ZIUSA pan Dahna Pulakna: Nu Catharina Ning Khan Vung, Tulsa, OK

ZIUSA pan Dahna Pulakna: Nu Catharina Ning Khan Vung, Tulsa, OK

Zomi Innkuan USA
Executive Committee

Dahna Pulakna: Mangpha Nu Catharina Ning Khan Vung

Oklahoma Gamkee, Glenpool (Tulsa) khuapi a teng, Zogam pan Lailo khuami, Gualnam beh, Pa Suang Zen Lian’ it mahmah a zi, Nu Catharina Ning Khan Vung in December 4, 2014 ni in, damlohna hang tawh, a omna inn phualzang panin a leitung nuntakna hong nusiata hi. Nu Catharina Ning Khan Vung in ahong nusiat laitak in kum (39) a cingpan hi a, a nupa un US gam ah a peemta dingin ahong tunzawh uh kha thum valdeuh cingpan hi.

A nupa un US gam ahong tun uh sawt nailo ahih manin, ama laizom sanggam pa, Pa Pau Khan Khual-te inn ah a omlai uh ahi hi. Nu Catharina Ning Khan Vung pen khangno mahmahlai ahih ban-ah, gam nuamzaw ah innvai lovai maban kician suang nailopi in ahong beisanvat pen lamdang kisa mahmah a, dahna tawh na kisa mahmah hi.

Nu Catharina Ning Khan Vung hong nusiatna hangin adah akap a om, a pasal, Pa Suang Zen Lian leh a sanggam-pa, Pa Pau Khan Khual-te innkuan a kipan, meeltheih tanaute, beh leh phungte, khuapih tuipihte, pawlpi mipihte leh Zomi Innkuan Oklahoma kipawlna tawh a kibang in, Zomi Innkuan USA Executive Committee pawlzong nakpi takin kidah hi.

Pa Suang Zen Lian te nupa pen ZIUSA Genvai Thukhun apom, Zomi Innkuan Oklahoma kipawlna Pawlmi kician innkuan khat ahih manun, Thukhun zui in Zomi Innkuan USA kipawlna in Genvai Sum sung panin, Nu Catharina Ning Khan Vung luang phamna/kivuina sum kipiakhia ding hi.

Nu Catharina Ning Khan Vung tawh a nunung hun bawlna pen RC Pawlpi ngeina bangin Dec. 8, 2014 (Monday) ni, sunkim 12:00noon hun a kipan in Tulsa khuapi a om Tonu Maria Siangtho Lungtang biak-innpi ah kibawl ding a, hanmual ah kikha ding hi.

Nu Catharina Ning Khan Vung hong nusiatna hangin adah akap, lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin ahong siamna dingin thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
December 7, 2014