ZOMI INNKUAN USA, Inc.
ZOMI COMMUNITY USA
7438 S. 95th East Ave. Tulsa, OK. 74133, USA. www.zomicommunityusa.org
THUPULAKNA
August 01, 2014
United Nations Economic and Social Council sung ah Consultative Status
1. Zomi Innkuan USA (ZIUSA) kipawlna in July14, 2014 ni in, United Nations Organization
(UNO/UN) kipawlna mungpi khat ahi Economic and Social Council (ECOSOC) nuai ah
Civil Society khat hihna tawh Consultative Status dinmun kingahta hi.
2. Consultative Status dinmun ah ahong sang UN ECOSOC, leh hih dinmun tawh kituak maw
kituaklo ahong sittel ECOSOC NGO Committee tung ah Zomi Innkuan USA kipawlna buppi
nakpi takin kilungdam hi. UN ECOSOC nuai ah Consultative Status dinmun akingah manin
UNO kipawlnapi in Zomi kici minamte, leitung minam tuamtuamte lak ah minim kician,
minam picing khat hi ci in ahong sanna, ciaptehna, kipsakna in kingaihsun a, leitung gam
tuamtuam a om Zomi buppi tangin Zomi Innkuan USA kipawlna in angtanna tawh
kilungkim mahmah hi.
3. Zomi Innkuan USA kipawlna in UNO leh ECOSOC in akhun ngeina zia leh tongte tawh
kituak in kikalsuan ding a, a tupna a ngimnate a tangtun theihna dingin Consultative Status
dinmun panin ahi thei zahin ma kipang ding hi. Adiak in Millennium Development Goals
(MDG) pen Zomi-te ten’na gam khempeuh aha tangtun theihna dingin a hun om laiteng
sungin kihanciam ding hi. Tuaban ah Sustainable Development Goals (SDG) a tangtun
theihna ding vaihawmna leh mapanna ah Zomibuppi tang’in Zomi Innkuan USA kipawlna
in limtak in maban pankhop dingin kithukim hi. Hih mabante ah ahong pangkhawm dingin
taangpi tawh kisai Zomi-te kipawlna tuamtuamte kizawn ding hi.
4. UN ECOSOC sung ah Consultative Status dinmun a kingah theihna dingin a mapang ZIUSA
kipawlna Makaite, ZIUSA kipawlna sung a kipawlkhawm Zomi Innkuan kipawlna
khempeuh tung ah zahtakna tawh kilungdam hi. Thungetna tawh ma apangkhawm Zomi
laizom u leh nau, nu leh pa, sia siamate khempeuh leh anungta Pasian tung ah kilungdam
mahmah hi.
5. Zomi Innkuan USA kipawlna pen US gam sung a om Zomi taangpi taangtate’ khua leh tui
kipawlna (Community Organization) khat hi a, 2005 kum in akiphut ahi hi. 2009 kum in US
kumpi tung pan kipawlna picing khat hihna tawh ciaptehna kingah a, 2010 kum in UN
ECOSOC nuai ah Civil Society khat hihna tawh Observer Status dinmun kingah hi.
Consultative Status dinmun a kingah theihna dingin hanciam dingin 2012 kumcin khawmpi
sung ah kikhensat a, tua hun a kipan in hih maban kikal suanto hi. Tu laitak in Zomi Innkuan
USA kipawlna sung a kipawlkhawm Zomi Innkuan kipawlna (39) pha a, Pawlmi mimal
7,000 val pha hi.
Zomi Innkuan USA kipawlna tawh kisai thu leh la khempeuh ah Board of Directors pawl in
Thukhunpi tawh kituak in thuneihna asang pen nei hi. Board of Directors pawl sung ah Zomi
Innkuan kipawlna tuamtuam panin akipuak Tangmite (Representatives), mimal (40) val leh
Executive Committee (Makaipi Pawl) panmunlen (15) teng kihel a, tu laitak in mimal (50)
val pha hi. Zomi Innkuan USA kipawlna pen Board of Directors pawl in kumcin khawmpi
sung panin ateel Executive Committee in makaih hi.
6. Zomi Innkuan USA kipawlna pen akiphuh zawh kum (9) sung bang a cingkhin a hihna, US
kumpi in a theihpih zawh kum (5) bang cingkhin a hihna, abeisa kum (4) sung bang sum leh
paai ngahna leh zeeknate US kumpi tung ah kumsim in a pulakden kipawlna kician a hihna,
Zomi Innkuan kipawlna (39) kipawlkhawm inatangzai mahmah kipawlna lianpi khat a
hihna, Pawlmi mipi tung ah a kinga, mipi thuneihna a bulphuh, Thukhunpi leh Ngeina Dante
kician takin anei kipawlna a hihna, Pawlmi mipite tang’in Tangmite in atam zaw thukimna
tawh ateel Makaipite makaihna tawh akalsuan kipawlna a hihna cih dinmunte hang ahi
zongin, Zomi kici minam min leh minam buppi vang tawh ahi zongin, UN ECOSOC sung ah
Zomi Innkuan USA kipawlna in Consultative Status dinmun a kitang ahi hi.
7. Tu a kipan in, ngeina om bangin kum (4) sung, Zomi Innkuan USA kipawlna in UN
ECOSOC sung ah Consultative Status dinmun tawh Zogam leh Zomi-te khantohna dingin
ma kipang ding hi. Hih minam maban lianpi a kipan’ zawhna dingin Zomi Innkuan USA
kipawlna sung a kipawlkhawm Zomi Innkuan kipawlna khempeuhte pankhopna kisam
mahmah ding hi. Tua ban-ah, muntuam gamtuam a om Zomi-te kipawlnate panpihna,
thukimpihna leh thupha piakna, Zomi mipil misiam makai tuamtuamte panpihnate zong
kingen ding hi. Tuamah bangin Zomi Innkuan USA kipawlna maban kalsuanna khempeuh
ah hong makaih a, lawhcinna ahong tangsak dingin anungta Pasian tung ah thu kingen hi.
Executive Committee
Zomi Innkuan USA, Inc.
(Go Sawm Khup)
President
(Do Khan Khup)
General Secretary
Comment piaknop aomleh...