Malaysia, Pandan Indah vengah Myanmar nupi khatleh naupang 2 kithatlum

Malaysia, Pandan Indah vengah Myanmar nupi khatleh naupang 2 kithatlum

Malaysia, Pandan Indah vengsung Jalan Lembah Maju lamziktung aom innkhat ah Kawlgam nupi khatleh naupang 2 asisa in kimu cihthu FMT News pan kiza hi. Tua Kawlgam numeinu pen “Masseuse” kici cimek nasep asemkhat hi a, a innsung ah zanni (Feb 12) zanlamin naupang nihtawh aki thatlum hiding in ki ummawh cihi.

Ampang Police Chief te genna ah Kawlgammi nupi khatleh naupang 2 te ii luanghawm pen innsung ah asisa in nitak 11:50pm hunpawl in kimukhia a, agei ahzong apasal pen khuaphawklo in om cihi.

Asi nupinu pen kum 47 hi a, naupang asi khatpen kum 10 aphapan atanumei khat cihi. Adang asi naupang khatpen kum 3 bek aphapan pasalno khat hi a, atupa hiding kici hi.

Innsung panin si luangkhia akimuh ciangin amukha te’n Police Report bawlin zasak uh cihi. Palik te’n innkongkhak satkhia in, asung alut ciangin asisa in misi luang 3 takleh agei ah khuaphawklo pasal khat mukhia uh cihi.

Tua asilo apasal pen kum 47 aphakhinkhat hi a, nasep kician neilo cihi. Ampang Police te’n tuapa Ampang Hospital ah puak uh a, zato ah kalkhatsung kemcip in hihvai tawh kisai kankhiatna ah ahuhding in thudotna kineiding cihi.

Siluang 3 tezong Ampang Hospital mahah kipuak in, Post-mortem kibawlding hi. Myanmar cihciangbek in News ah ki suaksak a, amin apuam kisuaksak nailo hi. Kuate himawkding hiam? ZD Sawltak #zomidaily

Comments:

Hih News kisuahsakna nuai ah Malaysia gammi te’n Comment pawlkhat pia uh a, Ampang Area sung vakleng Myanmar te naupang nihleh thumtawh vakliailiai uhhi. Tuzawh kum 10 khitciang bang acimawkdiam acitawh.

Banghangin kumpi in hih kimanna aneilo gamdangmi te mawk omsaksak hiam? Myanmar te phadiak kithahna leh gitloh gamtatna “Crime & Murder” tampi piangsakkhin uh. Police te’nlah buailawh. Hospital ahlah gamdangmi vive kibuaipih mahmah in, gammi te zong hoihtak kikemman nawnlo. Hihteng hangin Goverment Funds tampi kibeilawh hi ci’n agelhtawh.

Hihbangdan Comment ihsimkhak ciangin Malaysia gammi te’n hong bangcimuh uh cih kiphawkthak in, migam milei abeel in aom ihhih mahbangin omdanzong kidopzekding ahoihdiam? Muslim gamsung ah omin Crusade cizel, Homecell cizel. Zankim zankhangin vanglehpaam zahtak namellah theilo, aw hut liangin kubuabua in ih thunget pen Pasian in azadiakding mah ahidiam? Laisiangtho sunga Pharisee te thungetdan acihte peuhtawh akibang khamaidiam? Thunget agin ngaihtheithei, biakpiakna Sound System agin ngaihtheithei athupi mah ahidiam? Gamdaihna ah Pasian omlo ahidiam? A gingkhia zaizialo in gamdaitak in lungsim tawh thu ki ngen theilo ahidiam? hong cinuamphial uhtam gammi te’n 🙂