US President thak leh akhutma thuthang te
USA President Joe Biden hong kah phet a zum kah masak ni-in thupiak 17 minkui pah a, tuate lakah gambup mipi nuntakna a kilamdangsak zo thu pawlkhat kihel hi.
1. Keystone XL Pipeline Project Dinkhawl Vai:
President Trump hun sungin leitung pian zawh datsi leh diesel a tawm man penpen dinmun ah kia suk hi, ci-in kiciamteh hi. Mailam hunsaupi ah zong USA pen namgimtui tawh kisai a buai lohna ding leh tam a mat luat lohna ding ngimna tawh Canada gam tawnin tai 1180 a sau pipeline tuizawlpi tawh nisimin pipa 830,000 bang a laklut theihna ding nasep a kisem laitak pen Pu Biden in dinkhawlsak hi.
President thak Joe Biden zum a kah phetin hih pipeline tawh namgim tui lakna nasep dinkhawl pah dingin thupia ahih manin President thak neih phet leh nasep neilo mipi tul tampi nasep nei lo om pah lian a, sum billion tampi a beinasa nasepna ah mawksup bek tham loin steel kizangte zong a mawkna suak hi, ci uh hi.
Hih gas lakna pipeline pen Environmentalist kici kim leh pam siat ding a lunghimawh mite kim leh pam siat ding a khualna uh hangin nakpi takin na khaktan ngei uh hi. Tu-in Trump nasep khempeuh phial a dinkhawlsak nuam Pu Biden in sum tampi bei laklawh khin hi mah ta leh dinkhawl dingin thupia ta ahi hi. Ahuampi in US Election hun pan kipan tuni ciang 30 cent kim datsi/diesel (Gas) man khang hi, ci uh hi.
2. Suakta Takin Nauphiat Theihna:
Nauphiatna tawh kisai-in President Trump in Lai Siangtho gen bangin nasem hi. President Joe Biden in ahih leh mihing suahtakna leh deihteel theihna bulphuh zaw ahih manin suakta tak nauphiat ziahziah ding bek tham loin a kisam bangin mipi tung pan siah kipia sumte tua nauphiatna dingin zang ziahziah thei ding, ci-in thukimna minkui khin hi.
Hih thu hangin President ni khat a sep kipat ni-in US gambup a om Catholic Bishop Kipawlna panin Pu Biden’ nasepna pen Pasian’ deihna tawh kituak lo, mihingte siatna khukpi sung hong tunpih ding, ci-in mawhpaih uh hi.
USA gamsung bekbek ah 1973 kum nauphiat theih ding kumpi in phalna a piak a kipanin 2018 kikal kum 45 sung tengin naungek 61.8 million (61,800,000) in sihna thuak uh hi, ciin American Life League te in gen uh hi. Leitungbup ah beisa kum 50 sungin nu gilsung a om naungek 1.5 billion (1,500,000,000) te in ni mu lo kha mu kha loin anu leh kumpite thukimna tawh siavuan siamahte’ thahna thuak uh hi, ci-in The Life Institute te in gen uh hi.
US gambup Catholic Bishop te lunghihmawh bangin naungek tampi in nu gil sung pan pian khuan ngah loin thahna a thuak ding uh dah huai mahmah takpi hi. A kaikhawm: Tedim Post Tanute
Comment piaknop aomleh...