzawhna ding” cih thute koi party in paipih thei ding hiam cih etkul kasa hi.

Tua goal zuan a ong paipih ding ahih nak leh kuakua aizong thupi kasa hi. Aki gengen CM panmun ih ngahphial zong in kawl bulphuh party liante in tua ih mungtupte hong thapia mawk tam lah cizel ing. Amau’ sung ah ih lut nak leh a party policy uh akawi amam a ihzuih kulding cileng maw.

Bangbang aizong Party liante ah khat leh nih ih thuklut zawh a ih inntek zawh ding bel thupi veve sa ing. Aung San in Japante abelh laitak in Thein Phe Myint in mikangte nabel khinkhian in akisap teh kawm kawikawi theiziau uh in minam movement ah mazang tuam mahmah uh hi.

Athupipen ah; Koikoi ah ih om zong in minam movement mitsuan gige a ih om ding athupipen hi. Kawlgam kumpi nangawn ngahphial in minam movement ih mitsuan kei leh amawkna hilel hi.

Ih omnatek ah ih gam ih lei leh ih minam ih khaitoh zawhna ding in deihtak ih pan tek kul incei guai. God Bless You All. Yours, Mung Laan Thang, Tonzang, Zogam

MP vai

Gamsung gampua pan mipih tampi te’n MP dem ding in nong hanthotna hang un lungdam in angtang mahmah ing.

Kei’ Dinpih Thu

1. ZCD pen thupi asalua a adinpih kahi kei a, minam minpua party khat ahih man a adinpih tentan kahi hi

2. ZCD makai te’n “Lut in” ong cih leh ka lut ding a, “Lut kei in” ong cih leh kalut hetkei ding hi.
MP suahnopman a nasem kahi hetkei hi. MP demkhak kei leh khasia ding in pawltai ding cih khawng kei’ dan hilo hi.

3. ZCD hoihtak khuahun tawh kituak in hong kipuahpha a hong thahat ding bel deih mahmah ing.

4. Tutung MP kuanglui dingte vote piadingte’n kua deih uh hiam cih makai te’n bilngat huai sa ing.

5. Ahih theih liai leh MP term khat val kuamah in semdah lel leh hoihzaw in um ing. Mipi in alunggulh ngaungau lai leh lah thukhat hi. (Kei mahmah zong MP asem hileng term 1 val sepsawm het keng). Mual Ah Ih Suakkhawm Liailiai Ding Hi. God Bless Zogam !!! Mung Laan Thang, Tonzang, Zogam

Kigin Kholh Huai

Dr. Thet Thet Khaing’ makaih PPP party sungah Zomi khat na thuktum gawp in ka lungdam khinkhian ei.

Tu sansan a NLD khawng ah valut pat hang ki thuktumzo nawn hetlo ding hi. NLD ah ih inntek nop leh kawl galkap kumpi’ hunlai pek a ih thuklut ding hi. Tu’n bel ong ngai nawnkei lua unteh. Ih vekpi khuazang in ihlut zong in EC mun 1 zong ngahzo kei ni.

Gam leh lei khual takpi ih hih leh NLD khit teh kawlsung ah athahat ding lam-et om mahmah ahi PPP party sung khawng People’s Party sung khawng ah tubang thuklut kholh ding hi. Thalawh zek kul hiveh aw.

An kilui hun teh sikkeu vamat phei nop ziau tawh pianglo hiveh aw. Lozuat lokhawh hunlai pek pan napang leng ki inntek hiveh aw. Genkhialh a om leh ngaidam, Mung Laan Thang, Tonzang, Zogam

Zogam NLD News

Kawlpi ah NLD pan kuanglui nuam mi 28 phakhin ci. Tutung bel Zomite kihel kha nawnlo ding hih tuak. Zomi gimnam Siami nangawn zong kihel kha nawnlo aci om phial. Ei’ belhnop thei khang in lawmte’n hong ngai hetlo dan uh hi.

Tedim ah State MP mun ding bekbek a ut mi 7 phata ci. Tonzang ah bel tuni ciangciang a ut mi 12 phata ci.

Kazak khialh kei leh Tedim ah MP candidate siauhna form 1 ciang Ks. 100,000/ in zuak uh ci. Candidate angah leh Ks. 5,000,000/ piakbeh kullai ding ci. Tua bel NLD lam pan kazak hikei in aman leh amanloh bel confirm thei keng.

Tedim pan NLD tawh ngah leng CM (or) vuanzi ngahding a lam-en mahmah dan uh hi. Hehe Bless The Lord Oh My Land !!! Mung Laan Thang, Tonzang, Zogam