Zomi nungak Rossy Zomi
Kalsim phial a kum 4 sung tawntung atawm pen khatvei ta internet pan hita leh phone sungpan hita leh thulela ka kikuppih, innthu gamthu hong genpih a minam leh ngeinate kepcin a huaizia kitel taka hong hilhden ahi ka lawmnu Rose Zomi pen amel ka muh khak nailoh hangin kei tawh akigual nungak melhoih khat ahih ding ka ummawh hi. Amah tawh mel kimu ding cia ka kiciam ni uh hong tunkal ding ngaklah in Calendar sunga nilehkha kigelhte ballpen tuivom tawh ka kuikui a, ka kuihzah ka sim leh 235 nacing ta mawk hi.
Tua hunlai in keizong sangkah lai khat mah ka hihi. Lamdang ka sak thu khat pen sang ka kahlai sangin sang kaman khit ciangin laisim ka ukzaw a, ka hanciam zaw hi. Omna ding hong kipiakna inndeineu sungah zingsang leh nitak laisim in ka tuden hi. Ahizongin lai kisim den zolo hi.
Thadah hun leh lawp loh deuh hun ciangin inn vengte Cyber Cafe sungah saikem nungaknu aliim kineih in ka Gmail sunga lawmnu tawh lai ka kikhakte uleh ka ki Chat na te khawng uh sim kikkik in, thuhkik dingte ka thukkik a tuabang peuh tawh naikhat sung bang ka tu hi. Ciah ding ciangin sum neih laitak ahileh pia in, neih kei lelah kisik valval cihbang om tuan sam lo hi. Nungak lawm neih nuam napi ih theih loh kalin a lawmte kiangah hong bangci genkik ding hiam cih bel a ngaihsut ngamhuai lo thu khat hi sa ingh.
Ka lawmnu Rose Zomi tawh ka kimuh ni ding uh hong nai semsem ta a, Final Exam zong kalkhat bekin ong hal lai hi. Ahizong in nisim ka Mailbox et ka pelh ngei tuan kei hi. Na ka sak mahmah leh hong ihmusak thei lo thukhat pen ka lawmnu Rose Zomi kiangpan laikhak ka ngah nawn kei a, phone tawh hong ho nawn lo in message khat zong hong khak nawn lo hi.
Tuakum pen sang kaman kum ahih manin lai hoihtak ka sim ding hong deihsak hinteh cih tawh ka ki hehnem hi. Ahizongin ka lungnuam thei tuan lo a, ka phone hong gun simin ka lawmnu Rose Z ahi kha tam ciin ka enden hi. Zingsang ka thawh ciangin ” Gudmoning….love RZ” akici SMS ka ngah tam ciin thu zong ngen masa lo in ka phone ka check masa den hi.
Zan ka lup ding simin zong tuabang mah! Rose Z kiangpan thu bangmah ka zak loh zawh khakhat hong cing ta a, ka Exam zong ka man ta hi. Ciahna ding Bus Ticket ka lei khit ciangin ka lawmnu tenna Shillong khua lam zuanin ka ciah hi. “Na ciah ciangin ka tenna Shillong ah zankhat hong taam inla ko inn hong tung in maw. Ka innkuanpihte tawh kithei le ucin hong deihsak ingh. Bus khawlmun ah ka nau tawh hong dawn ding hing.
Ka pa pen Shillong khua a khang khia leh sangman ahihna tawh kizuiin a tengsuak bek hi a, a suahna pen Zogam mah hi. Zogam leh Zomite avei, a it mahmah khat a hihi. ” ciin hong laikhak nawnung penah hong gen hi. Hih laikhak ka printout a, ka sumbawm sungah ama foto tawh koih khawm in ka lunglen hunciang ka sim pahpah hi. Bus tungah hi laikhak mah hum tinten kawmin ka zanhak hi.
5am hong sat ciangin Shillong khuanawl a Blue Hills bus stationpi ka tung uh hi. Ka suitcase tuahkhia in bus tungpan ka kumsuk a, lamnawl a Kala te coffee zuak ka leisak khit ciangin tu kawmin ka dawn hithit hi. Minute 10 khit khawng ciangin keilam zuana hong pai nungak acingo, thacing henhuan, Jeanpant teng khedap tulsang bulh khat ka mu hi. Ka gei hong tun ciangin ” Excuse me, are u Zo Khan Khual Zomi?” ciin hong dong hi.
Tua nungaknu pen a paudan panin mangkam siam mahmah khat ahihna leh a sangkahna pen kumpi sanga khasum bek lamen syate khutnuai pan a khangkhia a hihloh lam kitel pah hi. Ahizong mi hizah lakah kei hong thei pen Zomi mah hi ding cih ka tel pah hi. “Hi! Himah ing ei. Na nau e Rose?” ka cih kawmin a khut taklam ka len pah hi. Maitai taka ” Na u aci nuam hizaw nicia” hong cih khit ciangin hong dawnna Car sungah lut in amau innlam ka zuan pah uh hi.
Rose Zomi ii nulepa ten gate ah nong na dawntuah uh a, ahizongin ka lawm Rose Zomi ka mu nai kei hi. Innsung ka lut uciangin lengla room a sabuai tungah ” Zomi na hileh Zopau in pau ni maw” cih lianpi in na kigelh hi. Ka lawmnu koiah om hiam ka cih ding lah kilawm sa lo a ka om dide laitak in apa in hong theisiam pah hiding hiven “Nancy hih ih lawmpa na u omna ah va paipih ve.” Kisil siang khit ciangin kithawi in Rose Zomi omna Nongrim Hills lam ka manawh phei pah uh hi.
Rose Zomi tawh a kimu ding hita ka hihmanin lawp lua kisa in ka ling sim keuhkeuh zawzen hi. Nailang khit ciangin Gate pi maiah Nancy in a car khawlsak a ka tuak uh hi. Gate tunga lai kisuang ka sim leh ka lawpna teng hong bei pah a, ka khuasikmul bang hong tho pah zangzang hi. Kongcingte khatin Gate pi ong hawn ciangin huang sungah ka lut uh a ka muh noploh teng ka va mu hi.
Nancy tawh kiho vet lo in ka kizui pheiphei uh a, etlawm taka akizem leh a kikhamphei suangpek kang tunga Marble suangpek vom kiuhkeuh kitungto maingat in ka ding khawm uh hi. Tua marble suangpek tungah hibang in lai ba kigelh hi. ” May the soul of our beloved Rossy Zomi rest in peace. Dt. 5.7.1956.” A nuaiah Nancy tawh mel kibang nungak maitai hiuhiau foto khat na kibelh hi. Rose Zomi cia ka sapsap ka lawmnu pen Rossy Zomi na hizaw gige hi.
Ka geia ding Nancy ka et phei leh ama hong et tawh kituak a, a kihehnem ding ka om kei uh hi. Tawmvei tuabanga ka dinkhop khit uciangin ka thungkuah sunga Diary lakhia in a sungah hibangin lai khat ka gelh hi. “Every move I make, every step I take, every single day and everytime I pray I will be missing u…” Ka gennop thu pen ei pauin “Ka gamtatna leh ka kalsuanna khempeuhah, thu ka nget sim in, tu leh a tawntung in nang kong mangngilh ngei kei hi…” Tua laidal pen Marble suangpek tungah ka phah khit teh kongcingpa kiangpan Rose paksan khat leiin tua tawh koih khomin ka nusia hi.
Ka ciahna lam tawntungah hibang thu ka ngaihsun hi. Gamdang bek ahi lo minam dangte lakah a khangkhia, Zomi hihna zumpih lo a anuntak pih, Zo ngeina akan velvel, Zopau ei Zogam a omte sangin zong a siamzaw phial, namdang mipil misiam mihoih hizah lakah Zomi bekmah a lunggulh ka lawm Rossy Zomi pen ka pakta mahmah a, kumsawt hong nungta in Zomi ading angim leh sawmna hong kuppihte hong tangtun zen leh maw…. pammaih si cia maw Rose Zomi. Numei na hihang in Zomi na hihna kiphawk a na minam taisan a sawmlo Rose Zomi aw PAMMAIH zen sicia maw! Nang tawh a kibang, nang lungsim bang hong neihpih Zomi numei hong piangkik zen tam aw ciin ka kap kheh kha damdam mawk hi. Zomi Quavadis
Comment piaknop aomleh...