Zomi (300) Val Sang Akahna
Jenks Public Schools (USA) Pan ZEC (Malaysia) Hawhta Ding
(Hih thuthak pen, ZEC panmun neite, Sang naupangte Nu le Pa te leh a lunglut mipih akuama peuh tung theihsakna ka gawmkhop ahihi. Laigelhzia ki telpih ni.)
Tulsa Khuapi sung aa teng Zomi naupangte ii pilna sinna Jenks Public Schools (JPS) Sangte-ah, High School (Tan 9-12) Sang naupangte Manglai a hilh Sianu Mrs. Pamella Garvin pen, Malaysia aa Zomi naupangte tawlngak hun omlo-in kum (7) sung a pantah khin Zomi Education Center (ZEC) a vaan dingin JPS thu vaihawm makaite-in a sawtlo-in Malaysia paita ding hi.
2013 lai pekpan hanciamna kinei toto hi aa, ei lampan ki thalawp ngaklah mahmah hita leh 2014 sungin hong piangthei pan ahihi. Hun saulo sungkhat ahih hangin sum tampi a beiding khualzinna leh a nek le dawn vai khempeuh JPS in sikding cih thukimna March 26, 2014 ni-in kipsak zo pan uhhi. Tuazawh a sawtlo-in mipi muh dingin zong facebook pan tangko pah uhhi. Zomi te vaan ding pen, amau Siate khat le khat zong ki lungdampih mahmah uhhi. (Ka principal nu bangin hong lungdampih-haza liangin amah zong painuam mahmah, ci hi.)
Veina leh sepkhiatna kigawm icihte leh Mrs. Pamella Garvin ii thu atomin
Hih ZEC a hawhtheihna ding vai pen, amah ngiatin Zomi naupangte leh naupangte mailam ding vei masa hiphot hi. Sang panin, nang va pai-in Zomi te vei huai, Zomi te va pantah in aci ngei hivetlo hi! A vei khitteh amah ngiatin semkhia ngam, khualzinin lamlah huaite lamlah ding kiphal hi. Tua nu, tua pa pai leh ee, cilo hi. Tua veina leh amah ngiat a kipiak sawmna pan hih vai hong tangtung theiding suakpan hi.
USA gamah Sang Sia septheihna ding license tawi hamtang kul; License tawi zawhna ding ciang pilna sinna pen Master ciang kahte bang bekin mun kician ah Sia semkha bek uhhi. Sianu pen Manglai hilhna lamah Bachelor khitteh Master zosa khat hi-in, a pasal engineer khat leh a tate tawh innkuan nuam nei khat ahihi. Private Schools ah kum (4) val Manglai hilh ngei aa, Middle Schools ah kum (6) val leh High Schools ah kum (6) val lai hilhkhin hi. Manglai hilh cihteh, a mangkangte hilh sang bang Zomi te dan aa 
gamdang mite lim hilhzaw, kivazaw lai hi. Manglai bek hilhlo leuleu hi. Subject dangte zong, gentehna GED phi nuamte aa ding khawng hilhthei leh lamlak thei mahmah lai hi. (Deihsakna aneih zia zong tuciang kum khat val kizopna sungah tel muh sinsen ing. Hih ZEC hawhna ding vai bekbek, omna kibatloh tawh e-mail zang aa ki thuzakna-ah kum khat val, nipi kaal sim phial mah Zomi te aa ding ahun pia ngam, pia zo mahmah mawk hi! A geelzia ding khat kiging khollopi genkhia mawkmawk masalo-in, amah ngiatin semkhia ding ahih kei leh vision hoih a muhtheih man, athu le vaite a theihman peuh tawh vaihawm sawm hetlo hi.)
Jenks Public Schools leh Zomi Sang naupangte thu atomin
1908 kumpan a kipan ahi Jenks Public Schools ah Tan Lang pan Tan 12 kikal Sang naupang kigawm tul sawm (10,000) val pha hi. Sang Sia vekpi kigawm 529 pha hi. 2009 kumin a (100) veina graduation ah Senior (Tan 12) bekbek (715) in Sang zawhna laipi leh lukhu nelkai ngahthei uhhi. Thukhun tawh ki makaih siamna leh lai sinzia, a laisinte mahmahah a minthang Sang khat ahihi. A beisa Laisin kum 2013-2014 ah Zomi (Tan Lang pan Tan 12 akah kigawm) 300 val tham pha ding hi. Tulsa ah Zomi ki tun’ behbeh ahih manin, ki behlap den ci uhhi. Nung kha (2014 May) sungin Jenks High School pan High School zawhna lukhu nelkai leh Diploma laipi a ngahthei Zomi (22) pha hi.
Banghang ZEC ah pilna sin Zomi naupangte vei uh
2013 March kha sungin a masa pen JPS thu vaihawm pawlkhat leh Sianu tawh kimeltheihna om masa aa, tuazawh aa kipan ki thuzakna leh amau lampan galtai Zomi naupangte pilna sinzia, ZEC vaihawm zia aa kipan thu tampi a hunhunin hong dong zelzel uhhi. Manpha sa mahmah uhhi. (2010 June kha masiah volunteer takpi tawh ka naupangte uh hunbit lai hilh in Sang vaihawmna sumbeite haksa pi-in hanciam hi ungh, kacih leh, ZEC Sia khat pen hong zahtak semsem bilbel uhhi. ZAM 2006-2010 mapina nuai aa nasem khat aa ding a lamdan’ loh hang US gammite aa ding na lamdang mahmah in, bang ne, bang dawn, kua khawngin hong panpih hiam cih hong dong phapha uhhi. Hong vei tektek zawlai uhhi.)
JPS in hih bangin Malaysia aa omlai Zomi naupangte aveina pen, ZEC in Zomi naupang tampi JPS ah pilna sinzom thei dingin a pattah khitna zong ahang khat ahihi. JPS kah laitak ZEC 2007 – 2011 Sang naupang tawm hetlo hi!
Bang ngimna bulpi tawh ZEC hawhding
English Language Development Program tawh Zomi naupangte mailam saupi aa ding, Zomi ZEC Sang naupang a za tampite aa ding hong makaih, lam hong lakna ding uh lunggulhna lianpi ahihi. Zomi naupangte ii Mangpau, Manglai sinzia ding makaihna leh, Mangpau, Manglai thupitnate hong laknuam masa uh aa, Subject dang tuamtuam leh Sang khan sung ki makaihziate, Sang naupang makaih ziate zong hong laknuam uhhi. (Thukhat ah, gam minthang US pan hong paiding ahih hang UNHCR vai, gamthumna tun’na ding vaite thei hetlo hi. Tua mah bangin, US gammi cihpah sam hang piakkhiat nasep nam khat ahi laihilh nasep sem mi khat ahih manin laihilh zia leh laihilhna simloh ZEC hong panpihzo hetlo ding aa, a giahna ding zong ZEC-T aki kipsak dektak man hi aa, piangsamlo ahih manin hotel hiamkhatah agiah kulmai kha ding; Ka kikup laitak uh hiphot hi.)
Vaihawm masak hunbei mahmah hamtang
Lai hilhzia, bang laite sinsak, Siate ii nasep zia cihte aa kipan galtai naupangte panpihna thu tampi Jenks Public School pan hong dong toto uh aa, amau kiang akah laitak ahi hetlo Zomi te zong vei uh ahih manin angtan’ huai mahmah hi. 2013 kum kipat lam pek pan ZEC hong hawh nuam uh himah leh, vanleng sap leh a bei zah ding teng board (thukhentatte) tung ngettheihna ding ki hanciam aa, ZEC leh Malaysia Zomi khangno-naupangte thu le vai kicing takin pulak masak ding kisam ahih manin kuppihna kinei toto thei hi. Kum khat dektak bang hong beiziauh khitteh 2014 January kha sung aa a beiding teng a ngetna kibawl pen, March khabei kuan teh piakding khentatna neizo pan uhhi.
Zomi naupangte leh ZEC Siate mailam aa ding thupi
Kum bangtan taam ding kitheilo Malaysia ah, pilna leh theihna sinlo, Sang akah pilna-siamna sinte tawh kithuahlo Zomi naupang khat ii mailam ding na lunggaih sak ngei hiam? Hih naupang khat, lai leh siamna tuamtuam hilhlo, ih Zolai, ih ngeina, ih tangthute hilhlo-in a kum cingsak toto lel ding ihiam? ZEC in kum (7) val Zomi naupangte a pattahna sungah, aki simzo nawnlo gualzawhna leh minam hong tawisang, hong pulak zo zahin matutna kicing mahmah ki neizo khin hi. Gamthumna atungsa ZEC Sang naupang za tampite lawhcin’na tuamtuam zong ki mumu, ki zaza khin hi. Gamthumna lunggulhin aa omlai Zomi naupangte, gamthumna a tun’ma-in a kicingthei pen leh a kicing zaw semsem pattah zawhna neihding lunggulhna hiden hi.
Zomi naupangte aa ding bek ngimna tawh hih program/vaihawmna ki hanciam hetlo hi. ZEC hunbit Sia, Sianu te aa ding zong, USA khawng ah aki nei tangtang professional development ci uhin, naupangte laihilh zia, makaih ziate a picingzaw aa kihilh/kikupna, ahih kei leh training hun zong, Sianu Mrs. Garvin tawh picing takin ki vaihawm ding hi. Bek thamlo-in, gamthumna mitsuan vive ihihna zui-in, gamthumnate-ah ZEC Sia/Sianu khatin ama mimal maban leh ngimna, tupnate koici hanciam huai cihte aa kipan, bangci lampi, bangci nasepte, bangci Sang zopna ziate kigin’kholh theihna om ding hiam cihte Sianu in picing takin hong makaih ding hi. (Kei mahmah mimal ii tuahkhak thu tampite zui-in, hih education lam nasep ih hanciam teh Malaysia aa ZEC hunbit ih sepzia, ih hanciam ziate leh USA aa High School ah ih sepziate, naupangte panpih ziate aa kipan, ei mimal ngimna/tupnate zong bangcidan lampi zuihhuai cihte, ZEC Siapite tung Sia khempeuh aa ding a tomkim thei penin ong gelh/khak toto ding hi’ng. Tuatung tawnin, USA ah Sang lam ih sepsawm kei leh zong Sang pilna sintheihnate aa kipan ei mimal nasep/pilna mabante Sianu Mrs. Garvin tungah sinhuai, dothuai thu tampi mukhol pah ding hi uh teh.)
Program Thuvanpi ding Sia Tuang (ZEC-T)
Hih program/project vai khempeuh ah, Mrs. Garvin ZEC a hawhsung teng vai om khempeuh aneng asii a makaih ding, a thu vanpi ding ZEC Sia sungpan nasep kum a tampen leh education vai a telpen khat ahi Sia Tuang in ahihtheih tawp tawh hong hanciam ding hi. A hanciam khin hizaw aa, Mrs. Garvin a khualzinna ding sum le pai a
kipiak khit taktak buang teh bel, thu le vai a kisam a om leh Sia Tuang ka dotzel ahihi. Bang ni koi Center ah hunzang ding, bang ni ZEC Sia khempeuh tawh hun zangkhawm ding cihte aa kipan a kicingin ZAM leh ZEC Siate tung a sawtlo-in ong khakzawh sawm ingh.
Tua tawh kizui-in, adeuhdeuhin ZAM pan ahi zong, ZEC Head Teacher te-in ahi zongin ma na pangkhawm ding na hih manin vai haksa lua omlo dingin ka lamen hi. Tha lawphuai sa mahmah ing.
Angtan’ huai theihsakna
Hih amasa ahi USA aa High School minthang khat pan ZEC aa pilna sin Zomi naupangte vaan ding thu manpha pen a tomkim theithei-in kong gelh hi. A taktakin, hih thu hang tawh Zomi khangthak naupang tampite maban leh Zomi te ii thu vaihawm zawhna namdangte, zumpite-in hong muh semsem ziadingte a hunhunin ong gelh-hanciam ning. A masa-in, UNHCR-Education panin zong, Sianu tawh kimuh khak hun ding na lawp mahmah ungh, hong cikhinta hi. ZEC in UNHCR tawh lengla thupi kimu sak cih vaihawm zo leuleu ding hihang. Ngimna leh ih maban lunggulh tampi omlai hi!
Tg. Kham @ Khampi
Comment piaknop aomleh...