Gamh ~ Dimno’ Pa

Gamh ~ Dimno’ Pa

1. Vangam

Vangam a luah nadingun Pasian pen na khempeuh a Bawlpa, a Piangsak pa in thei in, Jesuh pen Gumpa leh Honpa in a sangtheih nading uh na dang khempeuh sangin thupi zaw hi. Leitung hauhna khempeuh a gamh dingin i nusiat zongin Pasian hong thei kei leh a tawpna ah a mawkna hong suak ding hi.

Pasian hong thei-in, Jesuh pen Honpa in hong sang peuh leh gamtat hoih tawh hong kizom in, gengen leh sawlsawl kul lo-in, nu leh pa thu hong mang in biakinn lam hong manawh pah ding uh hi. Tua ciangin leitung hauhna khempeuh tawh lei zawhloh vangam nuam pen amau gamh hong suak ding hi.

Tua manin i tate gamh dingin adang bangmah i nusiat zo kei zongin vangam pen a luah ding uh gamh hoih penpen ahi dingin nusiat sawm ding hi hang.

2. Pilna

Neih leh lam, inn hoih lo hoih tampi tak sangin pilna pen a gamh dingun nusiat zaw ding hi hang. Ih khua i tui leh i gam sungah mi tampitakte in sum le paai zongin inn hoih lo lam uh a, tate pil ding don man lo liangin buai uh hi. A zongzong uh hauhna mu in, sum le paai leh inn hoih lo hoih nei mah uh hi. Ahi zongin tua a hauhna uh a luah ding leh a zeek ding a tate uh pilna hong guan kha lo uh ahih manin nu leh pa in kum tampi a zon uh inn leh lo hoihte leh a hauhnate tomkal sungin hong bei-in, hong maimang lel hi. Pilna lo tawh bangmah kip lo hi.

Tate pil ding kinsak man lo, donsak man lo-in, hauh ding bek tawh hong buai in, tate hong khantoh ciang pate neihsateng, pate lamsateng a banban in hong ne ngekngek lel uh hi. Kum tam lo-in hong bei hi.

Pawlkhatte-in a neih sunsun uh tawh tate pilna ding kan sak uh a, leitawi liang mah in sang hoihte ah hong kahsak uh hi. A khan sungun tate pilna zongna hangin inn nuam sung na ngawn ah om zo lo bek hi lo-in, zawn manin mi tampite simmawh paampaihna zong hong tuak lai uh hi. Ahi zongin a tate un pilna hong nei-in, tate hong khang ciangin tate thalawhsa tawh inn hoih lo hoih hong lam in, tua sungah lungnuam tak in hong tawlnga hithiat uh hi.

Tate ading inn hoih lo hoih lamsak kei ni, aci nuam hi lo hi ing. Ih zong sak masak ding pen pilna hi-a, i neihsa i lamsa abei dong mah in zongsak leng aci nuam hi ing. Pilna zonsak masa lo-in, tate luah ding neih leh lam, inn hoih lo hoih a nusia hile hang i tate in sawtpi hong ne khol lo ding hi.

Ahi zongin pilna a nusiat hile hang a khantawn uh hong khom dinga, amau ading bek hi lo, khua leh tui, gam leh lei ading dong ah a manpha gamh hong suak lai ding hi. Tua hun ciangin amau bek a manpha hong hi lo dinga, ei a nu leh a pate zong nu manpha, pa manpha, a etteh tak numei, a ettehtak pasal taktakte i suak ding hi.

Tua manin inn hoih, lo hoih te gamh dingin i nusiat sak sangin a hun om lai-in pilna hong ngah na ding uh hamciam pih in, pilna pen a luah ding gamh in nusiat ding hi hang.

3. Neih le Lam

Vangam a luah theihna ding, tua khit ah pilna a luah dingin nusiat in, a nunung penpen ah inn le lo, neih leh lam a luah dingun zong sak in, nusiat ding hi hang.

Pilna hong neih uh hangin Pasian hong thei kei uh leh ei thu um mite adingin a mawkna mah hong suak ding hi. A foundation dingin Pasian koih sak in, Pasian tungah a kilam theih nadingin gelsak ding hi hang.

Ih theihsa mah bangin tate luah dingin pilna sang in neih le lam a koih sak nu leh pa tampi i kiim i paam ah mu ding hi hang. Pilna nei lo-in neih leh lam tampi hong luahte-in a neihsa uh sauvei hong khom het lo hi. Zan khat thu in a inn bei-in, nikhat thu in a mawtaw uh bei lel uh hi.

A neih sunsun uh tate pilna ding zonna in a neite-in a nunung ah a tate un inn hoih lo hoihte nu leh pa adingin hong lam sak kik in, tua bang dan mi tampi zong i kiim i paam ah mutek hi hang.

Tua manin tate gamh dingin neih leh lam leh van leh nate koih sak masak lo-in, a hun om lai-in pilna pen a gamh dingin pia ding hi hang. Tua zom ah inn leh lo lamsak in, a luah dingun nusiat pan ding hi hang.

By,
Dimno’ Pa
April 30, 2018