Zogam Aksi 3 te ~ Pu Gin Pian Khup

Zogam Aksi 3 te ~ Pu Gin Pian Khup

Zomi le Zogam tangthu ah thupi deuh ” Zogam Aksi ” ci-in min kipiathei ciat hi. Tua bangin i piakte sungah nasepna le panmun tawh kizui in ii piak hikha ding ahih manin, kuamah kimawhsak theih omlo hi.

Ahi zongin Minam le gamvai ah Zomite’ ading madawk bek tham loin abeisa le tuni dong i et kikkik ciangin, 1900 khit ciapteh thamcing mi 3 om hi. Tuate in;

• Pu Hau Za Lian (Sukte Independence Army-SIA)
• Pu Mang Tung Nung (Chin National Organisation-CNO)
• Pu Chin Sian Thang (HCSU, ZNC/ZCD )

1. Pu Hau Za Lian pen Sukte Independence Army i a mangpi Commander-in-Chief hi a, Kawl te’n Japan te a do ma Zomi te makaih a Japan do ahihi. Anti Japanese movement ah leitung theih a ciampteh thamcing khat ahihi. Tua banah Pu Kamhau leh Ukpi hun a Zogam galkapte British te i lelh nunga, Zomi tawh kisai galkap phutkik masa pen ahihi. Japan lah do, British lah langpang ci in galpi nihna zawh ciangin British te nangawnin matsawm liang ahihi.

2. Pu Mang Tung Nung pen Panglong tungtangah Federal Union deih ung ci a, mumal tak a dawng thei om sunsun Chin/Zomi mipilam palai khat ahihi. Tuabanah 1947 constitution pen Federal Constitution tawh laih ding a, Taunggyi mualmi leh mualgam khawmpi ah Zomi palai teng makai ahihi. Ni masa ni bekin thugen a, a kik ciangin Zomi lak a Law sin masa pen leh Hill Chin Student Union Chairman Tg. Chin Sian Thang tonpih in ama tangin thugen in pantah a, tuni dong Pu Chin Sian Thang Federal Politics ah makai suak ahihi.

Zomi lak ah King Commission kici mangkang galkap bawk 3 za taktak angah masa pen ahihmanin, Captain Mang Tung Nung ci in thanga Captain pa zong kici hi. A za taawpna taktak pen Major/Bohmu ahihi. Nasep teng akhawl ciangin makai leh ulian dangte bangin Kawlgam ah a sih dong vaithamloin, apiangna khua Muizawl khua, Zogam ah ciahkik ngiat in tengkik hi. A sanggampa tate 2 Zomi milian leh makai sem ngei Pu Khen Za Mung leh adangdangte nangawn tuni dong Zogam ah tengkik tamlo hi.

3. Pu Chin Sian Thang pen Sitnipa kici a Zomi lak ah LL.B zo masa pen ahih banah a degree lakna pen Amerian Constitution ahihi. Zomi milui lak ah constitutional law thei omlo kikeuh a, khangthak ah zong tuni dong mah khutme kuaih theih lai phial ding ahihi. Taunggyi Conference ah Pu Mang Tung Nung tawh a kithuah khit uh ciangin, 1974 Constitution vai ah zong Federal Constitution Zomi te’n ka deih uh hi ci in Myanmar Army chief Ne Win kiangah Pu Lian Uk ( Haka) te tawh makaih in lai pia uh ahihmanin mat leh thuak lawh hi.

1988 zawh ZNC ah president dinmuun la in Federal Cause mah dingpih suak ahihi. Gamsung gampua te deih Panglong Conference samkik ding tawh kisai Kalay Declaration makai in tangko ahihmanin gambup cihmawh laitak tawh kituakin, Aung San Suu Kyi in zong thukimin amah ki-ap suak hi. 2016 kum ciangin kilemna khawmpi kibawl ding pen in min 3 aneih lak ah 2 ahi 2nd Panglong leh 21st Century Panglong pen Kalay Declaration huzap tawh kiloto suak ahihi.

Pu Hau Za Lian leh Pu Mang Tung Nung pen aKawl aZo cih omlo, leitungbup theih hita a, tangthu nei Zomi aksipi 2 hita in, Pu Chin Sian Thang bel bangmah theilo hai ciakciak teng,hong ki nung-leh -kaih saklo a, tutung Panglong ah mualmi mualgamte lunggulh tawn tung ahi Federal Constitution mah hong dingpih suak a leh Aksipi 3na in kiciamteh suak ding ahihi.

Note: Pu Hau Za Lian lim mupaklo ka hihmanin Pu Mang Tung leh Pu Chin Sian Thang lim 2 tawh hong suakkhawm sak ing.

Thuzep: CNF lamte zong nidanga Tedimlam te’n tangthu ah bangmah semlo cihdaan a haipau nawnaw den uh hi. 2000 kum kiimpawl ciangin, Shan te’n Taunggyi Conference thu laibu limtak hong suaksak uh leh tua pan dai uh hi. CNF mi phamawh mahmah khat in Pu Mang Tung Nung bel zahtak ung ci in kei kiangah hong gen liang hi. Tualo mi minthang dang nengnengte bel Minam khat maban tawh kisai a Aksipi a ciapteh tham cing omlua nai lianglo hi. Pu Gin Pian Khup