Syria ah IS te’n Turkey galkap te 14 that
Dec. 23, 2016: Zanhal in Turkey galkap ten August 24 panin a lak sawm uh Al-Bab kiim ah IS ten Turkey galkapte 14 that uh hi. Turkey in zan in terrorism dona kikhawlsan tuan lo ding a, Al-Bab a kilak ma dong kikhawl lo ding hi ci-in kamciamna nei uh hi. Syria ah Turkey in a galdo kipat khit nungin ni khat thu-in galkap tam a sup lawh pen ni uh ahi hi.
Aug. 24 in Turkey galkap ten “Euphrates Shield” kici galdona nei dingin Syria ah lut in Free Syrian Army kici rebels pawl tuamtuamte tawh kipawl uh a, ISte leh Kurdish rebelste do kipan uh hi. Turkey leh a pawlte US ten tung lam panin thuap uh hi.
Turkey leh a pawl ten Aug. 24 in ISte ukna Jarablus khua la pah uh a, ISte ukna Al-Bab lak dingin a nawk hangun tu dong la zo nai lo uh hi. Turkey in zan-a a galkapte uh thatte pen IS jihadists leh Kurdish gamnuaimite (militants) hi ci-in ngawh hi.
“Turkey pen tu-in galdona lian mahmah lai-ah dinga, gam pua leh gam sungah terrorism ka dona uh kisunzom zel ding hi,” ci-in zan in Turkish Prime Minister Binali Yildirim in gen a, zanhal in Turkey in galkap 14 kisuplawh a, a galdona uh pen Turkey kipumkhatna ding ngimna hi a, Turkey kipumkhatna dingin Terrorism a bei dong kido ding hi ci hi.
More: Japan tuipi gei khatah meikanggawp, inn 140 kang
Al-Bab khua pen Turkey gamgi panin km. 25 a gamla hi a, hih khua lakna dingin Turkey galkap 36 val si ta dingin ki-ummawh hi. President Recep Tayyip Erdogan in Pithai ni (Tuesday) in Al-Bab khua ISte khut panin kilaksak ding hi cih ka um hi ci hi.
Turkey galkap ten zanhal in kikaptuahna mun pen ISte galvan koihna kiang hi a, galkap 33 in zong liamna tuak in, guk nak liam mahmah a, ISte 138 kithat hi ci uh hi. Source: AFP and The Hindu/ Thang Khan Lian
Comment piaknop aomleh...