Parcel & Calling

Parcel & Calling

Thuumna:

Note banga pilna nei kahi kei a, ka ukna leh kaveina khat tawh Lai gelh mi khat ka hihi. Acticle khat kagelhna sungah laimal kakhialh khak lohna pen omlo ding hi. Hibanga kakhialh ningnung nahangin Laisimte’ lungsim ong nawngkaisak kahih manin, khialh loh theih dingin ong hanciam ing. Tua kawmkal ah Laimal khialhna aomkhak leh nong na ngaidam un.

Thupatna:

Zomi tawh kisaithu gending hilehang gending tampi om hi. Minampi khat ihihna pen Lai ( Literature ) in thu tampi vatsat miau hi. Tua ahih manin Lai kician neilo minam pen Minampi kici theilo hi. Tua sungah Zomite’ neihsa ahi, Zolai pen Mikang ( English ) te’ laimal kizangh ahihna tawh kizui in, Zolai/Zokam a kicing zolo kammal leh laimal tampitak English pan kila in kizangkhawm toto a, tua sungah “Parcel” cih kammal zongh tuhun diakdiak ciangin kinak zat mahmah hi.

Parcel icih in:

Mikangpau ( English ) pan kila hi a, Annsai (or) Vansai, Gamdang pan (or) Mundang khat peuhpeuh panin, akivaikhak vante pen “Parcel” akici thei pawlkhat ombek hi. A kivaikhak vankhempeuh zongh “Parcel” hikhinlo hi. Nuntakna anei ganhing pawlkhat leh Mihingte’ tungah “Parcel” cih kammal kizang theilo hi. Gentehna: Ka Bawngpi ong “Parcel” ingei, kici theilo dinga, Bawngsa ong “Parcel” ingei, kici theibek ding hi.

Percel Hilo:

Kawlgam nuntakzia haksat luatna leh Kawl meisante’ peipuangna hangin, Kawlgam sungah ateeng Zomite kipuapial in munci teng, gam citeng ah philbang/zangbang in kikhenthang hihang. Adiak in Tangval pawlkhat Malay, USA, Australia leh gam tuamtuam atunkhit uteh Zi deih uh ahih manin, Kawlgam panin, theih ngeiloh, kingaihpih ngei hilo, muh ngeiloh, kitelpih ngei hilo pipi in, kitangsap luatna tawh Numei minpua khatpeuh vaikhak in Sum leh athu/ala teng vaihawm in kisam uhi.

Hibang dinmun sungah akimuh cil-uh (or) akithuah khit uteh khat leh khat kitha tuaklo/ Kithutuaklo in akikhenkik mi tampi om uhi. Pawlkhat leuleu pen kithatuak, kilungtuak, kithutuak in kitelsiam uha, Khantawn in kitulpih uhi.

Adiak in Galkap Kumpi’ uksung ah Zomi thelthangte’ dinmun hi-in, “Parcel” ci-a aki gengen pen “Calling” hizaw, cih nong theihpih ta-un!. “Calling” cihtak ciangin nam tuamtuam om leuleu hi. Tuate tam gen nawn keini. Hibanga hilhcianna kahong neihna ahang pen Zomi khat kahih natawh Zolai/Zopau/Zongeina cihte thupisak in akemcing nuam mi khat ahih manin honggelh ka hihi.

Calling:

Mikangpau pan kila hi-a, Sam, La, Pi cih bangin kizangthei hi. Laigual in hilhcian hilehang:

* Sam: Kawlgam pan Zi nasam naihia?
* La: Kawlgam pan Zi na lanai hia?
* Pi: Kawlgam pan Zi napi naihia?

Thukhupna:

“Theih tamin teltamlo” cih kammal khat Zopau thupi khat inei a, tuasungah “parcel & Calling” izatkhialh hetloh dingin kadeihna bulpi tawh honggelh kahihi. “Parcel” cih kammal pen Mihing tawh kisai in kizang theilo ngiat hi. Banghang hiam cihleh Mihing genloh Ganhingte nalengin Rights kinei a, Zomite’ zatzat den “Parcel” cih kammal pen amun leh athu zui a, izat theih ding kisam in thupi hi.

Dal Sian Hung
Kuala Lumpur, Malaysia