Zomi te Ngeina hoih ~ Pa Paugo Mang

Zomi te Ngeina hoih ~ Pa Paugo Mang

Zogam ah numei ten a pasal uh ih biak pasian zahdongin ngaihsun uh aa,zahtak in pibawl mahmah in ihngeina lak ah laisiangtho tawh a kituak mahmah gamtat zia khat a hihi. hih gamtat na hoih nono tam pi tak te pen laisiangtho sungah a na omsa vive a hihi. tanglai ih pupa ten laisiangtho a neih nai loh uh hangin ih ngei na te ih et kikkik ciangin laisiangtho thawh kilamdang lualo hi.

Hih bangin ngei na hoih leh khat leh khat ki upat zia te,min leh puam ah kivaipuak zia (min puahzia) te, Khuado leh sialsawm cih te bang pen lei tungah zomi bangdan ngeina nei om nai lo hi. hih ih ngeina te pen kepciang leh zahtak tak aa, zat ding pen Zomi a kua mapeuh in ih tavua a hih lam ih phawk den ding kisam mahmah hi.

Tuhun tak ciangin Zomi te muntuam gamtuam ah ih tun tak ciangin ihpau ih ngei na te thupi simlo in ih omkhak dingpen a dah huai mahmah khat hi. minam lian namdang telak khawngah a minam pau a theinawnlo te pen kipi muh khawllo zaw hi. tua a hih man in minam pausin na leh ngeina sanginn pen nitum nalam gam tungsa minam pi zawdeuh ten na nei hamtang uhhi. ih zogam ah zong etkak theihdingin ah Tedim khuapi bang en leng leitawhtan pen Mualtuk dong pen Zomi nam pau leh awsuah kibang lo vive ih hi aa, a hih hangin kampau leh leh ngeina te ah buaina omlo banah noptak in khuasa khawm thei ih hih man in a etteh huai mahmah Zogam khuapi Tedim pen etteh huai mahmah hi.

Nitum na lam ih cidiam Gamthum na tungsa Zomi ten ih omdan leh ih kalsuan dan te ihngaihsut ding tampi om kasa hi. banghang hiam? cih leh gamthum na mun pen mipil misiam tam mahmah na mun a hih na tawh kizui-in Zomi te a etteh huai gamtat luhek kapau te zangin a gina lo gamtat luhek kampau te zatlohding kisam mahmah hi. tua a hih man in lungduai na leh kipiak khiat zawhding ban ah kipumkhat nading( kithutuah na) pen ih lungsim tek ah vom masa photphot ding kisam hi.

Minam khat in a minam leh a gam a lei itna a neilo pen mi mangthang tawh a kibang a hihi. Zomi hi napi namdang mi ih kineih hangin va aak uhtong kineih mah tawh ki bang veve ding ih hihman in ih ngeina dan mah a hoih pen a hihi.

Tu hun ciangin leitung ah khangtak ten nalam dang leh a khel nono dan leh omzia te pimuh kha-in paakta uh aa, zangnuam thei mahmah uh hi. hih gamtat dan te pen ih zatzat leh a sawt na ciangin ih ngeina hongsuah ding pen a dah huai mahmah khat a hihi.

Ngeina pen a omsa, bawlkhawlh sa in pasian in hongkoihsak hilo in, ei ma gamtat luhek tungtawn a hong piangkhia a hihi minam khat in ngeina a neih loh a phamawh hi aa, tua ngeina ih cih in ih gamtat luhek na te pan in, ngeina hongpiang a hih lam ihphawk ding kisam mahmah hi tua a hih man in Zomi ten ih gamtat luhek a hoih leh ngeina hoih nei te ih hiding hi.

Tua a hih man in ih gamtat luhek na te ah Zomi ngeina dingin a gamta, a luhek ih hih lam phawkkawm sa in om tek ni. cih tukum 2016 kumsungin ih thalak nadingin leh ih ngaihsut ding deih na tawh kong suahsak hi-in na ngeihsut na tawh a kituak kei khak leh nacillum tawh na valhsak mai in…. lungdam…
By nasanggam uh…. Pa Paugo Mang Gualnam (Canada)