President Joe Biden in Executive Order abawl thakte

President Joe Biden in Executive Order abawl thakte

President Joe Biden in President Office ah ni khat a lut cil ni-in anuai abangin Executive Order 17 thukimna leh thupiakna minkui hi.

1. Trump kumpi in a thusim khol loh US kumpi inn leh nasepna khempeuh ah muktuam bulh kim nading.

2. President Trump in a nusiatsa World Health Organization tawh kizom kik ding.

3. President Trump hun a om lo ama aituam Covid-19 Office tawh kisai zum thak khat hong khia ding.

4. March kha bei ma in a beisa kum 4 sung President Trump makaihna tawh a dinkhawlsa gamsung kumpi nasepna tampite hong kik ding.

5. President Trump in a thukimpih het lohsa sangnaupangte leibate khempeuh maisak siang ding.

6. President Trump makaihna tawh US in a tawpsansa Parris Agreement kici leitungbup khuahun kikhelna encik pawlte tawh kizom kik ding.

7. President Trump in US gam adingin nisim datsi/diesel pipa 830000 bang a laklut theihna Keystone XL Pipeline project pi dinkhawl ding.

8. President Trump makaihna tawh tawlkhat sung a kizang kik pan Nix the 1776 Commission kici Pasian thu kihel conservative muhzia pawlkhat sanginn laisinna ah a kizangte phiat siang ding.

9. President Trump makaihna tawh US om theihna ding lai a neilote Census mipi kisimna ah hel lo ding a kicisa pen tu-in hel kik theihna ding.

10. President Trump in a phiat sawmsawm a phiat zawh lo DACA kici a neulai a US tung a nu a pa amau gam a kipuakkik khinte leh a kipuak sawmte tate tungah huhna a tam theithei pia ding.

11. Terrorist mite dalna ding ci-in President Trump in Muslim gam pawlkhat pan US hong zin theihna ding VISA lampi a khaktansa khempeuh hong kik ding.

12. President Trump in nasepna phual leh inn phualzang ah gamdang mi lai neilote zon theihna ding, mat theihna ding leh a gam uh puak kik nadingin immigration officers te phalna a piak pen dinkhawl phot ding.

13. Mexico gamgi dung pan lai nei loin mi tampi a guk a hong lutsimna gamgi teng ah President Trump in dai kai-in kulhpi a bawlna nasep khempeuh dinkhawl phot ding.

14. US gam sungah lai nei lo mi pawlkhat amau gam a kipuak kik dingte puak kik nawn loin nasep theihna ding vaihawmsak ding.

15. LGBTQ (lesbian, gay, bisexual, transgender and queer) kici ahang tuamtuam tawh numei/pasal ngeina kip a neilo a tuampiante kuaman a deidan theihlohna ding leh suakta tak na a septheihna ding uh.

16. US gambup kumpi nasem khempeuh in amau zum nasepna pen amau aituam met nadingin zang thei lo ding.

17. President Trump vaihawmna tawh sep ding geelna a om lai a kisem man nai lo khempeuh Biden kumpi thak in a kipsak masiah dinkhawl phot ding. The Tedim Post