Zomi te tenna tedim Khuapi in Topa ompihna a ngahna te

Zomi te tenna tedim Khuapi in Topa ompihna a ngahna te

THUMASA:

Ulehnau teng aw, Pasian in Ih Zogam Tedim khuapi pen nidang pekpanin
aompih mahmah na leh Zogam bup aitangin sathau anilhna te en khawm to
dih ni. Ih phawk pakteng agelh ihih manin akisam lai aomte itna tawh
behkhap khawm toto ni.

TOPA PASIAN OMPIHNA AKILATNATE:

1. Kum 1910 in Zomi te’ lai hongbawlsak ding Dr. Joseph Herbert Cope
te nupa hongtungin mission na hongsem uhhi.
2. Kum 1913 in CopeTopa in Zomi te adingin deihsakna tawh lai hongbawlsak hi.
3. Kum 1939 in Zomi Pasian nasem te hongpan tahdingin Nelson Topa te
nupa Tedim hongtung in kum 1947 pan 50 ciang Laisiangtho sang
hongpan khia uha, tulaitak a Zomi te sungah Sangmang te zom a ineih
izahtak Pasian nasem te hongpattah sak uhhi.Adam lai te: Rev.Dr.Kham
Khaw Thang; Rev.Dr.Go Za Kham ; Rev. Zam Khaw Lian leh adang zong
omlai dingin ka um hi.
4. Kum 1973 in Rev.Dr.Hau Lian Kham in Tedim khuapi in Pasian thu
sungah inuntak ding adeih luat manin Crusade nanei hi. Athulu:Topan’
hong maap lo ding hi.
5. Kum 2005 in Rev. David Go Lian Sum vaihawm siamna tawh Aw 3780 in
Halleluiah lapi kisa khawm a, alamdang mahmah thu hi in,itna tawh
nasepkhop nopna lungsim hong po khia tuam mahmah in kimu hi.
6. Kum 2010 in Cope Topa Tedim hongtun zawh kum 100 cin pawipi
Zomi bup huam in kibawl a, leitungbup Zomi te kipawlkhop theihna ding
ahi GZA lungsim hongpiang khia hi.
7. Kum 2013 in Zomi khangno khempeuh te ading geelna deuh tawh
Singapore Zomi Innkuan te vaihawmsiamna tungtawn in Zosuan Tuailai
khawmpi thupi takin kibawl a, khangnote lungsim sungah kipumkhatna
hong piang tuam mahmah hi
8. Kum 2014 March kha sungin anih veina Global Zomi Alliance(GZA)
pawipi kibawl a, thupi mahmah hi.Tedim khuapi thupha ngah nading thu
leh Tedim khuapi ah Taih inn thak atawmpen 500 aombaih nadingin
pulaakna leh thunget khopna kinei ziahziah hi.
9. Kum 2014 Dec kha sungin Leitungbup a Lasa minthang mahmah ahi
Planet Shakers te Rev.Go Za Nang vaihawmsiamna tawh hongpai thei in
lamet ngamloh thute hongpiang ta hi.
10. Kum 2014 Dec kha sung mah in Nelson topa tanu te Lungdamkohna
pawipi asimdingin Tedim khuapi ah Rev. Thawng Khan Cin vaihawm siamna
tawh hongpha thei leuleu ahih manin lungdamna kizom toto hi.
THUKHUPNA LEH LUNGGULHNA:

Nidangin Tedim khuapi ah kumpi ulian te bek akidawn ziahziah lam iza
ngei a, ahizongin tu- in Pasian sathaunilh te akidawn ziahziahna
izakleh imuh ciangin khuahun khat hong kilamdang mahmah ta hi cih
kimu thei a, hongbawl Pasian alungdam mahmah ding ahih manin igam
hong cidam mahmah ta dingin I um ciat hi.
Khangtangthu nilhna 7:14: A gam uh kadamsak ding Topan’ ci hi (I will
heal their land).Leitung ah natna lauhuai penpen taksa pumpi natna hi
masa lo in lungsim natna na hizaw den ahih manin ilungsim hongcidam
peuh leh itaksa zong hongdam pah lel ding hi.
Mailam ah Tedim khuapi bek hilo in, adang khuapi tuamtuam ah zong
hibang mah in Zomi bup etteh theihding thu hoih tuamtuam apian theih
nadingin innleh gam a om Zomi khempeuh in thungenin Topa maipha zong
ciat ni.

I phawk khak pakteng agelh ihi a, adang aphawkkha I om leh kilungdam
semsem ding hi.

Laigelh,

Rev.Pau Khan Khai.
Southern Baptist Theological Seminary.
Louisville, Kentucky,USA.
&
Pastor-Zomi Christian Church,Louisville
&
Pastor-Bethel Zomi Baptist Church,Kalaymyo.