Zomi Covid-19 Response Committee July kha Report

Zomi Covid-19 Response Committee (ZCRC) July kha Report

1. Kumpi tan 10 sangsiate le sangnaupang nulepa te huhngetna tungtawnin kawlpi, Khai Kam, Tedim, Tonzang le Cikha huam tan 10 sang 23 te a kihonkik theihna dingin a kisam vanlenate I panpih thei hi.

Cidamna lam thuneite ciangtanna vanlenate a kim nakleh tan 10 sang kihong thei ding hi cih kumpi thu tangkona om a, ahi zongin kumpi lam pan panpihna kicing vat lo ahih manin sang a hongkik zo ding kitawm mahmah hi. A tamzaw in van kisamte vaihawm zolo hi.

Pawlkhat (adiak in khuapi sung ate) in na vaihawm zo uh ahih manin naupangte sang lut thei pah uhi. Kumpite sep ding hi ci in thangpaih bawl in thudon keileng sang kihong loin naupangte laisin khalo ding dinmun ahih manin naupangte laisin theihna ding lunggulhna tawh I vaihawm ahi hi.

Sang khat ah virus kidalna ding van nam 10 ta kipanpih hi. Panpihna sangte in Gamngai, Suangpi, Singlei, Sawbua, Pyinkhongkyi, Vangteh, Tuimang, Thalmual, Kaptel, Phaiza, Zozang Ciingpikot, Saizang, Tuithang, Theizang, Tungzang, Haicin, Thuklai, Pimpih, Khaikam, Tonzong, Laitui, Tedim BEH te ahi hi.

Van kisamte pen (a) Global Zomi Alliance (b) Sm Cing Van Kim hanciampihna tawh Khit Thit Foundation pan in panpihnate gawm in a kipiakhia ahi hi.

2. COVID-19 huhua in nekledawn ding a hamsa meikuang paisuak dektak inn 27 tungah antang panpihna I nei thei hi.

3. Tedim zatopi a COVID-19 positive te zong a hunhun in thapiakna, thungetsakna banah a sim ding uh Lai Siangtho le laibu tuamtuam, laikung laidal piak ngeina om bangin I puak thei hi. Kum 6 nauno adingin kimawlna, cortoon limbu, limzepnabu cihte zong kipuak banah a nusiak uh innkuanpihte adingin antang ip 1 ta I puak thei hi.

4. Kalay myo kumpi thuvaihawmte huh ngetna dungzui in gamdang pan ong ciah Kalay University ah Quarantine lut a ni a cingkhinte vial nih I kha thei hi.

More: Covid-19 ah Volunteer te pahtawina lai piakna kinei

5. Ei kiangah COVID-19 ong kipat lian ciang mipi sungah natna virus banah nekledawn kitangsap ding kipatau mahmah cih pen a theihsa tek hi.Tua bang hun laitakin mipite kisapna bangin zat theih dingin antang ip 1000 piakhia in mipi sung lungmuan khamuanna a piangsak pu Thomasa Khanno le innkuanpihte pahtawina le tutkhopna hun I nei thei hi. Pa Lian Khan Tuang (President – ZCRC August 4, 2020)