ZIUSA Genvai Thupulaakna (01/04/19)

ZIUSA Genvai Thupulaakna

To: Zomi Innkuan USA (ZIUSA) Genvai Kipawlteng

ATHU: ZIUSA GENVAI SIHVUINA SUM $ 15,000 (Tulsawm leh Tulnga) KIPIA DING.

1. ZIUSA Board of Directors Meeting (March 30, 2019) thukhensatna tawh kizui-in, USA gamsung aom Zomite sihna tungtang ah luangkiphaamna ahi ZIUSA Genvai ah akipawl (Thukhunpi pom) khat in sihna atuak leh ZIUSA Genvai Thukhunpi tawh kizui-in akikaikhawmsa Piakkholh Kivuina Sum atampen (100%) $15,000 (Tulsawm leh Tulnga) tawh lungphaamna kinei ding hi cih pulaakna kong nei uh hi.

2. Zomi Innkuan USA Genvai Thukhunpi apom Zomi khat in sihna atuah leh anuai-a bangin Kivuina Sum (Death Benefit) ngah ding hi:

a. Thukhunpi pom asuah Ni pan kipan Ni 60 acinma a sihleh – 25%

b. Thukhunpi pom asuah Ni 60 acin akipan Ni 120 acinma a sih leh – 50%

c. Thukhunpi pom asuah Ni 120 acin akipan Ni 180 acinma a sih leh – 75%

d. Thukhunpi pom asuah Ni 180 a cingkhit leh sihvuina sum 100% ngah dinghi.

– Ref: Thukhun- VI:1 – ZIUSA Genvai Thukhunpi

3. Thukhun –IV: Zomi Innkuan USA Genvai Sumbulpi leh Thukhun –V: Piakkholh Kivuina Sum don zah ding kilaihna omlo hi.

4. Akikaikhawmsa Piakkholh Kivuina Sum atampen sehna ZIUSA Nasepkumsim in khanzel ding cih Thukhun kizang nawnlo ding-a, Nasepkum khat sungin ZIUSA Board of Directors in Thukhunpipom phazah zui, Sihvuina Sum phazah zui in kisam asak bangin etkikna leh puahphatna ahunzui-in nei thei ding hi.

5. ZIUSA Board of Directors in Meeting (March 30, 2019) zui-in ZIUSA Genvai Thukhunpi sunga Thukhunte puahphatna a neih teng tawh kizui-in ZIUSA Genvai Thukhunpi (Updated) asawtlo in hong kikhahkhia ding hi.

6. Hih Genvai Thupulaakna pen akipuahthak Genvai Thukhunte theihsakna hi bek hi. Genvai tawh kisai Kalsuanna khatpeuhpeuh ZIUSA Genvai Thukhunpi zui-in kikalsuan, kisem khia hi.

7. Hih Genvai Thukhun puahphatnate Board of Directors in March 30, 2019 ni-in aneih Meeting sungah khensatna aneih hun akipan in akizang hi pah hi.

8. Theihbehnopna, tellohna aom leh ZIUSA Genvai Tanupi tungah thu kidong thei hi.

Executive Officers
Zomi Innkuan USA, Inc.