Zomi a kici kuate hiam? ~ JK Kam

Zomi a kici kuate hiam? ~ JK Kam

Zomite ki nahvawh dan; U-nau, nu-pa, pi-pu,ni-gang, sung-mak, suan-khak, beh-phung.., cih tawh aki nahvawh minam, khua le awsuah kidang mahleh behthu ah a kinahvawh diudeute ih hihna in khanggui khat ih hihna hong lak hi. Tualsuak awkaihte (Dialect) pen beh-le-minam min hilo hi.

Alomlom in kiphualin, khua ih sat, ih tenna leimaitang zuiin ih kiciapteh kik sawnna pen a sawtsawt ciang khua min hong suak hi. Tua ahih manin, ih um nuam kei phial zongin, ih minambup huam ding min pen ZOMI simloh ih paulap ding le ahithei ding min dang om tuanlo hi.

1. Khanggui kizom in “Zomi Chronicle” ih neih nailoh manin Zomi a omlo cih ding hilo zaw a, Zomi ih hih lam lahkhiat zawh ding hanciam huaizaw hi.

2. Zomite bek vansam (bul le dawn neilo) bangin ki-piangtawm vilvel theilo ding ahih manin ih bul leh dawn kan toto a, kaihkhop kik a kul hi zaw hi.

3. Mualpang langkhat “Sim” a langkhat “Zo” a ci Zomite ih hih manin, Sim–le-Zo cih kammal sangin tua kammal a nei Zomite om masa zaw cihna kitel hi.

4. SIMMI minam omlo ahih manin ZOMI zong lei-maitang mintam hilo pah hi.

5. “ZOMI” cih kammal bang hunin kipan cih ih tel zawhlohna in ei theihma hun sawtpi pek in Zomi om khinta cih hong lak hi. (Mosi in zong a lehkan mah hi)

6. Minam taangthu akikan khiatna bulpi ahi “Pau le ngeina” ah kibang sitset ih hih manin ZOMI ah minam khat ih hih na kilang hi.

Zopau & pianpih kammal;

1. Mi namdangte vanzat pawlkhat ih muh ciangin, akizatna leh a pianzia zui-in Zopau in min ih vawhtawm Na (Noun) pawlkhat om hi. Zomiten Zopau in min ih vawh bek hia, Zomi ii pianpih kammal hilo hi.

Gtn: Kawlthei, biakinn, thaltang, khedap, laidal, khasum, vanleng…etc,

2. Mi namdang tampite tawh ih zat khop pautaang (Common Words) te pen Zopau ih suah (adopted) bek hi a, Zomi pianpih kammal hilo hi.

Gtn: Mei, inn, lam, pa, dangka, sum-meet, Saban, bombi, mawtaw…etc,

3. Kammal pawlkhat pen (atunga No.1 & No.2 dan hilo) a kammal in deihna le khiatna nei beh nawn tuanlo in, mi namdangte tawh zong kizang khawm lo hi.

Midangten hong theihpih loh hangin eitengin tel sitset ihih manin Zomi ii pianpih kammal taktak ahi hi.

Gtn: Nouns:- Lei-tui, suang-sing, vok-gul, khe-khut, seeng-ip, suaklu-thei..,

Adjectives:- Dah-nuam, hau-zawng, pil-hai, vom-kang, dik-gilo..,

Verbs:- Kap-nui, khual-gawt, sut-hawm, duh-kih, lum-tho..,

NB: Hih No.3 a kammal tein khiatna le gencianna neiloin, Zomi pianpih pau taktak ahih manin nang zong hih mah na pau leh ZOMI taktak na hi pah hi. Chin State sungah kammal kibatpih mitampi om a, kammal kibang a tamna zah zui in amite pianna a bul kinai kik gige ding cih zong phawk huai hi. JK Kam