Zolai ka gelh ciangin ~ Pau Gin Mang

Zolai ka gelh ciangin ~ Pau Gin Mang

1. Chin State Zomite’ zat niloh ahi, minte ah Pau Gin Mang (Thomas Pau), Tuithang, Tedim Uksung, Zogam…cih bangin ka gelh ka kampau hi. Ahi zongin Vaigam Zomite’ zatdan ngeina ahi, Jamkhuathang Hatzaw…cih bangin a mun zui-in ka zahtaksak zel bilbel hi.

2. Kei pen a neu a lian in Thangta’ Pa, hong cih tei hangun, ka khangual pan kei-ii nuaisiahte bek, tua ii nu, tua ii pa ci-in ka gelh ka kampau hi. Ka uzaw pipite…tua ii nu…tua ii pa, ka ci iah-uah vial keizaw hi.

3. Khua leh namkete’ zatdan kidawmtak mai-in kei zong ka zuul pah hi. Gtn. Dim kampauten Deuh munah Diak pen ka zuul pah a, Sihzang kampaute in “Sihzangkam” ci lianin Zo kampaute in “Zoham” a’ cih dan tekin thu ka genna ah amau’ zak ding ahih nak leh Zoham, Sihzangkam, Dimpau…cih bang danin ka zuih pih hi. Sihzang munah Sihzangham cih ni tapa ka nei ngei kei khinkhian se hi.

4. Ong leh Hong: Mi tampi in a zat ziauziau ahi, “Ong pia ve, Ong theisak ve” cih mun ah “Hong…” ka zat sesena a hang pen Lai Siangtho leh Biakna Phatna Labute lai picing taktakte ah kuamah in “Ong…” kizang het lo hi. TDB ih cih, Tedim Bible taamsipipa Pu Rev. Kam Khua Thang in
“Ong…” peuh na zang nemnum vet lo hi.

Ngaihsun mah ve! “Ong taisan ken migi Topa…” leh “Hong taisan ken migi Topa… koi thupisuah, picingsuah zaw hiam?

5. Le, Leh zatdan: Tu lamlam teh English And munah ” Le” kizang keii hi. “If” munah “Leh” kizang hi. Tua hi leh English “And ” pen “Le” cih veuhvauh lah om tuan lo ahih ma’nin “Leh” mah ka zang kop lel niloh hi.

6. …nading… zatdan: Hih pen TDB ii zat mah ka siksan zaw hi. …nading…ci-a ih gelh ciangin, laikam (literary style) tawh kigelh suak nawn loin paukam (spoken form) tawh kigelh hong suakta hi. Bang tawh kibang hiam cih leh:

Khua…kici minte ah…Kho ahkl Khaw cih bangin a’ awsuah paukam tawh a kigelh zawk mikmek tawh kibang hi. Gtn. LT Kamkhen in “Khuasiam Pawi” a’ cih pen a’ awgin ih zak teh “Khawsiam Pawi” lianin hong ging hi.

Awsuah zui zaw ding maw, a khiatna zui-a gelh zaw ding? “Khaw” in bang khiatna nei a, “Khua” ii khiatna bang hiam? Ka Lungdam, Pau Gin Mang (Thomas Pau) Creation Family