ZIUSA kipawlna in Anthony Lian Lam Mang luangpham/vui ding

ZIUSA Genvai Thupulakna: ZIUSA kipawlna in Anthony Lian Lam Mang luangpham/vui ding

Zomi Innkuan USA
Executive Committee
ZIUSA Genvai Thupulakna
June 3, 2015

A Thu: Anthony Lian Lam Mang Luangphamna/Vuina

Texas Gamkee, Fort Worth khupi a teng Nu Niang Dim Cing leh Pa Thang Gen Tung (phamsa) tapa upa pen, Anthony Lian Lam Mang (kum 18) in May 29, 2015 ni in damlohna hang tawh mual hong liapsan hi.

Anthony Lian Lam Mang pen Zomi Innkuan USA Genvai Thukhun apom, Zomi Innkuan Fort Worth kipawlna Pawlmi kician khat ahih manin, Genvai Thukhun zui in Zomi Innkuan USA kipawlna in a luang kipham/kivui ding hi.

Nu Niang Dim Cing-te innkuan pen ZIUSA Genvai Thukhun apom, Zomi Innkuan Fort Worth kipawlna Pawlmi Innkuan kician khat a hihna uh Zomi Innkuan Fort Worth kipawlna Makaite in thu hong ko uh a, Genvai Tanupawl in a thu a la a kantel khitciang in ZIUSA EC pawl tung ah kipsakna hong puak uhhi. ZIUSA EC Pawl in hih thu limtak in kisang a, a kisittel khitciang in Genvai Thukhun zui in ZIUSA kipawlna in Anthony Lian Lam Mang luangphamna/vuina bawl dingin kikhensat hi.

Tua ahih manin, Anthony Lian Lam Mang’ luangphamna/vuina dingin, Zomi Innkuan USA kipawlna in Genvai Sum sung panin $10,000 (Dollar Tul Sawm) kipiakhia ding hi. Hih sumte Fort Worth khuapi a om ZIUSA EC panmunlen Makaite in Zomi Innkuan USA kipawlna tangin innteek bangkua tung ah piakhia ding uhhi.

ZIUSA kipawlna min tawh a kipuak ding Genvai Sumte pen tu ni, tu hun laitak a ZIUSA Genvai Thukhunpom Pawlmi khempeuh, numei naupang akua mahpeuh in itna tawh Anthony Lian Lam Mang ih vuina, a luang ih phamna taktak ahi hi.

Hici bangin US gam sung a om Zomi-te in dahna sung pan ki-itna kikhualna tawh ih laizom sanggampa Anthony Lian Lam Mang’ luang pham in ih vuibawl manin, adah akap a nu leh a sanggamte a kipan, meeltheih tanau, khuapih tuipihte, Pawlpi mipihte leh Zomi Innkuan Fort Worth kipawlna Pawlmi khempeuh in khalumna ngah in, anungta Pasian kiang pan hehnepna kicing angahna dingun thu ih ngen hi.

Executive Committee
Zomi Innkuan USA

GSKhup
President

Tulsa, OK
June 3, 2015