Zo lote’n Zo te Zuan ~ Evan. Suang Dal

Zo lote’n Zo te Zuan ~ Evan. Suang Dal

A it zolo zawte’n a itzo zawte’ kiang zuan :: Itna tawh kisai Lai Siangtho sung ih sim ciangin mihingte in itzawhna thu hangin Jesuh’ ong tatkhiatna Singlamteh thu a hemkhia zo ding ki-om lo hi, cih thu kimu thei hi. Tua Singlamteh itna pen Agape itna kici hi. Agape itna cih pen mongnei lo itna cihna hi a, mongnei lo itna cihteh ahang (condition) tungah kinga lo itna cihna hi. Kam dang khat in gen lehang agape itna ih cih pen a ithuai lote itna cihna zong ahi hi. Itna thupi pen hi. A it zo nuam lo ih om kei hi. A it zo tang a ut vive ih hi uh hi. Ahi zongin ih ki-it zo kei uh hi. Tua ahih manin, ahong itzo zaw ahi Pasian ong tatkhiatna Singlamteh thu ih zuat loh hong phamawh pelmawh ding ahi hi.

Itna pen ahang (condition) tungah kinga lo cih ciangin Jesuh Khrih sungah thu-ummite pen amau’ dikzawh, itzawhna hangin Pasian’ itna a ngah uh ahihi, cihnopna hi lo hi. Mangkangte’ paunak khat in “Love is blind” ci uh hi. Ahi zongin Lai Siangtho’ gen Agape itna pen a mit taw lo hi. The Agape Love is not blind. Love sees. Itna maan taktak a mit taw lo hi. Itna in mu hi, cih pen Lai Siangtho’ gen ahi hi. Itna in hong mu hi. Itna in zuan sak hi. Itna in nusia sak hi. Itna in thukhen hi. Itna hangin a sia a pha kikhen ding hi. Itna in thumaan le thusia khen hi. Tua itna a nei Pasian in thukhen ding hi. Itna in siangtho hi.

A siangtho Pasian in mawhna thu khen ding hi. Tua ahih manin na bukna a muan huai nai hiam? Jesuh Khrih, Suangpi kitam sungah na nuntakna na kiliah sak nai hiam? Tua dikna puanpak na silh nai hiam? Tua itna na ngah nai hiam? Tua itna na zuan nai hiam? A itzo zaw Pasian’ thu sungah na kibual nai hiam? Nang le nang’ itna na kimasuat sawm lai hiam? Itna zong a kilamzia om hi. A it ding om a, a ki-it ding om hi. Ahi zongin khat ciat in it ding tavuan vaipuak kinei hi.

Agape ahi lo itna khat pen Greek pau in ‘eros’ kici hi. Eros a khiatna in, a ithuaite itna cihna hi. Cilesa ki-itna zong kici thei hi. Eros in ama adingin a ithuaite bek it hi. Cilesa ki-itna tua eros in itna teng hi. Eros love discriminates. Agape itna in teel hi. Agape love elects. Cilesa ki-itna tua eros in sisan kan ahih manin sisan luangluang sak lai hi. A luangsa Jesuh’ Sisan tawh itna zon sawm lo uh hi. Jesuh’ sisan tawh itna teel lo uh a, amau’ sisan tawh itna teng uh hi. Cilesa ki-itna tua eros in thumaan tawh thukhen a, ahi zongin Lai Siangtho’ gen thumaan thutak tawh ki-itna zong lo uh hi. Eimau’ itna ciat bulphuh ih hih manin gamsung gampua ah buaina piang hi.

Tua ahih manin, cilesa ki-itna bulphuh in hong kizuan ahih leh tua pen sawtvei khom tuan lo ding hi. Cilesa itna bulphuh a taikhia, a tuankhia a kuankhia na hih leh tua pen a sawt pen leh khangkhat a kiman tei hangin tawntung zo tuan lo ding hi. Tuni in ih kizuatna, ih kikhenna, ih kipaisanna, ih kitaisanna, ih paikhiatna, ih kilensanna, ih kizitsanna, ih kizuat ih kibelhna, thute pen Agape itna bulphuh ahih nak leh guak suak ngeilo ding hi leuleu hi.

Agape itna nei nu na hih manin hong kizuan hong kipom, agape itna a nei pa ahih manin a kizuan a kibel a hih ding kisam hi. Cilesa ki-itna pen a mittaw hi. Eros love is blind. Agape ki-itna pen a mittaw lo hi. Agape love is not blind it sees. A gape ki-itna pen ahang (condition) tungah kinga lo hi. Eros ki-itna pen ahang (condition) tungah kinga hi. Ahang (condition) tungah kinga lo cih leh mittaw (blind) cih a khiatna kibang kilkel lo hi.

Nupa kikal ah pasal pen a it dingin a kiseh hi a, numei pen a huh dingin a kiseh ahi hi. Pasal in ukna le lutang hihna tawh a nuntakna pia dongin a it ding hi a, numei pen a pasalte’ thumanna le huh dingzia tawh a it ding uh ahi hi. Tua ahih manin pasal in a zi a it ding ahi hi. A zi kicingtaaklahna le kizenlohna a kipan hawmthawh huainate pen a tuam hi a, it himhim ding pen pasalte’ mawhpuak ahi hi. Tua ahih manin zi in a itzo zaw a pasal’ kiang a zuat ding mah ahi hi.

A pasal tawh sawtvei a kikhen lua nupa kikal ah buaina piang pelmawh hi. Tua bang a pianloh nadingin hanciampih huai mahmah hi. Tate le nulepa’ kikal ah zong nulepa in tate pen a itzo zawte ahih uh kul a, tua mah bangin, nulepa bangzah ta-in pil in hai in, gina kei phial mah ta leh Lai Siangtho in nulepa thumang ding, zahtak ding ci ahih manin a thu ih man a, ih zahtak ding na hi mawk hi. U le nau kikal ah zong uzawte mah a itzo zawte uh hi a, naute it ding pen ute’ tavuan hi in, naute in uzawte thumanna tawh zahtak bawl ding ahi hi.

Teek le mo kikal ah zong Teekte pen a itzo zawte ahih uh a kul ahi hi. Banghang hiam cih leh teekte pen mo ngeite hi khin uh a, mote pen teek dingte hi pan uh hi. Tua ahih manin mo in a zuat a itzo ding nu ahi tua a teeknu’ thu a man ding thupi mahmah hi.

Pawlpi kem Sya le pawlpi mite kikal ah Syapa pen a itzo zaw ding pa ahih kul ahih manin itna thu tawh a kidim mahmah kul ding hi. Topa Jesuh in “Keimah in Tucing hoih ka hi hi” ci hi. I am the Good Sheperd, ci ngiat hi. Makai hoih kisam masa hi. Nasemte le boss te’ kikal ah Bosste pen a itzo zawte ahih masak uh a kul ahi hi.

Tua bangin itna tawh a makaih kei leh a nasemte in taisan lel ding hi. Kumpite le gammite’ kikal ah kumpite pen a itzo zawte ahih uh a kul ahi hi. A gammite a it lo kumpi in gammite nasep guan zo lo uh hi. Itna le thumaanna tawh uk lo uh hi. Tua bang gam kumpite a gammite in taisan ding a, ahih kei leh a gammite cimawh liangvai in a itzo zaw kumpi gamte kiang ah gal tai ding uh hi. Tua bangin a itzo zaw gam kumpite kiang a zuan minamte lakah Zomi te zong kihel kha hi hang.

Eite hong itzaw USA, Australia, Europian gam tuamtuam te ah itna a va ngah dingin Malaysia, Thailand, India gamcihte bulphuh in itna zongin ih om phengphang uh hi. Ih it mahmah ih tu ih ta ih pasal ih zi ih nu ih pa ih pu ih pi ih lawm ih gualte in a itzo zawte gam hong zuat san ciangin khitui luanna le lunglen khuangaihna nakpitak in piang ahih manin baih het lo hi.

A itzo zawte gam ah, mihing malkhat ciat’ suahtakna le manphatna tawh kizui in itna ngah sak uh a, a cidam nading, a pil nading, a khantoh nading un deihsakna lianpi tawh panpih in pantah uh hi. A it zolo zawte’n a itzo zawte’ kiang a kizuan ahih manin ahong it mite’ thu ih man ding le a thukhunte uh ih zuih sak ding thupi mahmah ding hi. A itzolo zawte’n a itzo zawte’ kiang a kizuan hi a, ih ta ih naute in hih thu hangin a itzo zawte’ gam hong zuat san uh a, lengvan dawn ah hong len san ciaiciai uh ciangin nakpitak in ih lung ong lengin ih nuntakna hong khenkham lua mahmah hi.

Ki-it zawhlohna hangin kisikna le khakhamveina, kipaisanna, kitaisan, kilensanna piangpiang lai ding ahih manin lunglen huai, lungkham huai khol mahmah hi. A it zolote kitaisan a, a itzote kizuan hi. A itzolo gam le a itzo lo kumpipa’ gammite in hih bangin innkuan kikhenkhapna thu tuak ziahziah uh a, gammite zong khat le khat ki-it zo nawn loin, kitaisan in kikhenkham in lei mong khat ah ih kithehthang hi. Ahi zongin Lai Siangtho in “Ama deihna bang a sem dingin Pasian in a hong sap, amah a it eite a’ dingin na khempeuh a hoihlamin piangsak hi, ci-in ih thei hi”, na ci hi (Rom. 8: 28).

Bangbang ahong piang zongin Topa Jesuh Khrih’ ong tatkhiatna Singlamteh Lungdamna thu ii ahong itna (Agape love) le ahong hehpihna (Grace that is greater than our sin) thu sungah itna a zong mi khempeuh in sunglam suahtakna (insight peace) ngah ding uh a, tua banah a kizuan a itzo pa, a itzo nu hong suak ding uh hi. Jesuh Khrih upna hanga a piangthak nuntakna ah a beisa it zawh lohna hanga lunglen khuangaihnate khempeuh zong hong beibei dinga, nuntakna thak khangthak ahong piang ding hi ta hi. Zo lote’n Zo te Zuan hi. Topa’ minthan nading hi tahen! Evan. Suang Dal