Zomi kipawlnate puahphat huai ~ Pau Khat Suan

Zomi kipawlnate puahphat huai ~ Pau Khat Suan

Zomite’ kipawlna khempeuh ah a huampi in panmun len pen..

• 1) Chairman/President… Pawl lutang
• 2) V. Chairman/ V.President… Pawl lutang huh
• 3) General Secretary .. Thuvanpi
• 4) Assistant Secretary.. Thuvanpi huh
• 5) Member … 3, 4, 5, 6, 7….etc
• 6) Treasurer …. Sum kem
• 7) Accountant .. Sum sazian sit

Hihteng hiziau a, hihte’ nuai ah khangno leh Numei department kikoih thei zel hi. Tua ban ah nasepna tawh kizui in committee pawlkhat kibawl pong thei hi. Ahih hang tuate bel hua a nuailam nautang nasep in kingaihsun ta hi.

Neu taleh hih mah, Bangzahtak zaihuam nuam taleng i format pen hih mah, kikhel lo himai hi. Kipawlna leh mapanna khempeuh ah i lungsim zong hih mah ah kikhumcip suk pah hi.

Tua ahihman in, i kipawlna leh mapanna khempeuh ah mimal khat (Chairman/President ) in a neng atawng a a bansawk theih, a batzawh zah ciang kan kheng thei mahmah lo hi. Mihing khat capacity ciang bek mah kihuam zo ahihman in i kipawlnate gol theilo hi. Golpi, zaipi ahuam a i bawl hang, mihing khat capacity ciang bek mah semzo semthei zel ahihman in kipawlna a gol a zai zah in nalian sem zolo, sem theilo hi.

Kipawlna kilam zia ngaihsut huai mahmah hi. I lungsim ngiat in nakhempeuh mihing khat khutnuai ah guang i hihman in, kithutuahna a omzaw ding, kipumkhat zaw ding dankhat a i ngaihsut leh tuadan hi deksuai lo hi. Hihbang structure ii a outcome result pen i ngaihsut tawh kilehbulh sitset hi. Kikhenna piangsak hi. Kisam lopi kidemna piangsak mikmek hi. Na kisemkhawm thei nawnlo hi. Pawlkhat lengkhia in tangtat sak hi. Pawlkhat in kipawlna thak ong phuankhia sak hi.

Kipawlna aneu alian i organization structure leh management system limtak etphat huai, puahphat huai mahmah hi.

I structure a zaizaw ding in khel hile hang…. Tua in

• I lungsim puakzia ong khel ding hi.
• I thu ngaihsut zia ong kilamdang sak ding hi.
• Pankhopdan thak ah ong thahat sak ding hi.
• Na lianpipi ong semzo sak ding hi.
• Ong kikim sak ding hi.
• Ong kithutuak sak ding hi.
• Ong mazang sak ding hi.

Limtak enpha kik ciat dih ni. Pau Khat Suan