Dimno’ Nu laikhak – 6
Kongit Dim,
Khua hun hong ki khel in phalbi hong tun ciang kong helcil lai, kong lencil lai hun te ka phawkpha deuh aa, ka lung zuangin kong it kong ngaihna khang semsem! Tu laitak bang ci leng ei kiang ah zong kha taang nop cisan laitak in teh maw… kha taang nuai ah i kholh khop hun, i len khop hun te phawk sam ing ei, Dim! Tua hun te la kik thei hi leng khat vei…la kik nuam sam ing maw….
“ Khuado pawi, nuamtak mang thei ung” ci-a nong lai khak pen tu nungkal nipi khuavak ( Monday ) ni-in na ngah ingh. Tun Cope Centennial Jubilee ding tawh buai khengkhang nu teh maw, ko zong hitak ah bawl sawm dan hi ven!
Ko kiang ah bel bangmah gen ding thulamdang lua om kei. Ahi zongin Zonet sung ah i mipih te alim buai san mahmah tawh ki bang sa ing. “ Mizo ah kigawm mai diam,” “ Thukham leh hehpihna, Sunday leh Sabbath, Voksa nekna tawh van tung gam aki tan lawh diam, Jesu leh thukham…etc” “ Zomi te’ tulpi ding hi ung- aci ci pawl khat” leh “ Tedim Labu Thu- ciin labu lui le labu thak vai … etc cih thului’ teng tawh i mipih mipil te buai keei in, lai vive tawh ki paupih ngeingai uh. Pawl khat te bangin nawngkaai sa lua hiding hi ven, Zonet Pu kiang bang ah, “ hih ci bang a lai gina ngei lo akhah khah te zonet member panin la khai le cin” ci-in ngen liang veh aw! Pawl khat te leuleu in lai ki gelh te kuppih peuhmah lo-in, lai agelh te peuh va ko gawp pong mawk! Kei bangin bel lamdang sa peuhmah kai ve!
Hih bang a kong gen ciang kua tengin labu lui hoih sa, kua tengin a thak hoih sa, kua mi te’n ko zomi te’ tulpi ding hi ung ci…kua teng in Sunday deih in.. kua teng in Sabbath deih…mizo ah kua teng ki gawm nuam… kua teng in zomi sih pih ngam… a kua in lai kigelh te kup pih lo-a, agelh te peuh ko gawpgawp zaw sop…kua in mi sutuah nang’ lai gelh… cih teng na kan in, hong ci hi lo hiing. I mipil mi siam, i muan i suan te tu laitak a buai thu hong thei sak hi bek ing.
Kei bangin bel i mipil te leh i makai te in hih thu teng a ki kup ban ah tu laitak a Zogam ah pawi lian mahmah hong kham sak a, zolai hong bawl sak J.H. Cope i nuntak zia, a tangthu, a suan akhak te’ thu bang hong ki gelh khai kik lai tam ci-in, nisim in Zonet ah a ngakngak hi vengh.
Zang Tongdam, Tongsan , Laizom, Zolai Zunna, Zomka, Thupha Puak, Zangkong Awging, Tahan Awging leh Zonu Tongluan cih te limtak na kan in la, J.H.Cope tawh kisai lai hong suak leh hong khak pah in maw. Ken zong Zonet pan hong ki gelh leh hong khak pah di hing. Ka ihmut zong suak ta! Mangpha!!!
Atawng tung a hongphawk,
Utuang
By,
Paukap
5 November 2010
Comment piaknop aomleh...