Zomi te’ kitangsap Technical Education

Zomi te’ kitangsap Technical Education

Technical Education cih ciangin Science leh Mathematics subject pana
kisin pilna te hi zaw deuh hi.Tuabanah Management lam zong huam thei
lai ding hi.Siamna tuam deuh zong kici thei mai in teh. General line
sangin technical line pen haksa zaw tham ahihmanin eimite ki tawm lai
mah mah hi.Bang hang hiam cih leh Zomite zodawnah kiteengin laisinna
mun hoih leh laili zuat ding haksatna tampi om hi.Sum leh paai
haksatna bel i theih teksa hi mai.India gam north east lam khawngah
technical education lam institute tawm lai deuh hi. Technical
Education pen pilna tak tak ahi hi. Technical College hoih IIT, IIM,
AIIMS, NIT etc. te ah pilna sin theih nanga kithawi zia ding kal
masa(first step) pawlkhat gen dih ni:

IIT-JEE: Indian Institute of Technology Join Entrance Examination
cihna ahi hi.India gam technical College hoihte ah seat ngah nangin a
kitangsam khat ahi hi.Kumsim November kha ciangin Notice suaka, April
ka ciang Exam om hi.Physics,Chemistry leh Mathematics(PCM) a Mark
60%(55 for SC/ST) ten exam pia thei hi. Question pen objective type hi
in negative mark zong om hi. Kum smin seat awng 10,000 kiim om in mi
3-4lakhs kiim ten exam pia zel hi.ST candidate te adingin 7.5% seat
reservation kibawl hi.India gamah IIT 8 a omsa banah 2008 kumin 7
kibehlap hi.

AIEEE: All India Engineering Entrance Examination cihna ahi hi.Hih a
cingte National Institute of Technology(NIT) leh College hoih dangte
ah lut thei uh hi.NIT pen India gam adingin IIT zawmah a hoih pen hi.
Engineering ngeina banah Architecture lamah zong lut thei uh hi.Hih
exam pia thei dingin 10+2(PCM) mah kisam kik hi.Seat awng pen 20,000
kiim om in exam pia zong tam thei mah mah hi.2009 kum bangin exam pia
pen 10 lakhs kiim pha hi.Kumsim December kha in Notice suak a April
kha ciangin ki exam hi. Aizawl pan in zong exam ki pia thei ta
hi.Question pen Objective type hi in dawnna diklo te a mark uh ki
paihsak(negative marking) ding hi.

AIPMT: All India Pre Medical Test cihna hi in doctor sin dinga
kisakkholhna ahi hi.Exam piak theih nangin 10+2(PCB) ah 50% (40% for
ST) muh kuul hi.India gam College tuam tuama MBBS/BDS sin theihna ahi
hi.AIIMS ten bel hih sang lo in a tuam vilvel in Entrance Test neisak
uh hi.

CAT: Common Admission test cihna ahi hi.Graduate te adinga IIT,IIM
leh institute hoih dangte a luttheihna ahi hi.Kum simin November kha
ciangin Exam om den hi.

MAT: Management Aptitute Test cihna ahi hi.Tuhun ciang Degree neih bek
tawh mi lungkimzo nawn lo ahihmanin nasep hoih leh khasum tam ngah
theih na dinga ki-elna khat ahi hi.

Technical line lam a zui nuam te adingin tan 10(Matriculation) hoih
taka zawh ding thupi hi.Tan sawm pan in pilna sin dan stream thum
phato ta hi.Tua ah science a zuih theih na ding un a mark uh a san
kuul hi.Tan 12 (Science) ah zong Mark hoih taka muh touh lai ding
thupi hi.Bang hang hiam cih leh tua i gen Entrance Test tuam tuam te
ah minimum percentage mark ciangtan om hi.Technical College hoih te
ah a lut kha phawt te bel a nasep ding uh patauh kuul nawn lo hi.A
graduate khiat ma un Company tampi ten zawn(zawl) uh hi.A khasum uh
lah tam zaw mah lai hi.Zomi khangno hun hoih nei lai ten technical
pilna sin un; hong hanciam mah mah dih un!

Pau Tun Thang