Zomi Gospel Olympic Singapore 2014 ~ Hau Za Cin

Zomi Gospel Olympic Singapore 2014

August kha hong tun taktak ciang bel Zomi te i anpal Vaimim, Taang, Mai, Tangmai, anteh lohingte kila ziahziahta ahih manin Zomi Khuado zong hong nai mahmahta hi. Tua banga khuahun hong nop toh hiaihiai laitak Zomi te lungsim ah gualnopna, kikholhna, lawm leh gual tawh nopsak nopna lungsim hong khang hiaihiai hi. Guahpi zu leh meikai nuai ah lohong, anhong a i diandianna te hong kidaang hiaihiai a, khuahun hong pha toto in nisa ki iplah semsem in hun nei hilehang nilum awi a tutkhol hithiat uthuaita hi. Tua bang hun kiheito hiaihiai a tawldam huai dan leh a nop dan a theikha lo Zomi kuamah omlo ding hi.

Tua bang hun ah i om laitak in banghih leng gualnop dinga, bang hih leng i paallai nite limci sak ding i hi hiam cih kingaihsun ngaungau hi. Zawl ngaih neite adingin kimuh a Zohuihkhi siang lang hiauhiau dik kawma khuamual khawngah lampai a khut kilen tittet a nitum kuan gal et dide khawng a lunggulh huai, khiatlah huai khat ahi hi. Sangkahte adingin sangkhak lah nai pianta ahih manin laisimna te matut dingin hanciama lai deihtaka hahkat a zingsang khuavot siuhseuh ah laisim ngakngak nuam mahmah hi. Nu leh pate adingin lo ah mehteh mehgah gah phingphenga nisa hilhial nuai ah lokuan a va lawh ziauziau a, ipsung, sengsunga guang a tangmai ngek mikmek ne kawma inn lam ciah hiathiat a nopdan kigencim theilo hi. Pi leh pute adingin lah tuuk hun bei hiaihiai ahih manin khuadam meikai guahzu in mualkhum hiaihiai a innkatau tunga nilum awi a tutkhawl hithiat a nopdan khiatlah khop in hong kicingta hi. Naupangte adingin gamsung khuasunga pakhuana pakte pal in khuai leh vasate lang a ham veuveu in kizui diamdiam uh a, Khuado Puanthak (Tualpuan) naita ahih lam phawk kawmkawm in zan khavak nuai ah kimawl in diang ziahziah uh a, buannawi om nawnlo ahih manin peklum, ling kineih, song kineih, sial kineihte kizom kik theita hi. Tua manin leitung a hoihna leh a nopna hong khang in hong kibehlap a, kumkhat sunga khuahun nuam penpen a kitungkikta ahi hi.

Tua banga leitung nopna a ‘paakzu’ a kidawn ziahziah laitak in Zomi Innkuan Singapore te in zong tukum gualnop leh kikholhna nuam mahmah ding gelna kicing mahmah khat vaihawm uh a, a min dingin ZOMI GOSPEL OLYMPIC 2014 (a tomin ZOGO 2014) ci uh hi! August 8-11, 2014 sung khempeuh nuamtak in hun kizangkhawm ziahziah ding hi. Singapore a Zomi om khempeuh kihel ding ahih manin min khumna kinei ziahziah a mihing a vekpi in 400 kiim min kikhumta hi (min khumloh omlai dingin ki ummawh, a theite in makaite zaksak ding kingen). Tua min khum 400 khempeuh pen pawl thum ah kikhen a, pawl min VAPHUAL, MUVANLAI leh ZOHEISA ciin min kivawh uh hi. Makai leh tangzang a sem dingin Zolia leh Zotaang te kiseh zihziah uh a, Pawlpi Innpi zong kiseh diudeu hi:

VAPHUAL Pawl:
Makai: Tg. Pau Kim Sing leh Lia Niang Ngaih Hau
Pawlpi Innpi: Pa Hang Khan Lian leh Nu Noreen Hong
Puanmel: Asan (Orange)

MUVANLAI Pawl:
Makai: Tg. Cin Hau Mung leh Lia Khawm Suan Ciin
Pawlpi Innpi: Pa Pau Lian Tuang leh Nu Zam Lian Cing
Puanmel: Adup (Blue)

ZOHEISA Pawl:
Makai: Tg. Lian Sawm Sing leh Lia Cing Sian Nem
Pawl Innpi: Pa Pau Khan Khup leh Nu Dim Lam Niang
Puanmel: Avom (Black)

Hih pawl thumte in tuzan pan kipan amau pawl ciat kimuhkhopna Pawlpi Innpi te inn ah nei ding uh a, ZOGO sunga kimawl ding dan leh a kisam nate sin ziahziah ding uh hi. La aw, thu aw, ciamnuih aw, kimawlna aw… nuam panpan ei guai! Tua hun sungah amau pawl ciat pan SPECIAL ITEM khat ciat nei ding uh a, tua pen bang hiding hiam cih a hunma in kitheilo dinga, a lah lian uh ciang bang hiam cih kithei pan ding hi. Tua pen marking, point scoring kibawl toto dinga, a tam mu penpen Olympic Champion hiding hi. Singapore a om Zomi khempeuh in lawptak leh ngaklah takin a mitsuan dimdiam uh ahi hi.

Puan zong kingahta ahih manin amau pawl ciat ah makaite in hawm ziahziah in lawp thei mahmahta uh hi. A hun hong tun ding bek ngak in a kikhawl diudeu hi a, ‘ka sam bangci’n ka zem tam’ cih khawng Zolia te kihona kiza sim khiankhian hi. Zomi lia leh taangte kituahna, nu leh pate kimuhna, numei naupang kikholhna gualnopna hun ahih manin nuam mahmah ding, lawp mahmah ding ahi hi.

A nipi ni ding pen 9 August 2014 hi a, a mun ding pen Beatty Secondary School, Braddel MRT gei ahi hi. Bus 28, 56, 57, 59, 73, 88, 105, 153, 155, 157, 159, 163, 535, NR1 te tung a, Bus Stop pen Block 237 ah kum ding ahi hi.

August 9 ni sun thapai kimawlna, Olympic Games sanga nopzaw Zomite adingin kibawl ah a kihel dingin leitungbupa om Zomi khempeuh kong cial uh hi 🙂 .

Hih Gospel Olympic hun sungin kimawlna leh gualnopna bek hilo in i nisim nuntakna ding leh i kha nuntakna dinga kisam Kha An leh Pumpi an tawh hong kivak ding hi. Nitak sim Pasian thu tawh hanthotna leh thapiakna, thusinsakna leh thuhilhna, thugenna leh kamkupna hong nei dingin India pan Sia Rev. Dr. JM Ngul Khan Pau te nupa hong pai ding uh hi. Sia Paupu in thugenna a tamzaw hong la dinga, Sianu Lucy Dimnu in zong thusinsakna leh thugenna Siapa tawh kithuah in hong nei toto ding hi. Nitak sim kikhopna ding mun pen: Foo Chow Methodist Church, 90 Race Course Road, Little India MRT Station gei hi ding hi.

Ni 15 sung ZOGO ading “tatsatlo a thungetna” (prayer chain) nungkal pan kipan khin a, thungen dingte amau hun ciat ah ZOGO adingin thu a ngen dingin khangno makai Siamah Muangnu in hong zasak zel hi. Thungen dinga min pia kha manlote in zong hih hun sunga dinga thungetna eima om mun tek ah neih tek ding i kihanthawn hi.

Kimawlna ding nam tuamtuam lak ah – Numei Football mahmah mipi in a muhnop leh a ngaklah pen hi ciin ZOGO thukansimte in gen uh hi. Numeite in football suihna dingin Ronaldo football booth a kibangte lei ding hiam ciin ngaihsun ngeingai uh hileh kilawm hi… Bangbang ahi zongin numeite bawhlung suihna ah football booth kizangsak lo dinga puan khedap bek kizangsak zaw ding hiin Referee Committee te in hong pulak khin uh hi.

Zomi Quiz leh Bible Cricket ban ah mittuam a daksat na siam taktak hiam cihte na kingaihsun kik in! World Cup ah Penalty lawlawm khumlo na ci maithei, nang zong na kiging sin aw – penalty na khum takpi diam? Na pi in na puankek hong khuisak mengmenglo ciin na hang kha nai vet ken Phim bil a khau khum a baihloh zia na tel ding hi. Zomi te PhD, Master Degree khuak kineita na ci maw… Zomi pupate in sang a kahloh hangin Ngatang Siallong Suut cih bang puzzle haksa na suut ziahziah khin uh hi, nang e leh, na suut thei takpi diam, sangkahlo na pupate na degree tawh na leh-et nai kei dih in; pilna i cih laidal tung bek ah kingah hilo hi!!

ZOMI GOSPEL OLYMPIC ah na siamna, na theihna, na kuhkalna hong lak in cih hilo hi, Zomi te gualnop, nunnop hong pia Pasian hong huai hong kepna thupha sungah nuamsa khawm, tukhawm, nekhawm, ciamnuikhawm in HUN NUAM zangkhawm leng i cihna hi. A kigen nailo tampi omlai, tuate gen khin nai kei ni…come and see (hong pai inla, hong mu in, hong thei in, hong ciamin).