Thucinh thutang (K)

Thucinh thutang (K)

• Khialh ding lau manin, kipat ngam lohna pen, guallelhna hi.

• Khialh khit ciangin kisikkik theihna hoih a, khialh ma-in kikep siamna hoih zaw lai hi.

• Khialhna tampite’ tungah pilna la-in, a kipuahpha thei mite gualzawh hun hong om ding hi.

• Kham leh ngun, neih leh lamh leh sum leh paiite sangin, itna thupi zaw ahih manin, tua bang aneite sangin hong it taktak dingte mah na zi/pasal dingin teel zaw in.

• Ki liatsakna pen, i niamkiat semsem nading ahi hi.

• Kiniamkhiatna in, a sang zaw-ah kahtohtohna hi.

• Khat leh khat ki-it ding lo ngal leii na ba kei un, cih Lai Siangtho in gen napi-in, eite in muhdahna lamah leiibat tampi inei hi.

• Kam khat bek i neih hangin, i kam’ tungtawnin nuntakna buppi sia thei-a, nuntakna buppi zong hoih thei ahih manin, i kam i kepsiam kul hi.

• Kamkaih thuah a kul sakol pen, a om hithiat theilo(a gilo) cihna ahih mah bangin, kamkaih thuah a kul Tapidaw pawlkhat ki om hi.

• Khut leh khe kim takin na neih manin, lam pai thei-in, na a sem thei na hi kei a, tua khut leh khete a taang’sak khat om hi zaw hi.

• Kal masa suan loin, gamlapi kitung thei lo hi.

• Kham theih guihtheih pawlkhatte pen zatsiam leeng cidamna hi, a ci pawlkhat om hi. Zangh kei leeng zon, kicina tuan khollo ding hi.

• Khua khat kithutuak leh gamkhat in zong phattuampih thei-a, khua khat buai leh gamkhat in zong buai lawh thei hi.

• Kipumkhatna in gualzawhna hi, i cih tei sam hangin, a hoih lamah i kipumkhat theih kei leh bel gualzawhna cingtaak kingah tuan hetlo ding hi.

• Khang tampi adingin sem in la, khangtawn adingin kiging khol den hi.

• Kei, cih lungsim bek i neih det leh mi tawh i kilem thei ngei kei ding hi.

• Ka kicin lohna ka thei-a, a kicing lo nuntakna sungah ama hoihna hong kicingsak den khat om cih ka tel hi.

• Ka mawhna leh ka khialhnate ka thei-a, kisikkik in Topa kiang ka zuat ciangin, ka mawh/khialhna khempeuh Topa’n hong maisak cih ka tel hi.

• Kha Siangtho’ makaihna leh lamlahna om loin, thuman lampi kizui zo lo ding hi.

• Kha Siangtho’ makaihna leh lamlahna a kisam dente i hi hi.

• Khan khat ading i lunghimawh zahin khangtawn ading i lunghimawh zawh loh khak ding lauhuai mahmah hi.

• Khan khat ading bek na cih leh khankhat khit ciang, khangtawn sihna tawh hong kizom dinga, khangtawn ading na khamuan’ nak leh khan khat nuntakna nungah khangtawn nuntakna tawh hong kizom ding hi.

Khazih sungah,
David Tuang