Zomi Namvai Politics leh Kalsuanna (lunggulh tampite lak ah khat)

Zomi Namvai Politics leh Kalsuanna (lunggulh tampite lak ah khat)

Ei Zomite lak ah Minam vai thu khatpeuh kigen leh comment pia nuam leh mawhna khialhna leizon, cunning politician pawlkhatte’ sawltak kitam bek a, Minambup vai lunggulhna leh ngaihsutna tawh thu a gen (comment pia hilo), minambup huam a thu gengen, a awngawng pen tam hetlo hi.

Zomite’n politics uuklo hiam cileng lah hi samlo hi. Uuk lua kisa makai ut, kidem, tungnun’ kituh bel genzawh ding hilo zel hi.

• – Beh sung ah beh upa kituh.
• – Veng ah inn 10 lutang ( ဆယ္အိမ္ေခါင္း ) kituh – ngah kei leh lehtat hilai.
• – Khua ah hausa kituh
• – Pawlpi ah upa kituh ( ngah kei leh pawl tai hilai )
• – Pulpit ah sia kituh ( demlah leh pawlpi thak phuan, vaithak phuang )
• – Association ah panmun kituh ( biakna sia vive hilai )
• – Convention ah ( biakna siapi vive )
• – Kipawlna kici khempeuh ah – khasum, thaman ngah lah hi peuhmah lo, makai kitel bang ciang vote guliang bang om hihtuak zawzen lailai.

Ahih hang tua i politics te-in “Hausa leh Beh, group or society neu khat” kheng om mahmah lo. Tuapen a taktak in politics cihding level hi samlo hi.

Nambup vai, gambup vai taktak ciang “politics leh politician” kici thei pan, simtak pan ding hi.

Tua nangawn nam nih omlai a ..

1) Namvai, Gamvai siiksan a mimal metna, angsung lam-etna tawh Nam leh Gam paulap politics hi a, tuabang mite’ ngimna pen gualzo ah munngah ding leh tua mun pan ankuang lui ding hilel hi.

2) Namvai, Gamvai siiksan a mun ngah ding, tua mun pan Nam leh Gam ading nalian sem ding cih hi a, tuabang mite in tua panmun ( political post ) zang in ankuang luilo uh hi.

1) leh 2) pen kel luzang a pom kelki mah abang litlet ahi hi. Kivalak mahmah leh paulap, siiksan kibang napi ngim le tup, geel leh sep ki-lehngat/ ki-kelki litlet hi.

Zomite lak ah hihtak a i gen, a simtak politics and/or politician bel tawm mahmah hi. Tua tawmno khat a om sunsun beek, ki-thutuak ding bel ci hetkeng, thu kiza, thu kikum thei zel beek hileh maw.. lunggulh huai sa ing.

A simtat khakhate leh a lehkawi velvalte sang a huathuai leh a zumhuai zaw a om diam… kacih hun om zeuhzeuh. Mipi in awlmawh thei in, hak kilkel a amuh gige ding, a tel sitset ding lunggulh huai. Pau Khat Suan