Lungdambawl thu laigil – aban
5. Kha Siangtho Piansak: Lai Siangtho a um mello pawlkhat in tua na Zeisu cih uh zawlta hilel lo maw, cithei uh hi. Ahi zongin ei Lai Siangtho a umta dingin Zeisu pen Kha Siangtho na sepna hanga hong piang ahih lam Lai Siangtho in hong hilh hi(Matt 1:18-25). Kha Siangtho nasepna hangin Mary gai a, tua naungek pen Kha Siangtho hangin hong piang ahi hi. Kha Siangtho in nasep ding pawlkhat nei hi, ci-in Jew mite in upna nei uh hi. Kha Siangtho tawh kisai Jew mite ngaihsut dan pawl khat in:
(1).Kha Siangtho in mite tungah thuman hong puak hi, ci-in ngaihsun uh hi. Kamsangte thugen dingte Kha Siangtho in na hilh a, Pasian mite a gamtat ziading a hilh PA in Kha Siangtho ahi hi. A khangkhang in mite tungah thuman thutak hong gen PA in Kha Siangtho ahi hi. Zeisu mahmah in zong mite tungah thuman thutak hong hilh hong gen hi. Tulai Christian a kici mi tampi tak in zuathu gen pen ann neksang, ihmutsang in nuam sazaw phial le uh kilawm hi. A sunguah Kha Siangtho tektang taktaklo, om taktaklo maw, khatpeuh mah hikha ngel ding hi.
(2). Kha Siangtho in mihingte tungah Pasian’ thuman hong tunpih ciang bek hilo in tua thuman I muh ciangin a maan ahih lam I theihna dingin hong huh hi, ci-in Jew mite in ngaihsutna nei uh hi. William Barclay in thuman I muh theih na dingin Zeisu in I mitte hong hong sak hi. I theih lohna hangin mittaw ki bangin lungsim manlo I neihna hangin lam kikhial in eima pumpi deihna leh I mawhnate in I lungsim hong mialsak hi, cih agen pen hi kasa mahmah hi. Mi piangthak Kha Siangtho a nei khat leh a neilo khat ki thuah leh nuam kisalo tuak uh hi. Pu. Thang Za Khen in mi piangthaklo te’n Kha mite ci-a, I theih loh kal in hong huatbawl in eitawh omkhop ki thuah pen nuam asak hetloh mah bangun Kha mite’n zong piangthaklote tawh kithuah pen Kha mangthang I veiman hikei leh nuam a kisalua hi tuanlo hi, cih agen kaza ngei hi. I gennop na ah mi piangthak taktakte bel thuman thutak tawh nungta nuam, kalsuan nuam ngiat in, thumanlo pen zanuamlo, zuathu gennuamlo aci nuam I hi hi. William J. Locke in I lungsim sungah Kha Siangtho hong om ciangin a man tak-in thu I muh theih na dingin I mitte hong hon’ sak in I muhzia hong ki lamdang sak hi, naci hi. Na piangthakma leh na pianthak zawh na lungsim leh na gamtat zia aki lamdang hiam?
(3). Jew mite upna ah Kha I cih pen leitung a piangsak pa, nuntakna hong piapa hi, ci-in um uh hi. Jew mite in Pasian Kha pen leitung nate piansakna tawh na kizom sak uh hi. Pasian in ama Kha zangin leitung paingsak a, a kipatcil in tuipi maitang tungtengah Pasian Kha in nasem in loeitung hong piangsak ahi hi(Pian 1:2). Laphuak pa khat in Topa’n kampauna tawh vantung piang a, ama kam panin husan’na tawh vantung nate piang hi,(Late 33:6) naci hi. Hebrew lai ah ruach kammal pen Greek lai-ah pneuma cih kammal hi-a, husan a cihna zong hikhawm hi. Lai Siangtho in nahu nasan’ khiat ciangin amaute aki piangsak hi a, nangmah in leitung na bawlthak hi(Late 104:30). Job in, Pasian Kha in kei hong bawk a, Vanglianpa in kei tungah nuntakna hu hong pia hi, naci hi(Job 33:4).
(4). Jew mite in Kha pen piangsak kik, nungta sak kik theihna nasep zong semthei hi, ci-in um uh hi. Ezekiel Lai Siangtho sung I sim ciangin kuampi khatsung ah guhkeusa aom na thu leh tua guhkeusa te hong hin kik na thu zong na gen hi. Pasian kampauna a genna ah note hu kong guan dinga, note kong nungtasak kik ding hi, naci hi(Ezk 37:1-14). Jew mi siate in paunak khat nei uha, “Pasian in Israel mite tungah hih leitung ah ka Kha in mite sungah pilna hong guan a, mailam hun ah ka Kha in note hong hingsak kik ding hi, “cih upna khat na nei uh hi. Mawhna sungah mite misi bangin omin, gimlua in lawpna mel nei nawnlo in a lungsim uh leh a pumpi un bangmah ngaihsun zo nawnlo in aom laitak Pasian Kha in nuntakna thak, lawpna thak hong guan thei hi. Zeisu hong suahna hangin cikmah a, a kisem ngeilo na tampi, Pasian Kha in hong sem a, mite tungah thuman hong tunpih in tua thuman aman ahih lam I theihna dingin tua Pasian Kha mah in hong hilh hi. Leitung piansakna ah Pasian in a Kha a zat hi-a, mihingte I ngeina bangin I om kik theihna dingin lungsim ngaihsutna a sisa sung panin lawpna leh thathak ngahna thak hong guan in Pasian Kha Siangtho mah ahi hi. Hun neihteh aban zomlai ni.
Khaibawi
Comment piaknop aomleh...