Khumbitna Manpha (Lockdown) ~ Jam Daniel

Khumbitna Manpha (Lockdown) ~ Jam Daniel

Tulai Coivid-19 hangin English kammal I zak mun deuh pawlkhat om hi. Social distancing, Lockdown, Quarantine Adang kammal tampi zong om a, ahizongin tuni a dingin a tunga kammal thum teng gawmkhawm in I deihna nam khat in I gen ding hi.

Social Distancing: Kilawh thei natna hong pian ciangin damsak pak na ding zatui omlo ahihmanin, mi khatle khat kinai ho lo a pi 3 pan pi 6 peuh mah kihal le hang natna kilawhlo zawdeih ding cihna tawh hih kammal hong kilimzat mahmah hi. Tuahangin meh le an lei dingin I pai ciang kihal diudeu in hong dingsak uh a cisa tehna tawh I tal hong kap masa uhi.

Lockdown: Hih kammal pen natna lauhuai ahihna thu hong ki theih pian ciangin mihau nasem lo a nungta thei pawlkhat le uliante pawlkhat amaule amau ki lockdown in vakkhia vetlo uhi. Damdam in natna hong khanciangin gamkhat le gamkhat kikawmna cih te ki lockdown in, gamkhat sungah zong nasepna, paisuk paitohnate akipan a vengveng ah khaktanna lockdown kinei ciat hi. Kisam mahmah lo buang kuammah inn pua na ngawn paikhiat kiphallo khop in kumpiten vaipuak tavuan la uhi.

Quarantine: Hih kammal a kizatna taktak pen, natna nei kha thei ding hi ci a ki-ummawh mite kepna ahihi. Pualam mi kuamah tawh kizopna neisak lo in sittelna tuamtuam tawh a ki en mite ahihi. A taktak in quarantine cih pen ei ut banga om theilo cihna zong ahihi. Tulaitak dinmun I et takteh i innkuan kuan a ki quarantine vive zong ihihi.

I gen nop thu in; social distancing na hangin, lockdown na hangin, quarantine na hangin bang thupha sang a, bang hamphatna ngah I hiam cih thu ahihi. Hih kammal 3 teng khat zawzaw I zat takteh a thuma genna tawh adeihna kibang a gen ihihi.

HEBRU MITE KUM 400 VAL KI LOCKDOWN:

Egypt gam ah Hebru mite kum 400 val na ki lockdown uhi. Ei a’ tamsa nailo ding hi hang. Malaysia bangah Ni 40 lian a cin ni (26.4.2020) ahihi. Kum 400 hun sungah Moses hong khang khia a, amite thuakna amuh ciang hotkhiat nopna lungsim nei hi. Nikhat Egypt mi khat le ama mipihte khat kilai mu hi. A mipihte mah gum nuam ahih manin tawmkha a sawkleh Egypt mipa si mawk hi.

A zingciangin hong vak khiat leuleu le mi 2 kilai mu a, a vakhen sawmleh khatpa in Egypt mipa na thah bangin hong that nuam na hiam na ci ek hi. Tua thu in Moses lungsim ah launa guan lian ahihmanin hong galtai a Midian gam va tung hi. Tua mun ah nasep a zon leh gancin ding mu hi. Micitak ahih mah bangin kum 40 sung cing zen hi. I gen nop masak tua kum 40 sung thu ahihi.

Moses adingin mipi tawh kigamla aom (distancing) pen kum 40 sung hizen hi. Mihing lam pan ngaihsun leng gampalak ah kum tuazah om ding pen thubaihlo ding ahihi. Ahizongin I tel ding athupi khat in I muh bat pih loh Pasian geelna khat om gige ahihi. Pasian in Moses kum 40 sung lockdown in a quarantine pen nam nih in kigen thei hi.

Khatna ah, sehnel gamsungah kum 40 sung mah kivei dinguh cih pen Pasian geelna sungah omkhin hi. Tuamanin Hebru mi tulzaguk val makaih dingpa (Moses) sinna tentan a pia na higige hi. Gam sungah anhuanzia, lupzia, gamsate tawh kidozia, ciangkhut zatzia cihte limtak in theisak khol nuam ahihi. etc.

Nihna ah, a zalian mahmah Egypt kumpipa mai ah “ka mite paisak in” ci a thugen dingpa ahihmanin lungduai dan zong sinsak nuam a, ama siamnate nusia in Pasian sung bek ah muanna a neih theih na ding a sinsak ahihi.

Pasian in tua bang ngimna nei in gamlak ah kum 40 sung a om sungin Moses in Pasian geelna thei peuhmah nailo ding hi. Amahle amah gamlak ah tuukem ciang bek mah in kimu mu lel khading hi.

Utenaute hih tungtawnin I kithapiak nop thu in bang hiam cihleh, Moses bangin gamlak ah I ki lockdwn laitak hikha ding hi. Lawmle gualte a kipan na it mahmah na innkuanpihte tawh na ki gamlat laitak (distancing) zong hi kha ding hi. Gamlak nuntak bang I sin laitak ahihmanin nuam khin khollo khamah ding hi. Ahizongin I phawk ding thu in tua bang hun sungin Moses masuan nuntak kalsuan na ding geel a ana buai mahmah Pasian pen tuni a I belh I biak a nungta Pasian ahihi cih mangngilh lo ding hi hang. Hih lockdown haksatna sungah Pasian geelna hoih om dinghi cih phawk ni.

NI 40 SUNG MOSES KI LOCKDOWN:

Hebru mite Sinai zangkuam hong tun uh ciangin amite mualbul zanglei ah nusia in Sinai mual tungah Moses ki lockdown dingin kahto hi. Sun 40 le zan 40 sung an nelo tui dawnlo in mual tung ah quarantine in va om hi.

Moses in a ki quarantine na pen manpha tak in Pasian tawh hunzatna in na zang hi. Tua banga hun a zatna le a ki lockdown na pen Makai khat hihna tawh amite maban saupi a khualna le Pasian a zahtak theih na ding uh a deihna ahihi. Ni 40 khitteh thukham suangpek tawh hong ciah suk hi.

ANIHVEINA NI 40 SUNG MOSES KI LOCKDOWN:

Mualbul zanglei hong tun ciangin amite bawng milim bia in na kun keii, bawngmilim phat in na lam ziahziah uh amuh teh aheh suaklua ahihmanin a khut sunga thukham suangpek leilak a dennaleh kitam hi. Tua ahihmanin a 2 veina mualtungah paito in mipi tawh kigamla (distancing)in ni 40 sung va om leuleu hi.

Moses bangin Makai muanhuai khat I suah theih nading le inn sung ah Pa muanhuai/Nu muanhuai I suah theih na dingin khatveivei Pasian tawh quarantine I neih theih ding pen thupi mahmah ahihi.

KUM 5 SUNG PAUL KI LOCKDOWN:

Pianthakna a ngah khittak ciang Pasian na’ a sep sung in a vek a gawm kum 5 sung bang thong nakia hi. Paul pen guta damiah a thongkia hilo a, Pasian’ thu genna hang bekbek ahihi. Thong sung lockdown na pan in laikhak 13 (epistles 13) hong gelkhia a, tuin thuciamthak sungah Lai Siantho in I tawi hi. A tawpna ah ki lockdown bek hinawnloin thong sung mah pan in ahingtangin ngawngtan na tawh mulkimhuai takin kithat hi.

Tuni ei ki lockdown ni 40 hipan a, haksa sa mahmah ta hi hang. Lockdown na hangin nasem I kuan theih loh hang’ an ngawl liang kuamah omnailo ding hihang. I nasep hunlaite sang bangin nek ledawn bang hauzaw leng kilawm kasa hi. Nasep zawhna hang bek tawh a kinungta hilo a, I sep theihloh, I sep zawh loh hun ciang dongin hong vak anungta Pasian ahihi. Topa phathuai lua hi. It huai lua hi.

TOPA JESU NI 40 SUNG KI LOCKDOWN: (Matthai 4:1-11)

Jordan gun pan tuiphumna a ngah khit ciangin ze-etna thuak dingin gampalak hong manawh hi. Banghangin Jesu’ ni 40 sung mipi lak pan gamlak om (distancing) hiam? Banghangin ni 40 sung ki lockdown hiam? Banghangin ni 40 sung ki quarantine hiam?

A tomtak in kidawng ni cileng; Jesu in kum 3 le alang sung na’ sem ding ahihmanin, tua cibang in hun ana zang ahihi.

• Jesu a gilkial mahmah khitciang Satan in va ze-et hi.
• Pasian’ Tapa na hihtakpi le hih suangte anlum a suah na dingin thu pia in.
• Pasian’ Tapa taktak na hih le …hih lai panin tuak suk in.
• Ka mai ah kun in kei hong bia lecin hihte khempeuh nangma tungah kong pia ding hi.

Covid-19 hangin bangtanvei hong kikhak lai ding theilo hihang. Hong hici toto leh ze-etna in I muh tangpi mah in hong nawk thei kha ding ahihi. Satan in Jesu a ze-et mah bangin na hatna, na pilna, na siamna khat tawh hong ze-et khak ding kidawm in. Na kim a om na lawmte khatpeuh ii hansuahna tawh na khialh khak loh ding kidawm in. Gilkial luat manin khatpeuh mai ah na kun khialh khakloh ding kidawm in.

Social distancing hun sung limtak in na zat siamleh mi manpha khat na suah theih na ding hun hoih ahihi. Lockdown hun sung limtak in na zat siamleh thumanpha tampi na theihna le siamna tampi na ngah na ding ahihi. Quarantine hun sung limtak in na zat siamleh na cidam na ding ahihi. Athupi pen in Pasian’ thuthuk na theih na dng hun-pha ahihi.

Pasian’ miten khumbitna pen Pasian tawh hun manpha pen in na zang ciat uhi. Bang teng in na hun na zang hiam?  Na hun zat nate na masuan ah na phattuam pih ding a om hiam? Pastor Jam Daniel – Zomi Daily