Zomi sungah akum tampen kua ahitam?

Zomi sungah akum tampen kua ahitam?

Tulaitak Zomi sungah hong nuntakpihlai akum tampen kua ahidiam cih theihnop huai bilbel kasa hi. 2011 July khasung in Sia Zambawi te’ Pi Niang Don in Yangon pan hongnusia cih ih zaciatding hi. Pi Niang Don pen kum 102 dong ongnuntakpih ahih manin, atu atate hampha kasa mahmah hi. Zomi sungahzong akumtam penpenpawl hipahding in ka lamen hi.

2011 kum May khasung mahin Guinness World Records te’n leitungah akumtam atekpenpen atelkhiat uhzong kum 114 bek ahihi. Guinness World Record ngah piteknu leh Sia Zambawi te pi pen kum 12 khawngbek kikhai mawk hi. Zomi te khanto cidam in Guinness World Records khawngah ihlutzawhding zong lunggulhhuai mahmah a, aki lutzo dekdekphialzong ahihi.

Guinness World Records in ciaptehna apiaknu pen Maria Gomes Valentim kici pitek khat hi a, Brazil gampan ahihi. Tua piteknu banghangin kumtampi nungtahiam cih akikan ciangin neklehdawn kidawm mahmah ahihman (Healthy Diet) cihi. Zingsangtung Breakfast dingin mohlum (Bread Roll) tekhat leh Coffee meh a, tuakhitciang singah Fruit ne hi. Khatveivei cidam nadingin lenggahzu (Wine) haikhat khawng dawnkiau theizel cihi. Maria Gomes Valentim pen May 18, 2011 ni-in kum 114 leh ni 313 cinglian a, leitungah kumtampen anungta in Guinness World Records te’n ciaptehna apia ahihi.

Maria Gomes Valentim in ta khatbek nei a, pasal ahihi. Tu 4 nei-in, tusawn 7 leh tusawnsawn 5 nei hi. Amah pen July 09, 1896 kumin Brazil gam Minas Gerais State sung aom Carangola khuapan asuak hi a, asuah akipan tuakhua mahah tengsuak hi. 1913 kumin Joao Valentim tawh kiteng a, 1946 kumin apasa in nusia hi.

Khanto cidam cihpen Pasian ongpiak ihcihsam hangin ei mimal kidopzawhna tawhzong akisai naciang omveve tham hi. Ih Zogam ah nektheih taaktheih bangmah omlolua lawmlawm ahih manin, gamdang atung masasa nekledawn kidawmzolo tampi ki om hi. Zogam ah mithau tepen cidamin kituak himah tase leh gamdang ah mithau khawngpen kipi etlualo banah neklehdawn kidawmzolo ci’n kineu et zawtheilai hi.

Zomi sungahzong gamdang atunciang muhbangbang nepah phangphang ahih manin ani ani in apuak hanhanzong omthei hi. Neklehdawn pen nekding dawndingmah hi a, ahihhang kidawm in nekding dawnding ahihi. Mailam ciangin Zomi sungah cidamna tawh kisai thulehla tampi ihki kupkhop theihding lunggulh mahmah hang. Cidamna tawh kisai thului Article nongpuak nopleh [email protected] ah kipuakthei den hi. ZD Sawltak