Zomi State ~ Cin Lian Khai

Zomi State ~ Cin Lian Khai

Amasa in Zomi State vai ihgen ciang, tulaitak Kawlgam Kiukna leh Upadi(2008) Constitution sung ah kingah theilo hi. Ahizongin, ih Gam pen kikhellam ki manawh mahmah a, ni khat niteh, Federalism kizangh ding hi. Hih in Kum 60 val ih delh kiukna ahihi. Tua ahihman in, Zomi State ngah zawh nang kithawi kholni a ci ih hihi.

Mualmi Thautawite Dinmun

Tulaitak, Mualmi Thautawite khenthum in ih suah ding a, 2015 October 15 ni a, NCA signed teng khenkhat, tuani a signed lo ten Northern Alliance khen nih. Tulaitak NCA leh Northern Alliance a kihello mualmi thautawi Kuki, Zomi, Naga, Akha etc khen thum cih theih hi. Hih group thum in Federal kiukna a deih mang uh hi.

Party

Electoral Politics ah zong, 2010-15 Galkap party USDP in hong zawh hang, mipi lungsim leh hun hong kikhek in, 2015 kiteelteh democracy adeih party lamten mun hong la ta hi. Hunte kikhelkhel ta hi.

CSOs/ NGOs/ INGOs, CBOs

Ih Gam ah CSOs/NGOs/INGOs, CBOs lamten mun hong la ta mahmah uh hi. Fedaral tawh kisai thulu tuamtuamte mipi hilh ziahziah ta uh hi. Federal tawh kisai misiamte Gamdang pan sam in, mipi leh kumpi uliante hilh ziahziah uh hi. Politics Sanginn zong hong khang semsem hi. Ih Gam pen damdam a, a mel a kilaihlaihta ahihi.

Fiscal Federalism

Atawm in Zomi State ngah leng, bangci khantoh ding ci a lung himawh om hi. Ahizongin Federal nuntak zia leh paizia en lengh, State khat pen ei Zomiten a deih huai mahmah hi. Ih veng Mizoten 1986 pan State hong ngah uh ciang, khangto hanhan uh hi. Tua State pen Sisan tawh a lei uh hi. Fiscal Federalism hang a hihi. State Goverment leh Union Government tawn khawm diamdiam cihna hi.

States 7 & Divisions 7

States leh Divions 7 bek tawh ih Gam dingkip dending cihbang om tuanlo hi. Shan State sung a thau tawite enleng, Gentehna Taang(Paluang) ten Shan hikei ungh, Self-Administered Zone(SAZ) sung ah om un, hong pai ding kiukna sung ah State khat ah ading sawm uh hi. Amau pen ei pawl bang a Shan State sung ah aom uh hang, Shan a hihloh lam uh kitel mahmah uh hi. Ei Zomite zong Chin State sung ah ih om hangin Chin ih hihloh lam kitel mahmah hihangh. Tuabang in Minam tampi in State kidelh ciat hi.

Kithawita

Zomi State ngah zawh nang Roadmap leh Zomi Galkap khat neihzawh nang list kibawl khin in, mipi tungah Consultation ki paipai ta hi. ZRO Eastern Command in Zomi State map draft na bawl khin uh hi. Operation khong bawl nuam mahmah ta uh hi. Mipi lam pan lah financial support tawm mahmah lai hi. Ih galkapte zong khasum pia zo nailo uh hi. Van kisap zong tampi nei lai uh hi. Roadmap dan a kalsuan zawh na ding un, sum pen a kisam pen hong suak hi.

Haksatna

Kawlgam lam ah zong propaganda bawl in na vakvak uh hi.Sum pen anna in donglo uh a, huhna ngen zaw uh hi. Kawlgam lam pen muhna kibanglo Zomi vei lua mihau tam nailo hi. Tedim hihangh, Chin hihangh a cipawl tam lai hi.

Zomi Movement Ih Cihcih Buangin

Zomite pen Minam khat in ih ding nang Movement ih neih veve, Zomi State ih ngah nang hanciam huailua hi. Chin State sung ah ih omlai teng Hakha pan budget a kihawm lai teng, mitawh liangko kikim ding hamsa mahmah ding hi. Tulaitak Self Administered Zone ngahte in Kawlgam ah Federal hong kingah teh State a deih uh hi. Taang, Pa O, Wah, Naga, Tailai , Dawei etc, thau tawi un, State Consitution Draft bang nei ciat uh hi. Tua ahih man in ei zong pankhop huai mahmah hi. Hih pen Zomi Movement ahi hi.

Kawlgam Politics zong transition Period ahihi. Tua hong kikhel ciang ei Zomite zong kithawi khin leng, State ngah thei ding hihangh, kigingsa a ih om zawh gige ding thupi ding hi.

Pepszo = Pay Every penny to save Zogam/Zomi

Lungdam
Cin Lian Khai (Zogamkhaino)