Zomi Khawmpi USA 2016 kamuhna thu 16

Zomi Khawmpi USA 2016 kamuhna thu 16

Tutung Nashville khuapi a kibawl Zomi tawh kisai in kamuhna anuai a bangin konggelh khia nuam hi.

1. ZIUSA EC makaite thupi thei mahmah kasa a, amau committee tek pan paubanna om kasa kei hi.Pasian zahtakna tawh hun khempeuh kizang a, kipatna thungen in tawpna ah zong thu mah kingen ahih manin Minam khawmpi ahih hangin Pasian ompihna kingah mahmah hi.

2. Innteek Nashville a om Zomi makai te leh innteek khempeuh thupi leh lungkimhuai kasa mahmah hi.

3. Zinmangpi te ahi- Pu Thang Khan Gin te, Pu Gin Kam Lian te, Pu Kam Lam Khup te, Pu Go Cin Zam te, Pi Kam Khan Dim te,Pu Kham Sian Pau te akipan athugen te uh thupi leh manpha mahmah kasa hi.

4. Bawlung kidemna ah Innteek ten akhatna hongngah in, Lungdam huai mahmah kasa hi.

5. Idol kidemna ah Sanggamnu Siamnu in aw hoih takin la hongsa in akhatna hongngah a, akidem mi 30 kimlak pan ahih manin lungdam huai pha mahmah hi.

6. Zolia kidemna ah Innteek khua in akhatna hongngah in lungdam huai mahmah hi, muhnop mahmah hi.

7. Zomi Forum neihna te ah zong Vision kibang kim a, Mission atuam ciat ahibek hi, bawlung sui bang hileng i goal kibanga, ahizongin bawlung tualsunga imapan dan amun akibang lo dan hibek a, thangah huai thei mahmah hi.

8. Concert laman lasa ten siamtak inhong sa uh a, mipi nosuak sak mahmah uhhi.

9. Lucky draw bawlna in zong mipi nosuak ask mahmah hi.

10. Zingmang te adingin ahunhun in piakkhiatna kibawl a, mipi ten Pasian leh imi te adingin piakhia ziahziah uh hi.$ 10000 val kingah hi.

Rev. Pau Khan Khai @ Zomi Forum on Zomi Identity 2016

https://www.youtube.com/watch?v=uwIm1l3tNtM

11.Khangno sungah misiam mipil tampi tak hongom taa, mailam ciangin Zomi te pen USA leh leitungbup dongah Topa mintawh maipha ngah mahmahdingin kilam en ciat a tha kingah mahmah hi.

12.Gamtuamtuam panin – zin leh leng hongpai ziahziah uh a, Germnay pan, Australia pan, Myanmar pan, India pan , Canada pan, cihbangin khawmpi sim in hong kipai ziahizah hi.

13. Khawmpi sim zin pen innteek te sazian dan in mimal 1600 pha hi ci in ciamteh uh hi.

14. Tutung in Phitmutte, mark pia te kuamah mawhsak dingom kasa kei a, amau muhdan leh khentatna ahih manin muang mahmah a panmun i apte pen amuan huai hipah pah hi. Ka lungkim mahmah hi. Media te zong nasia mahmah in akisam bangin Live nangawn tawh mitampi ettheih dingin hongbawl uhhi.

15.Makai te thugen te pen Zomi te adingin Lungdam huai leh lungkim huai thei mahmah a, mailam ah Leitungbup Zomi khempeuh adingin maban limci zaw mahmah cih kimu hi.

16. Khawmpi sim khempeuh in hun tom kisa ciat a, kum 2018 teh kimuh kikding kingah lah mahmah sa in kiciah diam diam hi.

Lungdamna tawh,

Sia Pau Khai.
July 6.
Louisville, Kentucky.