Zopau vai (Part 1) ~ Lang Khan Khai

Zopau vai (Part 1) ~ Lang Khan Khai

LST leh labu teina kampaute & Minam Picing Hihna Masuan Holimna – Tu laitakin U Kapno – Pu Kap Khen Pau in Teizang LST tei sawm hi cih thu kigen ngeingai hi. Hoih asa a om bangin hoih asa lo zong om hi.

Amah pen Zomite sung a kuama phal loh leh kuama theihnat loh, mipi linglawngsak thute asemkhia zel khat hi cileng kikhial lo ding hi. Asia apha sangin mipi lungphawng keh alinglawngsak ama nasep pawlkhat en leng –

1) Sr General Min Aung Hlaing – Chin Hero apiakna hangin mipi lingphawng a, galkapte tung ah mi khempeuh aheh laitakin hih bang ava piak mawk, bang ngaihsun ahiam ci-in amawhsak om a, ama dawnna ah Chinmite in phattuamna khatpeuh ingah khak leh cihna hi ci-in dawng hi. TEDIM – Zomi min tawh apiak ahi hi.

2) Chin state Minam Puangawm – Chin state khuapikhen 9 sung a minamneu tuamtuamte ngeina puan khempeuh gawmin puan nam khat suah a, hoih asa omin hoih asa het lo, kisam asa lo zong om hi. Amawhsak om a, ahi zongin Chin state kumpi ah vapia a, silh lia lian uhi.

3) Teizang LST vai

Ama nasepna thupi tampi om kha ding hi. Atom thei pen dingin hih nam 3 igen ding hi. TEIZANG LST tei ding akipat sawm ciangin – Zomi khenkham ding a kipan hi. Sizang LAT leh Zo LST hangin amaute gel tawh kithutuak thei nawn lo hi hang, kisam lo hi

• Teizang kampau ka hih hangin Teizang LST bel zang het kei ning
• Sizang LST, Zo LST a om leh Teizang LST hithei lel mah lo ding hiam?
• Pastor or LST sinna kician nei het lo khat in LST TEI MAKAI cih pen ahi ding mah ahitam aci zong om hi.
• LST TEI pen LST sang kah kul kei, Zolai itheih nak leh akitei thei hi aci bilbel zong om hi.

Dotna:

• Ei Pianpih Awkaih tawh LST tei pen ahi ding mah ahi hiam,
• Ih gam leh iminam in phattuampih zaw ding hiam?
• Or Minam sung buaina hizaw ding hiam?

Dawnna:

• Pianpih Awkaih tawh LST kitei thei lua hi. Awkaih nei mite ciaptehna zomg ahi hi.
  Gam leh minam cih pen nam khat bek hithei lo hi. Minam tampi, Pau tampi kigawm gam kumpi khat ahi hi. Ih gam leh iminam in aphattuam pih ding hiam cih tawh kisai ngaihsut phat kul mahmah ding hi.

Khatna

• Bible Society nasep khat khang ahih manin amau khaktan lo ding uhi. Minam tum, kampau tuam vilvel ahihnak leh mi 1000 apha zongin LST teisak ding tavuan inei a, mi khempeuh in ZEISU amuh ding kisam hi ci uhi.

Nihna

• Tua ahih leh, Pianpih Kampau tawh LST TEI pen kampau neite in zomg phattuampih ding hi. Gam leh minambup ahuam ding kampau ahih kei leh phattuampihna tampi om lo ding hi.

Tua ahih leh, koici bangin kilemtuah thei ding ihiam? Zomite sung ah Minam vai kalsuanna ah nam 2 om hi. Tua thu nih lak ah koi pen tawh ipai ding hiam?

1) Zomi Council

India ah KAMPAU kitheiteng amau Pianpih Kampau zui TRIBE Recognition tawh ZC ah kipawl uh a, Avekpi un ZOMI COUNCIL member hiciat uh a, Tribe President pen ZC ah Vice Chairman dinmun ah teel kulloin Vice Chairman hipah uhi.

Dotna- ZC in Painpih Pauzui Tribe kigawm ZOMI ihihna ah buaina koici bangin om hiam?
Zomi Council Tribe memberte – Paite, Vaiphei, Simte, Tedim-Chin, Kom, Gangte, Zo, Mangte .. cih bangin atuamin Tribe Council ( amau cihdan leh NAMBING) nei ciat uh a, Tribe president pen ZC Vice Chairman hipah hi.

Ahoihna – KAMPAU zui a kipawl hiziau ahih manin kipawlna ol hi. PAUTANG ah buaina om lo, ei kampau ciat zangin kithei lel hi.

Ahoihlohna – Tribe mimal atamte hamphatna hi a, adangte khasia thei veve hi. OR

2) Kawlgam Zomite in 2014 Census ah TRIBE bulphuh lo, MINAM PICING khat hinuam zaw ihih manin TRIBE beisak zaw leng cih GZA Khawmpi thukimna bangin Misimna ah 914 – ZOMI cih agelh Zomi alang sangin tamzaw ding hi ciin kigen hi.

Tua hileh Tribe tawh buaina avengsa hi ding hi cih muhna tawh hibangin minam neuneu a kikhen lo a, MINAM 1 ah kibopkhawmna thupi ngaihsut hi. Tribe code ah gelh leh CHIN minam suak ding ahih manin CHiN imin man lo izatzat sangin ZOMI mah kicipah leng lamzang zaw ni cih ngimna zong ahi hi.

Kawlgam Zomite sung ah Pianpih Kampau zui minam neuneute – Zo, Tedim, Dim, Guite, Vaiphei, Teizang, Saizang, Ngawn, Hualngo (Lusei, Mizo) …

Ahoihna – India Zomi Council nuai a KAMPAU tuamtuam kipawl a, ahun ciang a lah kisiatna omte leh mimal atamte thuthu ahihna kiam ding a, kilemna tamzaw ding hi.

Ahoihlohna – Pianpih Kampau beimang thei ding ahih manin Pianpih Kampau mah kem ni aci pawl om hi.

Atung a igelhte etkak theih ding a ka gualh ahi hi. Tua ahih main ZOMI sung ah kilemna tawh khantohna lam imanawh theih nadingin Thu NIH lak ah koi zangzaw ding ihiam?

1) NATION SYSTEM

• GZA 2014 thukimna bangin MISIMNA 2014 ah ZOMI cih igelhna ah Tribe tuamtuam om losak ding ahoihzaw ding hiam?
• TRIBE din kul lo, BEH nei khin ihih manin Kampau zui a kipawlna ah buaina tam theizaw hi cih amau muhna hi.

2) TRIBE SYSTEM:

• Zomi Council India kivaipuak bangin ZC nuai ah KAMPAU tuamtumte amau pu zui-in asan bang un Kawlgam Zomite in zong Pianpih KAMPAU zui a TRIBE dingin Zomi Council – Myanmar ah ikipawlzaw ding maw?
• Sizang leh Zo om khin ahih manin amau pau ciat abei loh nadingin adangte zong amau kampau zuiin kipawlna nei-in Zomi Council – India bangin ei zong ZOMI COUNCIL – MYANMAR ah idingzaw ding hiam?

Kikum dih ni. Anih tuakin ahoihna ahoihlohna om ciat hi. India leh Kawlgam zong ikivaipuak dan kibang leh nuam zaw thei ding hi. India ah Tedim – Chin akicite sung ah Teizang, Saizang, … atuamtuam om uh a, LST pen tu a itawi oen bek zang uhi. Tua alote in amau kampau ciat tawh nei ciat uhi. Sia Lang Khan Khai