Zomi Nam Ni (President Pu Soa Shwe Thaike vs. President Pu Tein Sein)

ZOMI NAMNI i cih pen pen Kawlgam suahtakna ngahzawh President
masapen ahih Pu Soa Shwe Thaike Falam hong pailaitak tawh kituak in
Khamtung Suahtak Vaihawm Pawlpi(KSVP)makai in Zogambup Mipi Deihna
Democracy tawh kalsuanta ding cih mipi thukhensatni Feb. 20,1948 ni
ahihi. Kumtampi MINAM NI (National Day)min tawh kibawltheihloh hun
ommah leh tu-in MINAM NI (National Day) in kibawl kikthei bekthamlo,
Khalkha ah kibawl a 67 veina Zomi Namni Feb. 20, 2015 ni in
Kawlgambup Democracy ngahkik zawh President masa pen Pu Thein Sein
hong muaka Zogam (Chin State) a dingin bang kilamdanna hong om ding
cih kitheilo hi.

Bangthu om?
Mangkang kumpi in Kawlgam alakzawh kum 8 khit ciangin Zogam lazo pan
uh hi. Mangkang kumpi khutnuai ah Zomite Hausa – Ukpi – Vuandok –
Mangpi – Menzi ci’n a dawldawl in hong uk uh hi. Zogam ah Ukpi pen
Zomite mah hipah in thuneihna sang mahmah ahih man in hausa upa zong
mau deihdeih koihthei in siahtung siahphei kai uh hi. Namkhat in gen
lehang Mangkang kumpi khutnuai ah Zomite ei le ei aki-uk asuakta
gamkhat in ki-om a, Zo ngeina zialetong leh pauleham tawh Zogam ah
Zomite mah in vaihawm thei uh hi. England kumpi in amau uksawn gamteng
suahtakna pia in ukpi ngeina beisak uh ahih manin amau khutnuai a
om siahkai Ukpi leh hausate tungah compensation (zawzi) pia uh hi.
Zomite zong Mangkang kumpi khutnuai ah Ukpi ngeina tawh a kituam uk
gamkhat i hihi. Kawlgam tawh belpawl suahtakna i ngahkhop khit ciang
Ukpi ngeina hi (Chin Hill Regulation Acts) zangnawnlo in mipi deihna
(Democracy)tawh kalsuanta ding cih thu khensatni Feb. 20 ni ZOMI
NAMMI kici ahi hi.

Ukpite koi pan
Zogam Mangkang kumpi hongla zota a kicih pen tua hunlai in Zogam a
ukpi (kumpi) innpipa omna(kings palace) Tonzang khuapi mangkangte in
hong sim uha, Pu Hau Cin Khup, Pu Gin Za Thang leh a dangte manin
Yangon a puaksuk uh a kipan Zomite namdangte ukna nuai ah atung i
hita hi. Tawlkhat khit ciangin Mangkang kumpi in amau khutnuai ah
Zomite Zomi(Innpi)te mah hong uksak kik uha tua pen Ukpite kici hi.

Demo-carcy maw Demo-crisis
I pu i pate in Pu Aung San tawh Pinlong thukimna zui in Mangkang kumpi
khutsung pan in Belpawl suahtakna(Union of Myanmar) Jan. 4, 1948 in na
lakhawm uha, Feb. 20, 1948 in Zomite in Ukpi ngeinabeisak in Democracy
tawh kawlsuan ding thukimna a bawlzawh kum 67 a cingta ahi hi. Hih kum
67 hun leh zuleva bang gammual vakvai in i om i cih hunsung Mangkang
kumpi ma leh Mangkang kumpi khutnuai a i om hun sungah Zomite
Political dinmun koici zaw cih i ngaihsut theih ding thupi hi. Feb.
20, 1948 ni in Zomite Demo-cracy (Gr. demokratia, demos “people”and
kratos “rule,” rule by the (simple) people”) “Mipi deihna tawh
kalsuanna” ding i cih kimlai, Zomite Demo-crisis “Mipi buaina
haksatna tawh kalsuanna” i suah hi. Mangkang kumpi ma leh Mangkang
kumpi hun sungah i pu i pate-in tu kum 67 hunsung sangin namvai
gamvai ah dinmun na sangzaw pek uha, Zomi hihna tawh thuneih
vaihawmna a kilawmtan khat nanei uh bekthamlo England kumpi nangawn a
huhzo(Piantit paite) dinmun ah na om uh hi. Ei hih kum 67 hun sung i
dinmun ahih leh Zomi Vaphual tangsa Va-ak i suah a, i pau i lai, i
ngeina leh i zia i tong nagawn mansuah in ui bangin muinam omna
peuhpeuh ah i tai koikoi hi.

Kawlgam suahtak ngahzawh amasa pen President Pu Soa Shwe Thaike hong
pailai tak tawh kituak in Zomite kithukim a Feb. 20. 1948 i bawl
Democracy “mipi deihna zui a kalsuanna” i cihin tu dinmun hong tun
hi. Tukum 67 veina Zomi namni in Kawlgam Democracy tawh i kalsuan
kikzawh amasa pen President Pu Thein Sein in Zogam hong phakik a
Zomite maban ah bang thupi om ding cih i theinai kei hi.

De-centralization
Kawlgam Democracy tawh i kalsuan kikzawh amasa President Pu Thein Sein
kumpi leh Kawlgam Democracy maban ah De-centralization ci in Kumpi
Central thuneihna kiam a Tualmite thuneihna khansakna hunah Zomite
in zong i pu i pate cihtak hansanna leh dinmun kician khat a
neihzawhnate uh pawk in philbang zangbang in kikhenthanglo a,
khutkhat tawi khekhat khai bangin i kalsuan siam leh Eizong I pu i
pate mah bangin gual tawh tanbang kim ding hi hang.

( ZYA Weekly News, Lom 5 na, Hawm 8na, Feb.20,2015 ni ah Editorial a
ka-at hong hawmsawn hing ei)

Sia Pauno
Kalay