A hoih penpen nihna tawh lungkim in (Content With the Second Best)

A hoih penpen nihna tawh lungkim in (Content With the Second Best)

“Asia gam sungah thu a hilh ding uh Kha Siangtho in phal lo ahih manin Frigia le Galatia gam sungtengah a zin uh hi. Mysia gamgi a tun uh ciangin Bithynia gam sungah lut dingin kithawi uh a, ahi zongin tua gamah a pai ding uh Jesuh’ Kha Siangtho in phal lo hi. Tua ahih manin Mysia gam nawkin pai uh a, Troas khua-ah a tung uh hi.

Troas khua-ah a tun ni zanin Paul in maang mu a, Masedonia gammi khat in ama kiangah, “Masedonia gamah hong pai inla, kote hong huh in,” ci-in a thum hi. Paul in maang a muhkhit phetin, tua lai-a om mite kiangah lungdamna Thu a hilh dingin Pasian in eite hongs sam hi, ci-in ngaihsun ka hih manun Masedonia gamah a pai dingin ka kithawi pah uh hi” (Sawl 16:6-10)

Leitungah ei mihingte in “penpen” (best) – a hoih penpen, a pil penpen, a siam penpen., ect;) cihte ih deih ciat uh a, tua ahih manin ih nuntakna sungah ih hih nop penpen, ih suah nop penpen, ih lunggulh penpen, ih pahtak penpen cih bang danin “a penpen” (best) khat ciat ih nei ciat kha ngel ding uh hi. Tua mah bangin ih Lai Siangtho sung en lehang Paul’ zin nop penpen na mun (best) in Bythynia gam ahi hi. Ahi zongin Kha Siangtho in Paul a zinsak nopna mun ahi a zin nading a hoih penpen a nihna mun (second best) in Troas hi zaw hi.

Kha Siangtho in Bithynia lam a zin ding a phal lo ciangin Paul in phun lo puam loin Pasian’ genkholhna mun, ahih kei le ama’ zin nop penpen a nihna (second best) mun ahi Troas lamah lungkim takin a zin ciangin Pasian in a nasepna thupha pia-in lawhcinna ngah veve hi cih kimu thei hi. Tom gen lehang Paul’ zin nop penpen na mun (best) in Bithynia hi a, a zin nop penpen nihna mun (his second best) in Troas ahi hi.

1. Paul’ zinnop penpen na mun (First Best)

Kha Siangtho in Asia gam sungah Pasian’ thu hilh ding a phal lo manin Frigia le Galatia gam tengah Paul le Sila zin kawikawi uh a, Mysia gamgi a tun uh ciangin Bithynia gam a lut sawm uh leh Jesu’ Kha Siangtho in phal lo hi ci hiau mawk hi. Bang cih nawn ding! Cih nading thei nawn loin a ut a, a ut kei zongun Mysia gam nawt suakin Troas ah a paisuk vingveng uhi (v.6). Troas a tun uh ciangin zan lai-in Paul’ maang sungah Masedonia (Macedonia) gam panin mi khat in a gam vuah hong zin inla hong huh in ci-in thum hi (v.9). Masedonia gam ih cih pen tuhun Europe gam hi a, Pasian in Asia gam tangin Lungdamnathu a za nai lo munah Europe gammial nasepna (Europian mission) a sem dingin gelkholhna a nei na hi gige hi.

Paul’ pai nop masakna (best) ahi Asia gam le Bithynia gam pen amau’ hun lai-in Asia Minor ah gam khangto penpen, a nopci penpen le a hau penpen gamte ahi uh hi. Tua banah saptuam pawlpi zong om khin ahih manin zintun paaikhaina a kipanin lem mahmah ding ahih manin Paul le a lawmte zong a pai nuam uh hi thei kha ding hi. Amau zong mihing mah hi uh a, tuhun Pasian nasemte’n zong mun nopci le gam khangto tengah a pai nop dan mah uh tawh kibang dingin ka um pong hi.

Ih Lai Siangtho ah Kha Siangtho in phal lo ci masa a, Jesu’ Kha Siangtho in phal lo ci leuleu hi. A cih nopna a kikan ciangin Lai Siangtho siam (biblical scholars) pawlkhatte in Kha Siangtho le Jesu’ Kha Siangtho pen a kibang hi lel hi ci uh hi. Tua banah Kha Siangtho in phal lo hi a cih pen kamsangte tung pan maw, ahih kei leh a mang sung uh pan maw, ahih kei leh a lungsim sung vua a ngaihsutna uh pan maw, ahih kei leh a kim a paam vua thu piangte (circumstances) khat peuh tung pan maw cih kigen cian lo hi.

2. Paul ading a hoih penpen nihna (Second Best)

Paul in a pai nop lona mun ahi Troas khua a tun ciangin Masedonia sapna (Macedonian Call) a kici huh ngetna (call for help) za pah lian hi. A pai nop penpen na mun ahi lo Troas ah a pai ciangin Pasian in Europe gammiel nasepna (European mission) sep thei nading kongkhak a honsak na hi mawk hi. Paul in zong tua sapna a zak lian leh Pasian in Masedonia mite kiangah Ama’ Lungdamnathu a gen dingin a hong tulmawh ahi mawk veleh ci-in phawk pah ahih manin onton loin tua mipa sapna lamah pai pah lian hi.

Paul in hoih a sak le a pai nopna penpen mun (best) pen Bithynia hi a, ahi zongin Pasian’ gelna pen ama’ pai nop penpen nihna (second best) Troas hi zaw hi. Pasian’ mizat mahmah khat ahi MacDonald a kici pa in, “Mi khat kiangah huhna a kinget sangin tua pa a thakhauh sak zaw na bangmah om lo hi” (Nothing makes a man strong like a call for help) a cih bangin Paul zong a hoih penpen nihna (second best) a sep ciangin a lungkim mahmah lel hi. Paunak in, “Na hih zawh ding ahih nak leh midangte kitangsapna huh tawntung in,” (Pau 3:27) a cih bangin sem ahih manin Pau pen a lungkim hi pah hi.

3. Mite adingin a hoih penpen nihna in Pasian adingin a hoih penpen hi thei hi. (The second best for a man may be the first best for God)

A sep nop penpen (best) sem kha loin a sep nop penpen nihna (second best) tawh lungkimin hanciemin na a sep manun leitungah a lawhcing mahmah mi thum thu ih kikum ding hi.

Philip Brooks “Thugen Minthang pa” (Preacher)

Philip Brooks in hoih a sak a sep nop penpen “best” (Bithynia) in sangsia (teacher) hi a, ahi zongin ama’ sep taktak a hoih penpen nihna “second best” (Troas) ahih leh Pasien thugen sie (preacher) ahi hi. Philip Brooks pen Harvard University sangpi ah professor sem hi a, ahi zongin a nasepna nuam sa thei lo ahih manin a professor panmun panin khawlna lai (resignation letter) pia dingin Harvard University President Eliot zumah ling kelkel sa-in va pai a, a lai va pia hi. Bang hangin ling kelkal sa-in khawlna lai va pia ahi hiam ih cih leh a nuntak sung tungtawnin hih banga a thupi le a vang nei nasep ngah kik zo ngei nawn lo ding cih a theih man ahi hi.

Tu mahmahin zong Harvard University ah professor khat gen lo, a sangnaupang khat nangawn mite in a thupi muh mahmah ahi hi. Tua ahih manin tua bang nasep pen a sih dongin ngah ngei nawn lo ding hi. A sawt lam ciangin ama adingin a hoih penpen nihna (second best) ahi Pasien’ nasem khat suak hi. Amah adingin a hoih penpen (Bithynia) ahi Harvard professor a sep sangin a sep nop a nihna (Troas) ahi thuhilh sia (preacher) a sep ciangin nuam a sak zawk banah Pasian in zang mahmah a, a thugente zong zak nop kisa-in tha kingah thei mahmah hi. Ama’ thu gen a za kha mi khat bang in, “Ama’ thu gen in a tawntungin hong thakhauh sak hi” ci hi.

Sir Walter Scott (Novelist)

Ama’ suah nop penpen (Bithynia) ahih le la phuak siam pa (poet) a suah nading ahi hi. Ahih hangin a taktak ciangin la phuak minthang suak zo taktak lo hi; a hang pen tua hun laitakin amah sanga a minthang zaw la phuak siam Byron a kici pa khat om a, amah in Byron pen dep zo vet lo hi. Ama’n zong a cih nading thei loin, “Byron in zawh cih takin hong zo mawk ei,” ci ngiau bek hi. A sawt ciangin ama dinga a hoih pen nihna (Troas) ahi laigielh lam (writing) ah a nasep khel a, a tawpna ah lai gielh minthang (novelist/author) khat suak hi. A laibu gelh a minthang tampite lak panin “Ivanhoe” a kici laibu (novel) pen leitungah a minthang penpen khatah kihel hi. A sep nop penpen a nihna (second best) tawh lawhcinna ngah veve hi, cih ding ahi hi.

Adoniram Judson (Missionary to Burma)

Ama’ pai nopna penpen na mun”best” (Bithynia) ahi leh India gam ahi hi. Ahi zongin India a tun ciangin British-te’ company khat ahi “East India Company” in America mite na huat bawl uh a, maipha pia lo bek hi loin amau kiangah a om ding na phal ngiat lo uh hi. Kha Siangtho in Asia le Bithynia ah Paul a pai ding a phal lo dan tawh kibang pian hi. Tua ciangin Judson zong Penang lam a pai ding tembaw khat a zui pong leh huihpi nungin a tembaw in a pai nopna lam zuan thei loin a lampi kikhel a, up lo pi-in Yangon lam va tung dihdih hi. Judson’ pai nopna taktak (Bithynia) pen India gam hi napi, Pasian in Judson’ hoih sak penpen a nihna (Troas) ahi Kawlgam lam puak vingveng hi cih ding ahi hi.

Ahang pen Pasian in Paul adingin Masedonia ah a nasep ding a tam zawk lam a theih mah bangin Judson adingin zong India sangin Kawlgam ah a nasep ding a tam zawk lam a thei hang hi ngel ding hi. A pai nopna taktak ahi le Kawlgam hi lo hi; ahih hangin Judson in Pasian’ na a hong sepna ah Pasian in amah nakpi takin zangin hong lawhcing mahmah ahih manin leitungah sangmang (missionary) minthang pente lakah khatin hong kihel hiau mawk hi. Amah zong a sep nop penpen a nihna (second best) tawh a lawhcing pa khat mah hong hi zel hi.

4. Na Bithynia pen bang ahi hiam? (What is your Bithynia?)

Ih tenna mun le gam (Our Residences)

Ih ten nop penpen na mun”first best” (Bithynia) ahih leh gam thumna ahi USA, Australia, Sweden, Germany, Norway, New Zealand cih bang gamte hi kha thei ding hi. Gam nihnate (a diakin Malaysia le India) ah gam bel (refugee) dinmun tawh gam thumna pai nuamin a ngak ni loh ih mi tampi om hi; ahi zongin a hang hang tawh lampi kikhak cipin a tung zo lo ih mite tampi ih om veve ding a, ih lamkiatna mun (birth place) ahi ih pu ih pa gam a zuankik zong ih om kha thei ding uh hi. Tu laitakin Kawl gam pen ih pianna gam ahih zenzen hangin ih ten nop penpen na mun (first best) hi nawn loin ih ten nop penpen nihna mun “second best” (Troas) bang hong hi bek mawk hi. Ih ngaisut ding ah eite adingin ih Kawlgam pen ih ten nop penpen nihna “second best” (Troas) ahih zenzen hangin Pasian in mi pawlkhatte adingin ten nading a hoih penpen (first best) mun dinga a hong sehkholh sak ahih mel zong kithei lo zel hi.

Zi le Pasal vai

Mi pawlkhatte adingin tulaitak a zite ahih kei leh a pasalte uh zong amau’ deih penpente “first best” (Bithynia) hi lo thei-in amau’ deih penpen nihna “second best” (Troas) peuh zong hi kha thei mai ding hi. Ahi zongin ka zi ahih kei leh ka pasal pen Pasian in kei adingin a hoih penpen “first best” (Bithynia) dinga hong piak ahi hi ci-in sang siam peuh lehang, nupa kikalah kitelsiam lona (misunderstanding) cihte hong veng ding a, khatlekhat kipomna (mutual recognition), khatlekhat kizahtakna (mutual respect) le khatlekhat kimuanna (mutual trust) cihte hong om pah ding a, Pasian’ min a thangsak innkuon le nupate ih suak ding uh hi.

Nasepna (Vovation)

Tulaitak ih sepna (vocation) zong ih sep nop penpen “first best” (Bithynia) hi lo thei a, ih sep nop penpen nihna “second best” (Troas) peuh zong hi mai thei ding hi. Hizongle ih sep nop mahmah nasep sangin ih sep nop phat lohte tungah Pasian in eite adingin a hoih pen dinga a hong na sehkholh sak sa khawng zong hi thei mawk hi. Tua mah bangin ih pawlpi, ih khua ih tui, le ih gam ih leite zong eite adingin Pasian in a hong na bawlkholh sak ahi hi ci-in umin Pasian tungah ap peuh lehang hong lem toto lel ding hi.

Ka nuntakna ah ka sep nop penpen nasep “first best” (Bithynia) pen engineer nasep hi a, ahih hangin a taktak ciangin ka sep nop khol lo, ahih keh ka sep nop penpena nihna”second best” (Troas) ahi Pastor nasep hong hi zaw mawk hi. Ka tan sawm on 1973 kumin ka ma rk ngahzah pen (410) hi a, Rangoon Institute of Technology (RIT) ka lut zawh nadingin mark (3) kisam se kiukieu ahih manin ka sep nop penpen “first best” (Bithynia) ahi engineer tawh kipelhin ka sep nop penpen nihna “second best (Troas) ahi Pastor ka sem kha laizang hi. Ahih hangin tu tak ciangin Topa in kei pen pastor sem dingin a hong na sehkhol hi mawk veh e, ci-in ka phawk kik ciangin ka lung a kim sansan hi.

Sanggam aw, na Bithynia (first best) bang pen ahi hiam? Ih gen sa bangin na zi, na pasal, na nasep, na tenna mun cihte khempeuh ih ut penpen “first best” (Bithynia) hi khin khol lo thei ding hi. Hizongle tu liana na dinmun ahi a hoih penpen nihna “second best (Troas) tawh lungkia het loin hanciam takin kalsuan peuh lecin Pasian in tua na hanciamnate tungtawnin na hong semin thupha hong pia veve ding hi cih phawk in. A manpha mahmah ahi “Kep” (pearl) pen toktawl (oyster) pana a hong piangkhia ahi hi.

Toktawl’ a tuamna (shell) sungah ninthemte le suangsite lutin tuate hangin toktawl in nuam sa het lo ahih manin om mawhin a pumpi kigawi-in tang ni loh hi. Tua bangin lingtang banga amah a sun den ninthem teng le suongsite tawh a pumpi sung a kigawigawi manin a tawp khakna ah a gawigawi ninthemte le suongsite panin suong manpha ahi kep (pearl) piang hiau mawk hi. Tua ahih manin Topa tungah ih tuah khak hamsatnate le ih gentheih ih liangvaina khempeuh apin kalsuon toto lehang ih nuntakna ah ih biak Pasian’ khutma hong kilang ding a, lawhcinna le gualzawhna ih ngah taktak ding uh hi. Lai sim khempeuh tungah ih Topa Pasian in a thupha namcin hong buak tahen! Mang Do Thang