Tedim kampau Zomite sungah Tumging leh la tawh madawkte ~ Rev. Go Za Nang

Tedim kampau Zomite sungah Tumging leh la tawh madawkte ~ Rev. Go Za Nang

Hih thului tawh kisai in ettehding laigelhsa bangmah omnaikhollo khading leh etkakding dingdang theituanlo ka hihmanin kei theihtanciang leh kei kihelna pawlpipan ka muhna ciangbekmah hong gelhtheiding ka hi hi. Tua ahihmanin tumging siam mahmah le a uuk mahmah mi pawlkhat zong hong ki nusia khathei ding hi. Lai gelhte’n telkhinlopi ahi ve maw ci a, nong telsiam dingun kong thuumnuam masa hi.

Neulai hun khawng in, Zo hun, radio ah ngai le hang- Chin program pan Zola hong pai ciangin, Lawki ngeina la kisa te kitam zaak deuh hi. A hun, a kum tawh kizui in kawlgam radio pan in, Zomi te music i ngaihciang in khantona tampi hong nei hi. Music siam leh lasa siam zong a kum a kum in hong tam semsem hi. Kawlgam lelvel bang aa mi tampi hong theihpih ding lasa siam, music siam kinei keei ta hi.

Nidang lai in cileng, kawlgam sung ah musik leh lasak siam lam a akidawk phadeuh te pen, Kawlmi te leh Karen mite vive hizaw pian hi. Tu hun ciang in, tainyinta mite lak pan hong tam semsem ta hi. Music van tuamtuam te taman theilua aa, music sang zong kineizo khol lo, music sya hoih zong zogam ah om kawikawi khol lo ahihna tawh, Zomite lasak leh music lam ikhanto paksai theihnang pen abaihlo thukhat hi.

Kawlpi, Tedim, Tonzang, Falam, Haka, Matupi etc. cihdan khuapi zawdeuh khempeuh ah music sang te neizo kawikawi leng deih huai peuhmh kasa hi. Amunmun pan hong patah ding om leh ih Zolia leh ih Zotaang te aa ding in mailam ah khantohna tampi hongpia thei ding hi.

Music in lungnopna hong pia hi. Music in ih khuak tampi khangtosak hi. Ih ngaihsutna hong puahpha hi. Itna zong hong khangsak thei hi. Music nam zong iteelsiam ding kisam kha ding hi. Musik lam aa a khuaktaai te pen, lai khuakzong taipah kici hi. Staff note akici lungtui siamte pen, a khuakpai mahmah ahihman in, laidang dang zong siam baih kici se hi.

Lasak siam icih, lasak ciang a aw a luang deuh te leuleu pen, apianpih ngiat tampi om aa Topa thupha piaktuam te hi ngiat hi. A sisan sung uh ah om khin hi. Aw hoih cih te a suan un zong pai thei deuh hi. Mi honkhat te leuleu a aw hoih khin in, puahding themcik akisam beh om leuleu hi.

CD or DVD music video te ilei ciang in, original mah lei leng, lungkim huai pen hi. Leitaak pen hi. Musician te lasa artist te zong thaapiakna lianpi khat hipah hi. Lasa minthang te pen, lakhuai bangzah khawngkhin cih tungtawn aa zong, ciaptehna, pahtawina kipia tanghtangh hi. USA khawng ah Gold, silver, diamont, platinum cihmah… original DVD — CD million tampi a khotciang minphatna kipia hi. Ei Zomi sung ah zong, tuadan mailam ah om thei leh hoih kasa hi. Original mah kilei tangtang ding thupi hi.

Kawlgam ah lasa minthan theihna ding in, Kawla mah siam kul hi. Leitung level ah lasa minthan theihna ding in, Mangla mah siam kul hi. Eipau tawh lasak maakngil ding, saklo ding cihna hi lo hi. Tu in, Lia Cing Lian Mung bang pen, Kawla leh Siam lua kisa, kawlte aw lian in sa thei aa, mangla leh siamlua kisa Mangkang lasa te sang a aw bang ngahzaw lai, siam zaw lai mawk a hihciang in, mangpau zanghna gam khempeuh te un deih ding hi pah lel hi. Tuhun ciang in, mangkam, mangpau pen leitung gam khempeuh phial in telta theita uh hi. Christian mangla bang peuhmah pen bel, ngaikim lel mai uh hi.

Mailam ciang, English gospel music a khuibit in hong suaksak le bang, mikang gam khempeuh ah kideih mang lel ding ahi hi. Sya David suum, mangla phuah – compose zong siam mahmah ahih ciangin, mangla khuikhat hong thoh beh lailai dih vevuak. Music tum te zong pau bang om vetlo in, siamkim gai hi. Video zaihna leh graphic bawlna te zong profesional te vive i sep ahihman in, quality sang mahmah hi. Zomite in, Lia Cing Lian Mung i lasakna khui pen, inn sim aa neih ngiatding, kep ngiatding in hoih him him hi.

La siam lai, mel hoih lai, apatah ding sya hoih mahmah nei lai, music sinna ding sang hoih te ah vocal training kah theilai cihte pen bel leitung aa Pasian kiangpan hamphatna tengtenga hom ngah cihnop huai phiat hi. A hihangin, American Idol aa a lasiam penpen te taangthu sim leng, a neutung aa kipat a hahkat mahmah te uh, mun tampi a kidemna khawng uh aa, a ki nialnial te uh zong hi thei hi. Music leh vocal training pen, nisim aa kisin ngekngek aa kum tampi sung a kisinsin ngiat uh hih tuak mawk hi.

Naakpitak in a nasepna uh te i a gah pen kum tampi khiteh a nethei uh hi pan uh hi. Zo Lia leh Zo Taang te zong, tua bang aa, Topa’n hong tawisang sak ahih teh, ei Zotate mimal mahmah in zong i tawisang pih thei ding kisam kasa hi. Mizote bangpen, lasa siam khempeuh thaapia aa pahtawi zo mawk uh hi. Tua mah bangin, lasiam tam semsem ompah uh hi.

Pastor khat in, nungak lasa siam khat ka teenpih hi. A kiteen khit teh, suun khat a zi ihmut suak lua mahmah aa, ihmu hi. Tua laitak in, a pasal in a zii kiang ah, tho in tho in, cih saisai aa, phongh saisai hi. A zi thoto in, bang ahia le nong phot, a phamawh om ahiam ci in, lungkham dot pian hi. A pasal in, ngaih aw, tua bang om kei, ahih hang – nang kong teenpih lai in, lasa siamlua nahihman in, kong teenpih ahi hi, na lasak zanuam, ngainuam lua ka hihman in na ihmut lai pipi hong phong kha mawk ingh na ci hi.

Tuhun ciang zong, lasakna aw bek bek ngai kha in, a nu le pa te kiang ah tua lasa nu la siamlua in, a mel ka muh nai lo hang, ka zi ding in hong vaihawmsak un, a cingeu ngam bang ki om hih tuah hi. Nidang lai in, lasiam mel kici se in, tua te pen a mel kipia khol lo te hi. Tu huntakciang in, lasiam te zong, a mel hong hoih sese a- amel hoih te mah zong, a lungsim hong hoih toto hi ve aw kici sese leuleu zen hi.

La khawng, music khawng pen Pasian phatna dingin a zangh siam theite mi hampha pen te hi. Topa in amah phat ding leh pahtawi ding in, mihingte hong bawl ahi hi.

Ipate khanglai hun in, Col. Khen Za Mung in, la tampi aphuahlam leh tumging lamah akivak lam kigen a, azawlla ngumngek phuahte lakah ”Liapaal ngaihno kalo zo diam?, Sinlai khuambang khosak.” cihte pawl, tua hunlai tangval te’n guitor tawh asak uh zawlla ka zak masak pawl hikhading hi. Tua banah galkap sung, band party lakah akihel tumginglam akiva mahmah eimi pawlkhat omtuaklai tham hi. Tedim khua sungah 1950-1960 sung pawlin tumging uuk mahmah pawlkhat om a, kha taan ciangkhawngin country style late hong kisa thei hi.

“Oh the lady” ci a, cowboy la, kilep dangdangin asathei pen Tedim pan U Mang Khan Suum, Sia Let Khan Hang leh U Thawng Za Suante kaneu theih mahmah pawl ahi hi. Tedim Khuapi sungah (Pa Phung Za Pau) Sia Thawng Khen Pau, Pa Mang Khan Suum te’n guitor nei kici a, kha tang khawngah vakpihtheizel uh hi. Tua hun lai guitor tum cihpen tuhun ate bangin chord nam tuamtuam tawh kitum khollo a, sharp cihkhat leh running tum cihbang khat nei uh in, tangsai gelgel in zaknop bialbial zawzen hi.

Hih tumging tawh kisai pen biakinn sungah kizang kholhetlo danin thei ing. Biakinn sungah kumkhat khatvei cihbangdanin singsong service kinei a, tua hunte leh concert tuamtuam aki neih ciangin, mipi muhin akitum, akiza hibek mai hi. Guitor tum pian peuhmah lah ahilo lamin ki gen, ki mupianmawk in, tu bang ka ngaihsutteh banghang aitam ci in, lamdang kasak simsim thukhat ahi hi. (Pa Nang Za Suan) Pa Zel Khaw Lian te pawl mendolin leh Jugalele khawng tumthei deuh uh a, guitor pen Pa En Khan Suan, (Pa Thang Khan Kap) te pawlin tum in, niangteh kuang hawm double bass in kisai tumging hong tumkhop pen zaknop kasak dan ka neu ciapteh thu mangmawh khat ahi hi.

1960 khitlam ciangin, leitung mahmah ah zong tumging lam khantohna lianpikhat om ahihlam music lam kanten gen uh hi. Pop singer Elvis Presley, Cliff Richard leh The Beatles group cihte pawl minthang mahmah hun hi a, amau late radio pan ngai in, kisa kik ahi hi. Pa Cin Khen Mang (USA) (Pa Thang Khan Kap) (Pa Zen Za Dal) te pawl guitor tumthei uh a, ko khangnote hong pantahte uh ahi hi. BBS Zo hun ah la kisa thei a, la bang khum le hang aduty tawh kizui in sum bang hong pia zawzen uh hi. Tedim mi lakpan Pa Cin Khen Mang Leh Pa Gin Heh Lian te pawl lakhum masa pen uh ahi hi. Tua zom ah Sia Gin Hang, (Pa Theu Mang Za Suan), (Pa En Lam Cin), Dr. Kham Go Mang (Singapore), Nu Niing Khaw Hau(USA), Nu Ciin Khawm Cing, Nu Ngai Khan Dim cihte pawlin la khum zomto uh hi.

Tedim gamsung guitor tumte lakpan, nidang tumdan le tu hun a chord tuamtuam tawh tum masa penpen mi pawlte lakah “En Lam Cin” minthang masa pending hi. Amau hun lai in, a guitor tum le lasak ngai dingin, Lamka lampan isanggam khangno pawlkhat bang hong pai ngeizawzen uh hi. A innkuan phialmawk un, tumging siam uh a, anu le apate na ngawnin uuk uh hi. Amau inn sungpan mandolin, Benjo, Jugalele, double bass leh guitor ki nak tum mahmah a, Tedim khangno atamzawte kipattahna munkhat ahi hi.

Lam Cin makaih na tawh Myomah Turiya group ci in phuankhia uh a, tua hun laitak nasia kisa mahmah hi. Ama hong khanciangin Zogambupah zong tumginglam kinakzat mahmahhun hita hi. Amah tawh akithuah phadiak, atum khoppihpen (Pa Zen Za Dal), Pa Kam Za Mung cihte pawl ahi hi. Adang group tuam (Pa Thang En Mang @ Peter Thangneu) Pau Do Mang leh Am Paute zong amau munah atum siampawlin aki gen ahi uh hi.

Hih hunlai khawngin studio la kikhum cihbang omnai hetlo ahihmanin Mangla pen radio pan kila in, ala mal pen gamdang penfriend te khak khawngpan kingaha, Mangla bekbek kisa ahi hi. Mangla siam mahmahin Zen Dal (Pa Zen Za Dal) Pa Gin Khaw Thawn, Pa Kai Za Tuang, Pa Aam Pau, Lian Bawi (Rev. Gin Za Lian), Rev. Thang Khawm Pau (Tedim gam EBC GS), (Pa Sing Za Mang), (Pa Theu Mang Za Suan), Pa Ngin Hang (USA) te pawl minthang uh hi. Bang hangin hihte minthang cithei ka hiam cih leh tu mahmah na ngawnin lasa sak le hang la dawng 30 thamlo lotngahin lasa theilai zen uh hi. Tedim khangno, numei pasal kimphial in, Mang zawlla ki naksak mahmah hun sung ahi hi.

Kawlpi lampan Pa Pum Za Dal in group khat nei nong a, music van leiding vaihawmhawm leizo mahmahlo zawngkisa lua uh hiam, agroup min uhpen “The Poor” cih pahphot uh hi. Amau hun lai in, stage show khat peuh aom ciang Pum Za Dal te loin, thupi zolo zahin, minthang mahmah uh hi. Ama tumging group sungah hong nusiasa Hla Shwe (Rev. Ngul Khan Pau) (Zam Cin Hau) le Mung Tawng te pawl tawh tumkhawm uh hi.

Tu ni dong a drummerpa uh Mung Tawng bang Pasian thu lah umin, Yangon khuapi sung, zan lasaknate ah Mangla luite sa in nuntak kivakna in nei hi. Hih hun lai lasate pen Kawlte in Mangla pan alak uh late kisa kik himawklo in ah, original Mangla pan kisa ngiat ahihmanin tua hunlai Kawl gam lasiam minthangte sangin niamzaw tuanlo uh hi. Asiam zawkna uh tampi omlai theimai dingin ka ummawh hi.

1970 kiim pawl akipan khangthak tumgingsiam pawl hong khangto leuleu a, Tedim khua sung bangah (Thang Suan Lian), Pau Za Mung, Gin Do Lian (FGA), Pa Gin Khan Suan (Japan), Thangneu (Cin Suan Thang), Sua Mang (Pau Suan Mang) le Rev. Zam Za Thang (Grace assistant Pastor) te asiam in, ki genpawl ahi uh hi. Tua hun sung pawlmah in Kawlpi lamah SalaiM cihponghel khat phuan uha, Tedim kampau khangno pawlkhat mah makaihna hi in min nei mawhlo uh hi.

Tedim khuasungah kha khanlawhna lianpi hongtun’ akipan, tumging siam pentengin, pianthakna hong ngah uha, biakna lamah tumging zatding hong kipatna zong hipah mai hi. (Rev. Gin Za Lian) le (Rev. Hau Lian Kham) te u nau zong, la leh music siam mahmah uh ahihmanin, hih tumging siamteng pen music mah tawh pantah tosuak uh hi. 1976 kum electric guitor akimin kinei khina, mipi huppeuhmah khin hi. EBC pan AG aki pai ciangin, EBC ah acianlai khangnote music vanneihteng ki nusiat hi.

1977 kumin nitakkhat la kisinna ah, “Lawm aw hong zui in tua gamah” akisa ziahziah pen, khangno pawlkhatin side drumkia khat hong satkeei le drum neihding lungsim hong guanpah a, lasintengin upna kamciam kapiaktek uh le Kyats. tulkhat valdeuh ki ngahpah hi. Sum kisam laiteng pawlpi ah leitawi in, Aizawl ah drum ki lei a, electric guitor pen, U Myochit in hong piak Yangon pan ki lei hi in, drum tawh ki tumkhawm a, nuam kisapha mahmah hi. Ka nung etkikciangin Tedim gamah instrument kim tawh Pasian biakna pen music band dingmasa penzong hipahmai hi.

Lead (Cin Suan Thang), Bass ( Pau Suan Mang), Rythem Zam Za Thang (Tun Grace Assit. Pastor), Drum Pau Thawn hi a, lasa pen (Pa En Lam Cin) (Rev.Gin Za Lian), Pa Kham Suan Mung, Rev. Tuan Suan Thang (Phualpi AG Church senior pastor) Rev. En Khan Mang(BAG Asst. Pastor), Dr.(Chand.) Suan Za Lian (USA), Rev. Dr. Chin Do Kham (USA), Nu Ngai Khan Dim, Nu Ngai Za Dim, Niang Boih, Nu Vung Khawm Cing, Nu Hau Khek (Japan) te pawl in sa uh hi. Hih tumging groupteng leh lasa tengbel amau hunlai in, Zo gamah aminthangpen teng hipah mai hi.

1980 kum ciangin Tedim kam tawh la kikhum masa le akizuak khia masa pen Agape No. (1) ahi hi. Tuni ciang, Agape No. 9 na ciang kikhumkhinta hi. 1981 kum leuleu ciangin TSKhai makaihna tawh “Sihna Kigo Zo ” hong khuma, tu nidong zomto hi. 1983 kum ciangin, Rev. Tun Za Kap makai in atanute (dorcas team) Cingsante unauteng tawh Yangon hong paisuk uha, lakhum uh hi. Hihteng bang Zomite adingin la kikhum masa pente mah ahi hi. Tu ni ciangin la kikhum le ahoih tampi omta a, lung damhuai mahmah kasa hi.

Tua banah music lampan nidang hunte tawh ietciangin khantohna lianpi kimuthei hi.Piano,keyboard atumthei omnailo phialmawka, Tedim Tuiphum biakinnpi bangah Siamah Vung kawi leh (Sia Gin Khaw Thawng) te bekin organ tawmtawm tumthei bek uh hi. Ahizongin tuni ciangin, Tedim khua BAG pawlpi bekbekpan tumging siam phamahmah Sia Zam Lian Kham, Sia Tual Lian Tuang (S.Korea), David Go Lian Suum (Grace senior pastor), Thawn Sian Thang (Malaysia), Go Sian Tuang (USA), Thang Sian Mung (Grace Music School), Zam Khan Mung (Shalom EBC, Ygn.), Kham Sian Khai (Mr. Bean), Tuan Thawn Mung (Desert Rose) tepawl; hong khangkhia uhhi. Sakollam Thangpi cihte pawl zong minthang uh a, Lazy Club Cinpi, Cin Khan Pum, Zen Liante banah Kawlpi dungsuk bangah Falcon bandte tumging lamah minthang uh a, siam phamahmah ta lel uh hi.

Lasakna lamsangah TSKhai, Lengtong Pau No, Lengtong Kam Khen, VC Mang, Cing Sante unauteng khawng, amaukhan hunlai, lasa siam minthangpawl ahi uh hi. Biakna lam bangah Hunters’ Quartet te, Fishers’ Quartet te, Family Gospel singer te, ETC trio cihte pawlzong Igam, Iminam hong khai mahmah uh hi. Steven Vocal bandte bang England gam leh Malaysia, Singapore leh Kawl gamkikhopna lianpite ah lasa zel uh a, hun tawh kizui banah kihual leh sak siam mahmah group khat hi in, ih minam adingin angtanhuai mahmah hi. Fishers’ Quartete te bang Kawl gamsung muntuamtuam leh Singapore, Malaysia, India dongah Pasian phatin azinkawikawi ngei uh hi.

ECT trio te zong India gamsung Nagalandteng, Bombay, Culcutta, Shilong, Gohati leh Kawlgam mun tuamtuamah lasa in vak kawikawi uh hi. Tu hun aminthang deuhin, Sangpi, Thawn Kham, Zamnute zong gamdang eimite omna tengah lasa in pai kawikawi ngei uh hi. JK Kam, TL. Mungbawi, David Kham, Sia Tuan Khan Mung cihtepawl zong lasakna tawh min kitheikhia pawl ahi uh hi. Theihkhit zawhloh phialdingin tumging kiva leh lasathei, aphuakthei tampi ihompen Kha khan’lawhna iigah hi a, Pasian tung lungdam koh huai mahmah hi..

Ei Zomite hun tomno sungin mite tawh kikim zaha, asathei, atumthei ihom mawkpen angtan huai mahmah kasa hi. Kawl gamah tu laitak dinmunsangin, imadawk zawktheih nadingin, music Sang zong omta ahihmanin kahding, sindingzong thupi hi. Tua banah atunglamah tumging asiammasa, amadawk iute, inu, ipate, iet ciangin Kawlla salozaw uh a, Mangla pan lasa vivete ahi uh hi. I sanggam Kawlte in zong alasakte uh Mangla panmah ateikhiat uh, hongsa uha, eizong asakpihkik ihilel ngel hi. Gentehna in: Zaw Pine in “The Eagles” late copy in hongsak teh ngaihsa in, aminthangsak keei eiteng mah ihi hi.

Ei Zomi khangnote in zong la isak veve Kawlte lasak sate isakkik sese sangin, ei zong original Mangla pan sapahlel lehang, talen neite minthang topahlel ding hilo ahiam?. Kawlla isak ciangin, asate bangin nasak theihding baihlo a, na demzo ngeikeiding hi. A Mangla in khiangin, sa lecin Kawl vocalist te tawh akikim na hi a, asiam zawzaw minthangding hipah hi. Tu hun in MP3, 4, 5 acihmah, VCD, DVD cihmah deih bangbangin ngahthei ihih manin, original Manglate lei in,ngai ding, ciing ding, kisinding kong hanthawn nuam mahmah hi. Tua banah, biakna la asate ihi a, I lai zonglah Manglai tawh akibang ahihmanin khangno khempeuh in Mangla nakpi in hongsa le uhcin, tumginglam khantohna lianpikhat omthei khadingin um ka hihmanin hih lai tawh kong hanthawn hi.

Khai guaite hong kum unla, article hoih leh reference ding thu hoih tampi om kha ding ahih manin hong atbeh unla gawm khawmkham ni in, ih koihcingding thu hoihkhat hongsuak ding hi. Mi luite tu hun khangthakte na lungkimna bangun thu hong at un, music tawh kisai thului tampi ki kaikhawm ding hi.

Suakta takin gen ngamloh cih bang omlo in hong gen dih un, thu ciamteh nuam ihhihman hi ei. Gtn: Steven Vocal band a Steven Mang bang apa Ngai Za Thang pen Tedim TBA Booader a om lai in guitor bel kuamah azahtaklo zah in siam hi. Aizongin Tedim ah khangnote tawh mapan khop ding haksa lai hi. (Tua pen Tedim dan ci phot ni)

Tu a ka gawm keeite zong ki gawm, kizom kei kha mah in ten mai lam ah ahoih asauh nading zuun toto ni ee.

Tua khit ciang TS Khai, Lengtong Kam Khen, Cing San te unau, ciang ciangpen keitheih ban hi a, tua khit a, VCMang, TL Muangbawi, JKkam te akipan tu hun Idolte no theih bangbang hong genun. Hih ih lai pen ni khatteh kideih ding in uming. Rev. Go Za Nang (Agape Ministries Center)