Zomi aw khanlawh hunta ~ Cin Khaw Mung

Zomi aw khanlawh hunta ~ Cin Khaw Mung

A ihmu mi khat in, a ihmut hun sung a thupiang bang mah theilo in a om sungin mite’n nasem in buai mahmah uh hi. A khanlawh hun ciang mite in na tampi sem khin manin na khangto uh hi. A khanlawh hun ciang tua mite delh kei leh lah pha zolo ding, delh leh lah amau nung bek a delh hi ta hi. Bangbang ahi zong a khanlawh hunhun in a delh ding kitang sam hi. A khanlawh hunhun in a phakna tantan ciang delh leh hamphatna leh meetna tampi ngah zaw ding hi.

Tua ahih man in sawtpi ihmut khak ding a dah huai mahmah ahihi. Ih khanlawh khitciang mengmeet sawmlo in pilvangtak in ih mai a tai te delh in ih phak theih nading lampi zongin, hanciam in ih phak mateng delh ni. Tua ahih man in Zomite bang pan in khanglo ding ih hiam? Bang delh ding ih hi hiam?

1. Leitung khua hun etsiamna ah khanglo ni

Leitungah lawm hoih na cih ten zong a khuahun zui in hong taisan thei in, zong hong nusia thei lel hi. Ama angsung meet nading ahih nak leh lawmte zong khualzo nawnlo in na ki sem ngam lel hi. Leitung khua hun in ki it ding leh ki deihsak ding lam in hong kalsuanpih nawnlo hi. Mi ading zong a phattuam nading in nasem ding cih sangin, ken, kou innkuan in, kou minam in phattuampih peuh le ung cih bek tawh mihing te ki nungta hi.

Tua ahih manin leitung khantoh zia lung ngai in, etsiam in ih khantoh zawh ding thupi mahmah hi. Tua ahih manin leitung khantoh dungzui in pilvang tak leh nunnemna tak tawh ih khuasak ding thupi mahmah ding hun hi ta hi.

2. Kiphunsan na pan khanglo ni

Na hoih na sep nak leh mite phunsan ding na lauh manin lung-iang in om ken. Mite phattuam nading, khantoh pih dingte leh nuntak lawh ding thu ahih nak leh hangsan takin sep ngamsawm lel in. Mi dangte nasep phun sansan in, ahoih loh na bek mu thei na pi’n a hoihna tampi kigen lo in, kiphawk sak lo kha thei hi. Mi dangte na sep a phun sansan thei te pen a sem khollo teng leh a muhna toi teng hi zaw ahih manin mi hawmthawh ken. Kiphunsan hun hi nawnlo in kipahtakna leh pankhop ding hun hi ta hi.

Mipihte ading na hoih sep hanciam tekin, kalsuan khop ding ahihi. Ih om na mun pan mi nasep ih phun sansan lel a, bang mah ih sep kei leh ih minam mi tungah om ngeilo ding hi. Tua ahih manin ih minam na it a, na lainat leh mi nasepna phunsan ken la, nang zong panla in minam phattuam nading nasep ding ngaihsun in, hanciam in, zong sem khia pah in.

3. Kikhenna pan khanglo ni

Tu hun laitak bang a diakdiakin mi dangten sem lel in teh cih hun hilo in, sepkhop hun ahihi. Kikhen a, a tuamtuam in nasep ding hun hilo in kipumkhat in mapankhop hun ahihi. Ki it a khut kilen khawm a kalsuankhop hun ahihi. Mite pampaihna, etnoplohna leh panpih nop loh hun in, kikhen lo in mapang khawm in. Takkheh… ci in tha san in minam ih itna leh ih lainatna tawh khat le khat ki lungsim nop lohna a om leh zong ki mai sak in, ki pumkhat sawm ni. Mapang in ih sepkhop keileh mite’n hong nengniam in, hong en neu ding uh hi. Tua ahih manin Zomite kikhenkhenna pan khanglo in, kipumkhat theih nading lunggel in nungta zaw ni.

4. Kithukhualsakna pan khanglo ni

Zomite kithukhualsak in ih om hun sungin mite sang pipi na tung man zel uh hi. Thukhual a nuntak, kalsuan ding bel hoih mah hi. Ahi zong kithukhualsak a nuntak pen supna tampi om zaw zel hi. Ih thukhual kawmin pilvang mahmah in, mite’ khuahek leh mithek te zong theih sawmin, telsawm in nungta ni. Mite hong pahtak bawlna leh hong phatna uh tawh lungkim kha kei ni.

Tua sungah zong thusim tampi om thei hi. Tua ahih manin sep nang ah sem ngam ding; hangsan nang mun ah, hangsan ding hi hang. Mun khempeuh ah kithukhual sak hoih kimlo hi. Zomite thu khual ni, ahih hang pilvang kawm ni.

Tua ahih manin Zomite, bang delh ding ih hiam? Bang teng delh leng ih minam sungah khantohna, ki itna leh kipumkhatna om ding hiam? Tua pen nang ngaihsut, nang tungah kingah hi! Cin Khaw Mung