Zomi te mailam kalsuan ziading holimna ah Sister Cing Khawm Niang thugen

Zomi te mailam kalsuan ziading holimna ah Sister Cing Khawm Niang thugen

May 12, 2020 Zomi te mailam kalsuan ziading Zoom Cloud Meeting tawh holimna ah Sister Cing Khawm Niang, West Yangon General Hospital thugenna! Tu ni pen

• Florence Nightingale 200th birthday
• International Nurses Day
• 2020 The Year of Nurses and Midwives ci in WHO in a ciapteh kum ahi hi.

Mother’s Day phawkna in numeite hun nong piakna sung uhah hih a tunga nite tawh kituak kha ahih manin nurse khat ka hihna tawh angtang in ka lungdam mahmah hi.

Covid-19 tawh kisai:

Hih tawh kisai a thupi pawlkhat hong gen nuam ing. Mihingte pumpi sungah Covid-19 virus a lut khit ciangin mi a tamzaw kicina pah lo hi. Pawlkhat pen ni 14 pan 27 ciang bang a ngei mah bangin cina lo uh hi. Tua khit ciangin signs and symtoms (cisa, bukkhuh, huih khamlo, awmbing, nak haksa, cihte) hong kilangkhia pan hi.

Tua ahih manin virus ngah ni a kipan cinat kipat hun sung kikal teng pen cidam danin i om hangin midang tungah i lawh theih hun hi phadeuh ahih manin i kidop mahmah ding ahi hi. Tua ahih manin khutsil ding, naktuam ding, inn ah om ding cihte thupi mahmah in i kidopsiam ding thupi hi. Mun khat peuhpeuh ah cisa tehte ahi a, volunteerte ahi zongin a kuama peuh kidopsiam ding thupi mahmah ding hi.

Cidamna tawh kisai:

2019 kumin Kawlgam ah zatopi 1,123 om hi. Nurse septheih nadingin mun (vacancy) 37,704 om a, tualak ah 20, 684 kikoih in, 17,021 awnglai hi. 2020 in midwives 23,615 in training zo uh hi.

Prof. Dr. Swe Win, University of Public Health, in a genna ah Kawlgam ah khuano vekpi gawm 64,000 val omin a gamla a om khuano a kumpi nasem midwives 12,000 om a, Public Health Superviser (2) mi 8,000, khuano a cidamna lam tawh kisai nasem 20,000 bang om ahih manin khuano thum ciangin ciangin cidamna lam nasem khat tawh kituak bek hi (3:1). Mi 1200 ciangin cidamna lam nasem khat tawh kituak bek hi (1200:1). Khuano ah mi 70% bang teeng uh hi ci hi.

U Aung Khin, Central Secretary of Myanmar Health Assistant Association (MHAA) in a genna ah khuano a cidamna center ah limtak in na a kisep theih nadingin Health Assistant 300, midwives 2,000, Public Health Superviser (2) 3,000, a thak guan beh kul ding hi ci hi. Tua bang mite om loin gam khat ah Basic Health Worker a kicin keileh tua gamah kum nih nuaisiah, kum nga nuaisiah leh naupai numeite sihna, a kilawhthei natnate (infectious desease) khang mahmah in a si tam mahmah hi.

Banghang hiam cihleh cidamna tawh kisai pilna kinei lo, bawltawm singkung lopa tawh kibawl ziauziau, lampi kizopna haksatnate hangin a hunlap in zato, clinic kitung manlo ahih manin sihhuai lopi in a si kitam mahmah hi ci hi. Tua ahih manin cidamna tawh kisai laibute simin i bat tantan kan ding thupi mahmah hi.

Prof. Dr. Daw Yin Mya (President, MNMA) in Feb. 25, 2019 ni a kibawl 54th Anniversary of Nurses and Midwives Conference in Dip. in Nursing (2018-2019) laisin kumin a kah nurse 8,000, midwives 2,000 om hi ci hi. Kumpi sunga lutsa nurse te a service uh kum thum khit ciangin off campus program kum 2, on campus program kum 1 kah thei ding a, B.N. Sc. kipia ding hi ci hi. Tu hun ciangin nurse pilna tawh MSc, PhD dong a ngah mi tampi omta hi. Gamdang sangte pana doctrorate degree a ngah mi nih, a kahlai mi 8; MSc a ngah mi 18, a kahlai mi 5 om hi ci in gen hi.

1000 beded ah Nursing Superintendent 2, Matron 3; 500 beded ah Nursing Superintendent khat, Matron khat; beded 200 ahih leh Matron khat, Sister 14 cihbang in mun kipia ahih manin hanciam huai hi.

Nidang in Dip. in Nursing kah ding kumsim in 1,800 bek kisam a, tu in kumsim in 3,690 dong kikhan hi ci in gen hi. Special course (9 month traning) Child, Dental, Ortho, Eye ENT, Mental, ICU cihte a kisinsak banah Cardiac, Endoscopy, Renal, Neonate leh Emergency cihte leh a dang special course tuamtuam a kisam bangbang in kha khat, kha thum, kha kua cih bangin kisinsak hi. Tua ahih manin ei aa dinga hoih pen, a kituak pen, mipite aa dinga kisam pen teel in i sin theih ding hong hanthawn nuam ing.

Tua ahih manin khuanonote ah a tunga kong lak sazian mah bangin cidamna tawh kisai kumpi nasem tawmlua mahmah ahih manin Nurse Aid, Community Health Worker a kipan a dang tuamtuamte bat tantan sin lehang emergency a thupiang natna khat peuhpeuh a hunlap in kidon kikem thei ding hi hang. Ka lungdam, Sister Cing Khawm Niang, West Yangon General Hospital/ Source: SuanTuang Siamnu