Zomi leh Zogam – 3

Zomi leh Zogam – 3

Zomi Akici Nuamlote Zomite in “Pa” cilo ding:

Zomi-Chin pen akibangin sangsiam ciat hileng Zomi min tawh tangthu kician ineih bangin eite ciaptehna ahilo, midangte ciaptehna ah Chinmin tawh zong tangthu tampi inei hi. Ei minamte min taktak Zomi hi acite in ZBC pen sauveipi hu taleh Chin deihte in kumsim nawkden ahih manin 1995 khuasak leh 2013 Carson (Kawlpi) ah Zomi leh Chin deihte kikhensiangna hun tung hi. Hih manzaw icihna lam ah kihei kihi ta hi. Tua hi-a, Zomite Pa (father) dingpen Chin tawh mehkoplo a, Zomi ihi hi aci setsette bek Zomite Pa hita ding hi. Banghangin Rev. Dr. Cin Do Kham, Dr. Vum Son, Sitni Cin Sian Thang leh adang pawlkhat pen “Zomite Pa” (Father of Zomi) kici thei hiam icih ciangin laigelhna leh thugenna ah Zomi ihi hi aci tangtangte hi a , Sia Do Kham bang Teizong kampau hinapi amau innsung ah Teizongpau azang phial zongin Zomite mai ah Zopau tawh thu gen setset hi. Tua lote inbel Eipau tawh laigelh thugen leh Zomi cinapi Kawllai leh Manglai tawh Chin (csif;vlrsdK;rsm;) cise uhi. 2013 masiah Chin leh Zomi zatna aman zongin 2014 nungsiah ei pau tawh Zomi ahih leh, Kawlpau leh Mangpau tawh igen igelh ciangin zong Zomi (Zo people, ZdkrD;vlrsdK;rsm;) ici ding hi.

2. Zo leh Zomi:

Ataktakin Zomite ipu Pu Zo suante ihih manin ipupi min Pu Zo (Zo ) ibulphuh ding hi a, Zo leh Mi tawh ibaui ding hilo hi. Sangam Zote kibulsak innteek salua hikei leng, Zo bulphuhin Zopau, Zolai, Zongeina, Zozu, Zolei, Zogam, Zonam, Zokhi, Zomi cih izat hi a, Zomipau, Zomilai, Zomingeina, Zomizu, Zomilei, Zomigam, Zominam cih kizang ngeilo hinapi, khangno makai pawlkhat in zang uh a, ngaihsut huai kasa hi. Zomi (Zo) ihih leh Zoham ding cipah seloin Zopau zang ni cithei leng, ivekpiin Zo leh Zomi ikibang dinga, innteek leh abul deuh om tuankei leh minam sung nuam ding hi. Zoham pen Zo(Zote) akiciteng zat hi a, Zopau penTedim ah Ukpi Hang Khual leh Kam Hau hun a pau kigawm Zo, Teizang, Saizang, Vaiphei, Thado, Sizang, Ngawn, Paite, Hmar, Lusei, Dim, Vangteh, Simte, Gangte, Thangkhal, Haiciin pau kigawm Tedimpau pen Zopau kici a, zatkhawm ding thupi hi. Mizote in zong Zo mah bulphulin Zoram khuavel, Zofate cih bangin zang a, ZoRo makai zong R.Thangmawia (Mizo), PS Haokip (Kuki-Thado) ahi hi. Sizang in zong Sihzang tate icih sangin Zotate icizaw a, Kuki Thado in zong Kuki tate, Thado tate cilo-in Zocate mah icizaw hi.

Lang Khan Khai
Zomi Times