Zomi Thupuak Ciamnuih Correspondence Report

Zomi Thupuak Ciamnuih Correspondence Report

Sept. 16, 2016: Tu zingsang nai khat 1:00 pawlin ui ten mihing ten pawlpi phuanphuan, tua tawh hun sa nai lo un party thak phuan ding cih kigen ahih manin hong kidal ma-in en zong party thak phuan ni ci-in emergency meeting a neihna uh-ah a gen uh thu kiza pawl khat:

Ui 1na: I mawhna kimuthei lo napi mi’ mawhna bek mu thei in party phuan leng sawt kiding zo ken teh.

Ui 2na: Nautangte thugen man zaw leh zong um lo… “Kei makai hi’ng..kei gen a man pen hi,” ci nuam tek i hih manin khat leh khat kipetlum lel ni. Khawlsan ni.

Ui 3na: Ei leh ei ki-en loin makaite bek citlahna ding kigen nuam tek.. makai sawt ut ding om ken teh khawl mai ni.

Ui 4na: I vek in makai ut kim, a nautang ding om lo ahih teh piang thei kei.

Ui 5na::Ei mahmah pil kisa kim tek mi thugen lah ngai nuam lo i hih manin vai sah zaw ding hi.

Ui 6na: Democracy i deih hangin a neu pen a thumu thei ten thu hong gen leh thusim lo, a hoih hong gen kha phial zongin ngaih sak lo, a hai pen thu gen a hi zong ei ngaihsutna sangin a hoih zawk leh zong zui ni cih sawm loin ei thu bek thu sa i hih teh piang zo ken teh.

Ui 7na: Mi’ mawhna i muh theihna sangin ei leh ei i mawhna i kimuhtheih ding a, midangte thugen a lakhuaite i lak ding leh phuan ni.

Ui 8na: (Ui no khat) No khangham na cihcih hangun ko khangthak zaw ten ek mui nono ne zaw ka hih manun no sangin ciim zaw in, thu mu zaw ung. No ngaihsutna tawta lua ta.. Ko vaihawm hun ta hi.

Ui 9na: (Makai len khat) Ko makai ka hih manun hong sel se loin ka cih bangbang un gamta lel un. Kawlgam en ve ua Suu Kyi’ thu bekbek kimang hilo maw na thei uh hia pialpual geuh ! (ha lit khum).

Ui 10na: (Ui moi khat): Suu Kyi in president a ngah zawh loh man hi lel hi. Tua bang liang om thei sam kei, a tamzaw deihna tawh ki-uk ding hi zaw ta hi.

Ui 11na: (a naupang pen): Dai lel un… Mihingte bang pialpual kei ni. Pumkhat in om kinken ni. Tua ngia hamte na za uh hia? Hong ne nuamin a hamham uh hi ta hi. En pawl/party phuan leng hong pai lo ten zong a dang hong phuan lel ding uh hi. Ngia hon lakah tuute a kipumkhat lai teng ngia in ne zo lo ahih manin ei zong kipumkhat in om kinken lel ni.

Ui 12na: I duh i deih kibang kim, saguh duh, sa guh delh tek hi lel hang, kuavot tawh i meiphual mit tawh, ciah kik in ka pu’ sabuai nuai-ah saguh bawk zong zaw ning (ciah thuah).

Ui 13na: (a ham pen): Kei ka ham hangin ka lungsim hat lai mahmah hi. Note bitna ding ka deih manin thangah awk in, dum sungah tam veipi ka kia hi. Hong makaih thei ding leh hong gawmkhawm thei ding om nai lo ahih manun ken makai zaa a len hi lel ing. Mipi deihna tawh i kalsuan in, pawl dang phuan se loin a omsa pen mah ah dingkip ni. A hun hong tun ciangin i ngimna kong ngahpih ciangin ken pensen la-in a tamzaw deih pen in makai zaa hong len ding hi.

Lungduai lai un boihboihte aw. A ngakzo ten thupha ngah a, i lametna leh lungulhnate zan khat, ni khat thu in hong piang vat lo ding hi. Van a leng vasate lunggai dih un, khaici tuh lo napi un Topa’n vak ahih leh ei zong i deihna ngahna ding hong pia thei Pa’n a hun hong tun ciangin hong pia lel ding hi. Lungduai kisin un.

Ngaihsutna lah kibang thei lo, a mei phual uh lah mit ta…Makaipipa thugen mah hoih pen ci-in ciah ding hong kithawi uh a, a ciah dingun “TAKKHEH…KIPUMKHATNA MAH THUPI HI” ci-in ku ngaungau in ciah uh hi. Thang Khan Lian