Zomi le Naupang ~ Kham Do Dal

Zomi le Naupang ~ Kham Do Dal

Zomi & Children :: Z.Y.A kiphuhzawh kum 10 cin phawkna Magazine adingin Thului ”Zomi le Naupang” cih gelh ding ngetna ka ngah manin lungdam mahmah ing. Zomite sungah naupang cih pen i thusimloh pen le bangmah lo khata i koih hi napi in Zomite paunak ah “Naupang’ thu le Hausa thu” cih nei-in manloh a phamawh, thudonloh a phamawh ahihna zong na omzel hi.

Leitung ah zong naupang pen a kithudon lo-pen le awlmawhna, lunghimawhna a tawm ngahpen ahihna zui-in a na lunghimawh masate in naupang tawh kisai kipawlna le thukimna a tuamtuam na nei uh hi. Tua kipawlna min pen “Convention on the Rights of the Child” naupangnote ngah ding a kilawm hamphatnate tawh kisai thukimna (CRC) na ci uh hi.

1. CRC pianna tom

Hih naupangnote tawh kisai ngaihsutna pen 1924 kumin leitung gamlian pawlkhat in na lunghimawh masa uh a, galpi nihna khit 1948 kum ciangin leitung gambup kipawlna UN Khawmpi panin a nihveina naupangnote hamphatna pulakna neikik uh hi. 1979 kum tak ciangin “Leitung gambup naupangte Ni” (International year of Children – IYC) hong piangkhia in, 1989 kum Nov. 20 ciangin UN in hih CRC hong kipsak in, 1990 kum July 16 ciangin gam tampi in thukimna suai kikai-in leitung theihpih kipawlnapi khat hong suak hi.

1991 kum ciangin Kawlgam zong hih CRC kipawlna ah gam khatin suaikai-in kihel a, 1993 ciangin Naupang thukhun (uav;Oya’, Child Law) bawl uh a, 2001 kum ciangin “Naupang thukhun zatzia ding” (uav;oli,fenf;Oya’) hong bawlkhia uh hi.

2. Naupang thukhun

Hih Kawlgam naupang thukhun sungah Naupang i cih ciangin kum 16 a cing nai lo khempeuh hi ding a, tua kumcing nai lo Naupangte sepkhialh bawlkhialh khempeuh Kawlgam thukhun tawh thu kikhen thei lo ban ah a liante sihna ciang dong/khantawn thong kiattheihna ciang dong ding mawhsakna, a bawl leh kum (7) sang tamzaw lo thong kikhum thei ding ci hi. Kawlgam thukhun in zong naupangte na nakdal mahmah cihna hi.

3. CRC Thukimna 4te

Hih CRC kipawlna a lut gam khempeuh in a nuai-a thu 4te bangin Naupangte tungah bawl ding hi ci hi.

• a. A hoihpen naupangte phattuam nading (Best interest of the child)
• Gtn: Vai khempeuh ah amau zong phawk kawmin gel ding cihna hi.
• b. Naupangno citciat deidan lo ding
• (Non Discrimination of the child)
• Gtn: A hau, a zawng om lo kum 16 nuaisiah naupang ngen kibang hilel hi.
• c. Naupangnote khangto-in a nuntak khuasuak theih nading
• (Survival & Development)
• Gtn: Nu le pa lo tawh zong a nungta thei dingin pantah ding cihnopna hi.
• d. Naupangnote ngaihsutna le muhnate thupisimsak ding
• (Respect the opinion of the child)
• Gtn: Innkuan vai ah amau zong dongin, amau ngaihsutna zong a hoihte la ding.

Note: Naupangnote adingin a bukim khantohna a neihtheih nadingin hanciampih ding, naupang hilel ci-in nawlkhin, pampaih loin, limtakin kem ding cihnopna hi.

4. Naupang pantah nading

Zomi sung le leitungbup phial mah ah naupangnote tawh kisai-in a nuai-a bangin pattah khialhnate om a, tuate panin pilna la in, Zomite in i tano, i tunote i pattah siam ding thupi mahmah ding hi. Naupangnote pattah nadingin-

(a) Naupangnote thudon lohna (Child Neglect)

Naupangnote a it lo nu le pa kuamah ki-om lo napi in, nekledawn haksatna, le zawn nate hangin, a thupi penpen ahi i naupangnote kimangngilhkha zel hi. Naupangno khat adingin a lo theih loh a kisam den ahi, annek tuidawn, nikten puansilh, pumpi taksa cidam nading kha lam nuntak hoih neih nadingte ah a kisam bangin na hihkhak lohna pen Naupangnote thudonlohna ahi hi. Thudon, awlmawh ciat ding hi hang.

(b) Naupangnote khengval lua-a bawlna (Child Abuse)

Naupangnote a khengval lua-a simmawh bawl, zawhthawh bawlna cih pen naupangno khat i khantoh nading lungmuan nading, nuntak theih nading a khaktan, a dongtangsak nasepna khempeuh cihna hi. Pumpi, lungsim, ngaihsutna kipan kha lam dongah naupangno khat i khantoh nading khaktanin nang i lunggulhna tangtun nadingin, sangkahsak lo, lokuanpih cihte pawl a kipan, ama hamphat nading a khantoh nading na nawngkaisakna pen naupangnote tunga zawhthawhbawlna kici a, hoih lo ahih manin Zomi nu le pate in zang lo ding hi hang.

(c) Naupangnote meetdawhna (Child Exploitation)

Naupangnote pen a koima peuh ah amau sangin a golzaw, uzawte’ meetdawhna namkim na thuakkha uh hi. Hih naupangnote meetdawhna cih tawh kisai-in Kawlgam le leitungbup ah naupangnote in pilna sintheih nading hamphatna nei uh a, pilna sinsak loin, lo kuanpih, inntengin sawl, mi’ inn ah na semin koih cihte kihel hi. Hihte panin naupangnote i dal nadingin kumpi in naupang thukhun kiciantakin nei hi. Kei ta kei thu hi i cikha dinga, a kilawm loin i ta i naute tungah i gamtatkhaknate thukhun in hong zah tuan lo ding hi.

Thukhupna

Zomite i khantohnopna Zomite mipil, misiam tampi om ding i lunggulh leh Zomi naupangnote koici bangin kipantah a, koici bangin kibawlsiakha hiam cih nu le pa in ngaihsun ding hi hang. I tate sangkah hun lai khawnga sangtawpsak in, na semsak, innkuan sungah ganhing khat banglel-a koihin, thu le la khatpeuh i gel ciangin amau ading tawh ngaihsunkha mel lo cih pen ngaihsuthuai le kibawlphathuai hi. Na tate naupang hilel ciken la, thu kuppihin thupibawl inla, amau mailam ding saupi etsak zaw in, tu le tu-a nangma lunggulhna ultungsak ke’n. Zomi naupangnote pilna sin hunin pilna sinsak in, sumzon hunin sum zongsak in, makaih hunin makaisak le’ng Zomite khangto in, Zogam hong paallun ding hi. Sia Kham Do Dal