Zolia te theih ding thu pawlkhat ~ NK Khanno

Zolia te theih ding thu pawlkhat ~ NK Khanno

1) Zanhun laitak in setkahlei tawh a dawlsang innpi ah na theih ngeiloh pasal khat tawh a kahkhawm ding dinmun (situation) ah na om leh;

Sehkahlei khansung ah lutsuk in. Tua khit ciangin na pai nading inndawl tun madong dawl khat khit dawl khat mekto to in. Gtn. Na pai nading dawl 9na ahih leh dawl 1 na pan dawl 2 tua cih bangin dawl 9 na dong mek in. A dawlsim in khawl ding kihong ding ahih manin kuamah in bangmah ong cih gamlo ding hi.

2) Inn ah nangguak bek na om laitak khualmi (theih ngeiloh mi) khat honglut tumin buaina khat bangkhat a hong hih sawm leh;

Anbuk lam ah tai in. Banghang hiam cih leh zasan vui koi ah koih, temta koi ah koih cih pen tua khualmi sangin nang theitel zaw ding hi teh. Hih van te in ahih leh mikhat thuakkhop ding liamma te pia thei ahih manin nanglenang na kidal na ah hong hu mahmah ding hi. Tua ahih kei leh zong kuangle bel te tawh denggawp kawmin huhna genin kiko khiat hun ding hong ngah sak tuam hi. Na kiko beba na awte pen migamtat te lau pen thukhat ahih lam manggilh kei in.

3) Zankhim ipsik lak ah Taxi, cycle carry tuang ding na hih leh;

Kantel nate le a kiva mite genna ah motor sung na lutma/cycly tung na tuanma in a motor/ cycle numbat ciamteh in. Tua khit ciangin na innkuanpihte khat ahizong na lawmte khat ahizong phone hopih inla (i) Bang motor/cycle, (ii) Numbat bangzah, (iii) bang mel, (iv) bang hun, (v) koimun pan ong pai ding cihte gen in.

A zenzen in phone sapna hamsa in kingah zolo ahih phial leh zong phone a kiho thei bangdan khat in kineih khem in… Na motor/cycle hawlpa in hih thu athei amah simloh midang khat zong om hi cih thei ta ahih manin siatna khat peuhpeuh a bawl ding kidawm pah dinghi.

Nang tungah siatna/khemna khat ong bawl leh ama tuahkhak ding thuzong baihtuanlo ding cih thei ahih manin na painopna ah tangtak in hong puakpah ding hi. Hi bang dan tawh Potential Attacker siatna bawl thei mihing khat pen nang aa ding honpa Protector khat hong suak pah hi.

4) A zenzen in Taxi driver pa in mi omlohna lampi ahkl na painopna lampi ahilo lampi dang khat tawn in… lauhuaina kuam ah tung hi ta’ng ci’n na lungsim ah na theih leh;

Kantel nate le a kiva mite genna ah na khutkhai ahkl na ngawng aa na vialh ngawng-awh zang inla driver pa gawl a nung panin gakcip in.

A zenzen in ngawng-awh, khut khai cihte omlo ahih leh motor hawlpa i puan-ngawng panin lenin la a nungpan in kai in. Tua hi leh atungnung bilpak in motor hawlpa ngawn kigaksak ahihmanin na suahtak theih nading hunpha khat hong ngahsak thei hi.

5) Zanlam nasepna pan ahizong vaikhat peuhpeuh hangin inn ciah hak hun ah na nung pan in hong kizui hi cih na theih leh;

Sai khat ahkl inn khat ah lut inla na tuahkhak thu gensiang inla huhna gen in. Zan lua ta ahih manin sai kikhak, inn sunglut ding zong piangthei nawnlo ahih a leh ATM setkhan sung ah lut in. ATM box simphial ah security camera kithuah ahih man ahi hi. Hi bang dan na hihna pen mi kithei sak nuamlo migongtat te khutsung pan hong suakta sak le hong hu tuam ding hi.

Hih lai kasim khak ciangin Zomi numei te adiakdiak Zogam, Kawlgam ah zinsuk zinto te, Siamsin liapal te, sumbawl paibawl zolia te ahizong, gamdang ah a om zolia te ahizong amaute theihhuai thuhoih mahmah khat ahih manin zolai inkong letkhiat kik ahi hi. Nang zong na sanggamnu, na lawmnu, na nuno, na nino te theih dingin na share sawn lai in cih lunggulh na leh deihsakna taktawh kongkun hi. Ref: Shan News, Lailet: Nk Khanno

*Photo: January – October 20, 2014, Kawlgam, Yangon gamke sung bekbek ah Numei kibuan thupiang zah