Zogam Budget leh MP ~ Pu Zo Tuang

Zogam Budget leh MP ~ Pu Zo Tuang

Gam khat limlim in budget khat ahi zongin aki khawm ciangin a amasa in democracy gam tawh akikal suan gam te in Mipha zah ki-et masa pen aa mipha zah zui in Budget ki hawmkhia hi. Gentehna bang US bang ah kum 10 in khat vei ta bang milip kisimna om in a diakin tua pen Federal Budget hawm zia ding leh Federal Kumpi ah Tangmi puak zia ahihi. Federal Kumpi cih pen Congress zong hihi. Kum 10 sim in Congressional Districts Map cih gamlim khat vei ta bang puah in bawl den uh aa tua zui in zong budget aki hawm ahihi.

Cidamna lam, sang lam, Kizomna lampi te ahi zong a tuamtuam Sumzatna budget khem peuh pen Mipha zawh tawh kihawm in Budget seh na ki nei den hi. 2020-2021 Zogam Budget en leng abeisa kum te ah zong budget kihawm na te pen adiak in Zogam ah mitam na pen ahi Tedim Township bang pen mitam pen mah ta se leh Budget tawm ki ngah den pen ahihi.

Gam khat limlim in budget aki hawm ciang in a mipha zah leh a gam golna tawh kizui in ki hawm aa tua zawh ciangin, Khuapi lian te pen kumpi zum te omna a hih man in akisap leh tua zawh ciangin kigel pan ahihi. Leitung ah Democray gam ki-uk zia pen a tam penpen 3 te in Federal Goverment, Unitary Goverment leh Constitional Monarchy ci in kumpi zong anei Kumpi thu neihna tawh aki uk khawm gam hi teng 3 pen leitung ah akitam zat pen gam ki-uk zia ahihi.

Kawlgam bang en leng pen Unitary Goverment kici in adiak in thu neihna pen Central Goverment pan in tui bangin ong luang khia ahih man in State te in thu neihna ki nei zolo hi. Tua hih manin State in Budget hawm zia ahi zong in thu neihna khat peuhpeuh pen adiklo aom leh Central Goverment in State Goverment tung ah thu nei uh hi. US dan te pen Federal Goverment ahih sam hang in US constition sung ah State kumpi thu neihna ding leh Federal Kumpi thu neihna ding ki khen dimdiam ahihi.

Kawlgam dan te leuleu pen Unitary Goverment ahih mah bangin Central Goverment bek in thu neihna vekpi phial in len uh a State Goverment in Central Government thupiakna dan a nasem zaw uh hi. Tua ahih man in State MP ciding i hiam State Kumpi ah tangmi a pai MP te in Budget hawm zia a lung kim kei uh leh State Parliment ah a lung kimloh nate gen thei hi.

State MP te in a State parliment ah ki deidan na sum leh pai budget hawm zia alung kim kei leh Central Goverment a hi Hlutaw ah Gambup Parliment ah thu sung thei leh lungkim lohna gen khia thei uh hi a hang pen Kawlgam bang pen Unitary Goverment ahih mah bangin Central Goverment in thuneihna khem peuh len khin phial ahih ma in i lungkim lohna khem peuh pen Central Government ahih Union Parliment ah gen khiat ding ahihi.

Zogam Budget hawm zia bang i lungkim kei leh zong tua pen a gen ding pen Hlutaw MP (Amyothar Hluttaw leh Pyituh Hluttaw) ah MP te in gen thei uh hi. Mipawl khat te in Kawlgam pen Galkap kumpi ki-ukna hi in MP te thu neilo uh hi zong ci mawkmawk thei uh hi.

Galkap kumpi thu neihna pen adiak Kawlgam thu khunpi akipuah thei na ding 75% sang tam zaw in a thu kim leh bek kilaih theih cih thu hi tua hih man in Galkap te 25% bang na pha ahih manin Kawlgam thukhunpi laih theih na ciang pen amau tua a khak tan theina ding ahihi, ahih hangin Budget hawm na ah pen Amyothar Hlutdaw leh Pyituh Hlutdaw MP te in a tam zaw thu kim na tawh budget hawm khia thei uh aa sum zong kisap leh gam dang pan in tawi thei bek tham lo in kawlgam sum mahmah zong bawl khia thei uh hi.

Tua pen Zomi ten budget tampi i ngah na ding pen Zomi MP khem peuh mawh puak ahihi. Bang party bang party cih tawh kisai lo in Zomite tangmi ahih mah bang un Zomi te tangin thu gen ding in Central Goverment ah akipuak ahih kei leh i sawl khiat Tangmi leh Palai te ahih man in mipi te deih dan a gen kei leh mipiten kisawl nawn lo kipuak nawnlo thei hi.

Tua pen Democracry pai zia ahihi. Tua dan ciang gen ngamlo MP te pen Zomi ten tua dan MP te tangmi in i paisak nawn lo na ding ei mipi te tung ah thu neihna aom ahihi. Democracy gam pen thu neihna bulpi pen Mipi te kiang pan tui bang aa ong luang khia hi akicihna pen tua hang ahihi. Tua ahih manin Central Goverment leh State Goverment ah ei tang ding thusung ding ahi zong MP i tel ciangin tua bang dan a gen ngam ding MP i tel khiat kulhi.

Tua dan i gen ciangin Zomi party nusia in party lian te bek mee (vote) pia ni cih na hi pah lo hi. Kawlgam in Thukhunpi (constitutions) ahoih ma teng leh ei tawh kituak ding Federal gam tawh kituak ding ahi zong Thukhunpi i neih ma siah pen Zomi Party pen nusia theih ding hilo hi. Tua dan a a akibawl theih na ding Zomi party in ong bawl ding a tua khit teh Zomite in party dang te mee (vote) kipia thei lel ding hi.

MP hoih i ngah theih na ding in bang ci sep ding. Zomi Party pen ZCD bek aom ahih man in tua bek mah i panpih ding thupi mahmah ding hi. MP hoih i ngah theih na dingin a masa in ZCD party member khem sung ah MP dem nuam khem peuh in amau om na muntek leh amau dem nopna mun tek ah min pia in tua MP dem a ut mi tampitak lakpan in ZCD party member khem peuh in tua te mee (vote) pia in vote tam ngah pen te in MP dem leh pen MP hoih ki ngah thei pan bek ahihi. US bangin tua dan a zat uh pen sawt mahmah ta hi tua pen Primary Election ci in kiteelpi ma-in party in ahih ahihi.

Pawl khat te leuleu in US leh Kawlgam na gen teh uh kigen teh thei baih lo ding hi ci thei uh hi, MP teel cing ding kitel na pen Kawl Kumpi leh Gamkumpi te sep hilo in Party te sep leh gel khiat ahihi, Party te bawl ding bek ahihi, tua pn bek in MP hoih leh mipi deih MP ki ngah thei pan ahihi. Tua hih man MP hoih i ngah na ding ZCD makaite mahmah in zong hidan a lung gulh nai kei mawk leh amau mahmah in zong Democracy pai zia sang in amau mimal thu neihna alung gulh hi zaw kha ding hi. Tua ahih man in hi dan sep ding kisam ta hi. Pu Zo Tuang (Accountant @ ZIUSA)