Zomi Idol ~ Nang Kim Mang

Zomi Idol ~ Nang Kim Mang

Zomi te sung pan tulai thusuakte lakah ih “Zomi Idol” vai pen ki lim genin, ngaihsutna kibang/banglo pulak ngeingai hi hang. A thu (lasiam kidemna le pahtawina) deihlo taktak om samlo hanga, ih buaipih pen a thu hilo in a kammal hi. A thu hoih kisa tek ahih mah bangin hih “Zomi Idol” hong pankhia-a, hong makaih makaite mawhsak ding hi pahlo hi. Ih minam bup huamkim in hih bang thuhoih hong phawkkhak uh pen Pasian in ih minam hong angvanna khat mah hi in, hong makaih zawh uh pen zahtakna pia ingh. Thu hoih hi in, zopsuak ding zong thupisa ingh.

(1) A kibangtek pian mah hihang!

A thu hilo in, a kammal hi ih buaipih. Bang hangin hizah in buaipih mawk ih hiam? Idol cih kammal a deihlo te’n hong tam gen luat uh ciangin hih kammal hong phuankhiate mimal mawhsakna tawh kibang liangin, a vaihawmte a’dingin thanemna in piang thei hi. Idol kammal a zangh masa (makaite) te’n zong lah enpha kikni ci nailo uh ahih manin mipi le makai kikal ah kitelsiamna om nailo hi. Midangte’ ngaihsutna sangin eima deihna tek mah masak hamtang tek ih hih manin “a kibangtek pianmah hi hang!” Bangbang ahi zongin a thu hoihsa ih hih manin mai lam ah bangcih ding ih hiam?

(2) Min thak phuak ding maw Idol mah ci ding?

A kipatcil pekin zong makai te in nakpitak mahin a ngaihsut khit uh ciangin “Zomi Idol” cih min hong piangkhia hi dingin lamen ingh. Mi khat ngaihsutna bek tawh kizangh hilo in, makaiteng thukimna tawh a ki kipsak hi ding hi. Ahi zongin, tuhun ciang mi pawl khat ih muhna ah hih Idol kammal pen zat huailo hi cih thu hong om khin ahih manin “enpha kik leng” hoih ding hi. A omsa mah ih zangh-a, a thak ih khel zongin a thupi pen in, “buaipih loh ding kammal” ahih ding deih hihang. Kammal a dikloh manin buaina piangsak thei in, kammal dik mah leh zong ih telloh manin buaina om thei veve lai hi. A kammal hangin a thu ih mitsak khak ding utlo hi hang.

(3) Bangci etphat ding?

Pasian le minam a itna uh tawh ih makaite in tu ciangdong hahkat takin ma hong pan manun vaihawmna a tangtung toto hi. Lungdam mahmah hang! A gim a tawlnasa mah uh thasit hetlo in mailam a’ding hong vaihawm lailai ding uhhi cih zong muang ingh. A diakin, hih min vai pen makaiteng hong kikum khawmin, hong enpha masa phot le uh hoih ding hi. Minlui mah zong hoih a cih uh leh hong helin, min thum/li bang hong teel uh hen la, tua lakpan mipi in (online ah) teelbeh in, a tawpna ah mi tampen ih deih pen zangthei leng hoih ding hi (a tamzaw in Idol zat ding a thukim leh zong zat suak dingin ki zo tek ding hihang). Tua nangawn leitung bei mateng zatsuak ding danin ngaihsut loh ding thupi lai ding hi.

Thukhupna

Ka gensa bangin hih “Zomi Idol” cih pen makai te’n a ngaihsut ngeungau khit uh ciangin hong piangkhia hi ding hi. Mipi in hoih samaw hoih salo cih kamkupna om maw/lo thei keng! Mipi hong kidong takei leh makaite vaihawmna hoihte phunphun lo in ih sepkhop pen lawhcinna/thupha sanna hi. Ahi zongin mipi lam panin dotna, lung phatmawhna a om ciangin makai te’n thu donlo in om leh “thupi tak ei” a kici sa thu/nasep khat zong “thupi kei” kici kikek thei mawk hi.

Minam dang te’n gataam hong duhpih khollo ding hi napi, Zomi te’n “gataam lim” ih cih manin ei a’dingin “Zo an lim” khat hong suak lel hi. Idol khiatna (definition) le midangte’ zatdan khawng ki hilhcian pen thutheihna ahih sam hangin, tulaitak ih buaina bangcih leng siang dinghiam cih ngaihsun beh tekni. A min hangin a thu ih suplawh ding ut hetlo hihang!

Hih vai hangin Zomi te lungsim kikhen nonlo in, ki pumkhat a, ih khantoh semsem zawk ding ka thungetna hi. Itna tawh, Nang Kim Mang