Philippines ah Factory innkhat meikang, mi 72 si

Philippines gamsung aom Rubber Slipper Factory akici buangnai khedap bawlna innpi khat meikang ahih manin asi mi 72 valkhinta cih Reuters pan kiza hi. Philippines gam ii khuapi Manila khuasung ah Wednesday ni thupiang hi a, gamsung aom Police Department te in amanlang theipen in meikatna apiangsak te Action kalading uh ci in genkhia uhhi.

Hih meikang inn pen dawldih apha hi a, Fire Official Sergio Soriano Jr. in agenkhiatna ah asi aluang aki laikhiazo teng banah amangthang zong mi 13 bang omlai cihi.

Police te genkhiatna ah hih meikatna akipatna pen Factory kongpi ah Welding kapna panin mei akilawh toto hi a, nasiatak in apuakkham zong om cihi. Tuapan in meikuang kipan a, meikhu zong vomto neinai cihi.

Philippine National Police ah Acting Director asem ahi Leonardo Espina in agenkhiatna ah hihvai tawh kisai in mi tampi tak in sihlawh ahih manin Factory vaisai thunei te dan kipia hamtangding hi cihi. Accident aciphial uhzong in kidawmlo uh hiding hi cihi.

Philippines gampen huihsia guahsia inzong nungdiak mahin anawkkhin hi a, tuaban ah meikatna tawh mi tampi in sihlawh leuleu uhhi. ZD Sawltak