Sum khakna Zelle, Venmo, Cash App tawh kisai atheih huai thu te

Sum khakna Zelle, Venmo, Cash App tawh kisai atheih huai thu te

Nung deuh in U.S Congress pan akibawl/passed American Rescue Plan tawh kizui in tu kha January 1 ni pan kipan in “payment apps” te ahi PayPal, Venmo, Cash App, Zelle, Google Pay cih te zangin kum khat sung (gross payment) sum $ 600 pan atam zaw akhak ten IRS te tung zasak (report) kul dingaa kum bei ciang 1099 form fill-out kul ding hi ci in CNN, NBC aa kipan News pawlkhat ten suak sak uh ahih manin mipi te patau mahmah uh hi. Ei mi sungah zong Zelle leh Venmo tawh sum khak tam i hih manin kipatau tek hi.

1) Nasep (Businesses) te in PayPal, Venmo, Cash App, Zelle cih te zangin kum khat sung $600 pan atungsiah business transactions tawh akikhak khempeuh pen “Income” in kituat ta ahih manin 1099-K form zangin IRS tung a zasak tei tei kul ding uh hi. Abeisa hun in Businesses te in 200 transactions leh atawm pen kum khat income $20,000 angah uh leh bek IRS tung a puak (report) pan uh hi aa, tu aa Tax Law thak tawh kizui in kum khat sung $600 pan atungsiah a report uh kul ding ahi hi.

2) Ahi zongin mipi te in Zelle leh Venmo cih te zangin khat leh khat sum kikhakna te leh Fund sum kikhak te, Bank khat leh khat Zelle or Venmo zangin i lawm te, i innkuanpih te sum i khak te kihel lo dingaa, IRS tung zong zaksak (report) kul lo ding ahi hi. Ahang in hih sum kikhak te pen business transaction hilo aa “income” in kituat loh hang ahi hi. Tua hi aa, Zelle or Venmo zangin i sum khak te Businesses tawh akizawi tawn kei nak leh patauh kul lo ding ahi hi.

3) Zelle Company te suah sakna ah Zelle application zangin sum kikhak peuh mah Zelle te in IRS tung 1099 zangin ki report lo ding hi ci in amau website tung pan gen pha pha uh hi.

4) Bank te in Business tawh akibawl (setup) account te zangin Zelle tawh sum akikhak te kum bei ciang 1099-K hong khak ding uh aa, ahih zongin personal account (Checking, Saving) peuh mah tawh akibawl-setup te Zelle or Venmo tawh sum akikhak hang 1099-K hong khak sak lo ding uh hi ci in Bank of America thu nei ten genkhia uh hi. Tua hi aa, tulai tak i zat Bank account te pen Personal account (Checking, Saving) maw, Business account maw cih theih ding kisam ding ahi hi. Personal Account ahih nak leh patauh kul lo ahi hi.

5) News pawl khat ten hi thu asuah sak uh hang IRS te in tuni ciang dong amau website tung ahi zongin, lai tawh ahi zongin officially aa genkhiatna, suahsakna nei nai lo uh ahi hi. Ahi zongin asau vei loin IRS website tungah Form 1099-K nuai ah hong behlap ding uh hi.

Atom in gen kik leng Zelle or Venmo zangin sum kikhak khempeuh pen Nasep – Businesses (business transactions) tawh akisai kei nak leh Tax piak kul lo, IRS te tung puak in report kul lo ahi hi. Businesses i cih ciang company nei te leh Kumpi tung registration bawl aa nasem te acihna uh ahi hi. Tua hi aa, mipi te in Zelle or Venmo zangin personal aa, sum i khak te Tax piak ding, IRS tung report ding cih te patauh kul lo aa suakta takin zat ding ahi hi. Ref: CNN, NBC, Epoch Times, Newsweek, CNBC, IRS

More: US News Update: September 02, 2021 ~ Thomas Mung

** Tu nipi sung US & Kawlgam News update LIVE kikhah khia ding ahih manin kimu tek ni… ** Friend requests hong bawl tampi om aa, check man nai lo ka hih manin hih ka Facebook pen “Follow/Following” nong bawl sak ciat ding uh hong thum nuam ing. Thomas On Sian Mung (Thomas Mung Guite) Washington D.C, January 24, 2022. MOMNO Media & Museum