Zomi te leh Egypt ~ Tg. Kham Khual
Hun lui lai-a i pu i pate pen “ Leitung nuntakna khuasakna ah a ki-it leh a kikhualte uh hi a,kipawl khopna tual ( Tual Community) a thupisakte uh hi. Tanu tapate, beh le phung tawh thu a vaihawm khawm linglingte ahi uh hi. Ki-it kilem nading ngimna tawh Laisiangtho sunga thukham nam sawm mah bangin tual thukham nam giat ( Eight Commandment of Tual Community) a neite uh hi. Nopna dahna mun ah a kinuampih a kidahpihte uh hi.
Gal lelte leh galzote kilemkik theih nadingin Sutpi pomna, kongtual tui dawnna cih bangin ngeina hoihte na nei uh hi. Khutkhial bankhial ahi zongin khialhna khat peuhpeuh a neih uh ciangin sasi taakin thudamin a kilutte ahi uh hi. Thu ahoih theipen dinga a lemtuahte ahi uh hi.
Zomite lutang bengte (semihead hunters) ci in tangthu kante in na ciamteh uh hi. Zong hi mah ding hi. Gal kineih gal kisim ciangin kuamah kihehpih lo hi. Lai Siangtho sungah zong Amalekite minamte a vat tum dingin Pasian’ sawlna Saul Kumpipa in aman loh ciangin Pasian hehin Saul pen Israel kumpi dinga a koih kisik hi ci hi (1 Samuel 15:1-35). Ahi zongin a taktakin i pu i pate pen hehna tawh sangin itna tawh a thukkik namte hi. Tua ahih manin ‘Pa that tokhom guan’ cih ahi zongin ‘Ciimnuai a sa kibah Geeltui ah kithuk’ cih bangin itna bulphuh paunakte na nei uh hi.
Tu-a teng bek thamloh Zo ngeina sungah Pasian lim le mel a pua ngeina hoih tampitak omlai hi. Ahi zongin tua Pasian lim le mel pua ngeina hoihte a selcip dingin ngeina hoihlo mah na om hi.”
Tua ngeina hoihlote mah zong tamlo gen le, zunun sanunna, dawithoih aisanna, singzung suangzung biaknate, galmat-gallu mat, kau nei nam nei ci in ki dei danna ( vaite sungah khoih theihlo minam cih zah khat in- untouchable), bum le ai, phulakna le atuam tuam ,tu-a teng bek thamlo ahoih lo tampi ngeina le biakna Zomite in na nei hi.
A dah huai mahmah pen Pasian lim le mel a pua i ngeina hoihte i kep i khan sak ding hi napi in tua hilo zaw in Sangmangte hong puak Lungdamna thu ( Gospel) hang in i nuaisiahsa I nusiatsa ahi Pasian lim le mel a pua hetlo i ngeinate ah a kikkik lehbung in Zomite om mawk hi.
Zomite khuapi pawl khat ah dawi bia pawl (Satanic) om in khangno pawl khat zong kihel hi cih bang za in, ahih kei le nungak tangval zawl kisai a om ciang nute pate in tuate innkuan peuh mah kau nei nam nei nam hi a khanggui un luahsuk mawhna bang in kau a lauhsukte uh hi ci in deihsaklo in khangnote lungtang tamsak zong om hi.
Tua mah bang leuleu in ‘ka innveng nu hai vat’ mi’n dawi ai tawh bum le bawl uh hi cih bang zong ki za kawikawi mawk a, naupang sungah dawilut cih khong bang zong i za a, Nu le pate zu kham in om cih bang zong I za za mawk hi, sum le paai, neih le lam, go kituh na hang khong in gallu bengte, gallu mante I suak kik mawk uh hi. Khua khat le khua khat ki gal et in neih le lam kisut bang in ahau le ‘mi zat ding nei’ akici zaw te in gal hang makpa nei bang in a zawng a genthei teng ding ahong pai hamphatna teng tawh inn hoih pipi i lam hi (ngaihsutna khat: na en le uh cin tua bang mite a tu a tate uh a thupi a hampha lua tamlo hi).
Pasian in Thuhikikna alian giatna (Thuhilhkikna 8) ah Egypt gam ah na saltan na uh pan in hong honkhia Pasian na manghilh louh na ding un pilvang un ci hi. Zomite in dawi le kau biakna, khat le khat ki gim neih ki nam neih in ki deidanna, ki bum na, zunun sanunna sal pan in a honkhia Pasian manghilh in, manghilh bek thamlo in Egypt gam ah ciah kik uh aive maw kanaan gam nuam lut takpi man nailo in ci in ka dah mahmah hi. Tg. Kham Khual
Etkak:
- Dr. Pau Suan Kam gelh thului:’Zomi Ngeina Sunga om a kiselcip Pasian lim le meel’, Zomi leh Khristian Theology laibu pan ki la khia.
- Thawn, Langh Suan,ed. Zomi leh Khristian Theology. Kalaymyo, Myanmar: Zomi Association for Christian Communication, 2007
- Tedim Laisiangtho, Rev. Dr.Josheph Herbert Cope leh a zi Tedim a tun zawh kum za cin ciaptehna in a kikhen pen.
Comment piaknop aomleh...