Zomi leh Tangthu thak

Zomi leh Tangthu thak

Ulehnau teng,
Tulaitak ihihna bang bang pen tangthu thak agelh gelh ihih manin lungngaih huai thu tampi om dinghi. Pasian in Zomi te i kalsuan danding ei sangin thei zaw ahih manin tuni ciang zong lamet loh zah dongin akal suan toto zo ihihi.

1. Mimal pan tangthu thak ah:
Mimal kim in anungta Pasian tawh limtakin kizom in, ihihna identity kemciat ni. Muanhuai in omsawm ni. Cihtakna tawh kalsuan ni. Nisim inuntakna ah tangthu thak agelh den den ihihna mangngilh kei ni. I gilvah pen hun leh igilkial pen hun in hong bawl Pasian leh imipihte nusia leh taisan kei ni. Midangte sangin ei a mah puah leh it zaw ni.

2. Innkuan pan tangthu thak ah:
Innkuan sung ah akician in iki makaih zawh kei leh itangthu hong limci thei lo ding ahih manin, nupa kal, tate tawh kikal cihte pen tangthu thak gelhna hun ah thupi mahmah dinghi. Innkuan sung ciat makaih sawm ni. Pasal ten idin mun thei in, numei ten idinmun thei in Laisiangtho tawh akituak bangin kalsuan sawm ni. Midang te ngeina hoihlo thute i innsungah lutpih lua kei ni. Zomi ihihna innkuan sung pan lamsang pah sawm ni.

3. Khua kipawlna pan tangthu thak ah:
Ih khua itui ciat thupi mahmah hi , ahizongin khua kipawlna i nak paipih sawm luat ciangin Zomi hihna lam ah kitha nem thei ding ahih manin khua kipawlna tuamtuam te azatdan siam sawm ciat ni. Lungsim tuam neilo in Zomi hihna sungah ikipum khat theih nadingin kalsuanna hisak sawm ni. Khua kipawlna pan Minam bup kipawlna ah cih lungsim neihsawm ciat den ni.

4. Beh kipawlna pan tangthu thak ah:
Behleh phung thupi mahmah hi, ahizongin beh thu inak thupi ngaihsut luat leh denciangin iminam ihihna ah kitha nem thei zelding ahih manin akipawldan leh ikalsuan dan siamsawm ni. Zomi hihna ah tangthu igelh siamding thupi mahmah dinghi. Beh leh phung ah ilungsim limtakin igawm khit teh Minam hihna ah ilungsim leh isepna igawm toh ding thupi mahmah ding hi.

5. Awkaih lungsim pan tangthu thak ah:
I tenna mun leh mual zui in i awsuah leh i awkaihte hong piang hi. Awkaih kibang teng cih lungsim ineih leh denciangin Minam bup ah thanemna hong piang thei ding hi. Awsuah awkaih te thupi mahmah a, ahizongin awkaih akibat loh hangin kitel mahmah leh ngeina kibang lua ihih manin Zomite sungah awkaih lungsim leh kuam lungsim panin Minam khat lungsim ah tangthu gelh dan siam sawm ni. Aw kaih leh awsuah te tawh ilungsim khenkhiat sawm kei ni.

6.Pawlpi kipawlna pan tangthu thak ah:
Pawlpi pen kha thu tawh kipawl kipawlna hi in thupi mahmah hi, ilungsim anop na penpen biakpiakna sung ahihi. Ahizongin biakna akibatloh manin kigalneih leh kigim neih ding cihbang in ngaihsun lo in, lo cingkhat sunga buk tuamtuam om dan in ngaihsun siamni. Biakna tuamtuam panin ilungsim anungta Pasian kiangah igawm ban ah I Zomi hihna te paaikhia tuan kei ni. Biakna tuamtuam panin Minam bup ah tangthu thak gelh sawm ni. Gam le minam makai te tawh kipawldan siam sawm ni. Panpih dan siam sawm ni.

7.Ki pawlna tuamtuam pan tangthu thak ah:
Tulaitak Zomi te sungah kipawlna tuamtuam om hi, avek in athupi hia, i vision leh mission atuamtuam ahihi. Ahizongin khat leh khat kikal ah ki thusimna leh kizahtakna te omsak siam ni. Ahun hun in kipumkhat theihna lungsim nei hi. Sepkhop nopna leh thupi kisakna lungsim nei hi. Agual zo leh alawhcing aomciangin kilungdampih siam in, alawhsam leh aguallel aom ciangin apuakkhop dan siam ni. Minam bup adingin akisam bangin tangthu thak gelh siam ni.Akisam hun ah pankhop sawm ni.

8. Gamgi tawh lungsim kikhen sak kei ni:
Zomi te Leitung gam 30 val bangah om ihihman in gamgi tawh ilungsim kikhen sak kei ni. Zomi te sisan sungah gamgi cihbang omlo ding in ngaihsun siam ni. I omna akibat loh hangin ihihna kibanga ilunggulh kibang sak den ni. Denciangin Topa hoihna nibangin hong tang ding hi.

9. Thupha ngah pan thupha naak suahding hanciam ni.
Thupha ingah nadingin thupha khempeuh anei anungta Pasian ineih akipan in thupha ngah taktak ihi a, mitmuh a isim theih thupha te pen thupha gah leh thupha paak te ahihi. Abraham bangin thupha minam lian ihih khit teh ei tungtawn in midang ten thupha angah nadingin hanciam ciat ni.I ngahsa thupha te ei tung bek ah khawlsak kei ni , midang te tungah zong tungsak suak ni.

10. Gualzawhna ingah teh lungdamkoh dam siam ni.
I cihmawh mahmah laitakin midang ikisap mah bangin igualzawh hun leh ilungdam hun teh midangte kosiam ni. Igualzawh sim in anungta Pasian tung leh iseppih lawmleh gual te tungah lungdam koh ding mangngilh keini. Lungdamkoh dan isiam nak leh i koh kik ding thupha hong pai pai ding hi.

Thukhupna:
Itna sungah kipumkhat ni.
Sepna sungah kalsuan khawm ni.
Gualzawhna sungah lungdam khawm ni.

Thungetna tawh,
Sia Pau Khai.
Zosiam pu.
July 22,2015.
Louisville ,KY.